रामकोटको मण्डलीदेवी मन्दिरमा २३ गते पञ्चमी मेला लाग्दै

धादिङ, कात्तिक २१ गते ।
नीलकण्ठ नगरपालिका–८ रामकोटस्थित मण्डलीदेवी मन्दिरमा लाग्ने पञ्चमी मेला यो वर्ष थप व्यवस्थित गरिने भएको छ । मेला र पूजापाठको तयारी तिव्र गतिमा भइरहेको मन्दिर व्यवस्थापन समितिका अध्यक्ष सुर्यबहादुर मगरले जानकारी दिनुभयो ।

उनका अनुसार आईतबार बेलुका चौथीका दिन सुरु हुने मेलामा फूलको डोलीसहित रातभर जाग्राम बस्ने, सांस्कृतिक कार्यक्रम र रमाइलो गर्ने परम्परा रहँदै आएको छ । त्यसपछिल्लो दिन पञ्चमीमा पूजापाठ गरी मण्डलीदेवी र मण्डलेश्वर महादेवको आराधना गरिन्छ । मनोकांक्षा पुरा हुने विश्वासका साथ भक्तजनहरू मेलामा सहभागी हुने गर्छन् ।

परम्परागत रूपमा देवीको पूजा मगर समुदायका १२ वर्षभन्दा कम उमेरका अविवाहित बालकहरूले गर्ने चलन छ भने मण्डलेश्वर महादेवको पूजा ब्राह्मण समुदायले गर्ने परम्परा रहेको छ । डाँडामाथि अवस्थित मन्दिर परिसरबाट रमणीय दृश्यावलोकन गर्न सकिने भएकाले यहाँ ठूलो संख्यामा भक्तजनहरूको भीड लाग्ने गर्छ ।

अध्यक्ष मगरका अनुसार रामकोटमा दुई मण्डलीदेवी — जेठी र माइली — रहेको जनविश्वास छ, भने कान्छी मण्डलीदेवी ढोला मण्डलीमा बसोबास गरेको किम्वदन्ती पनि छ । रातभर जाग्राम बसेर सोमबार चौथीका दिन पूजापाठ र पञ्चमीका दिन बलि चढाउने परम्परा छ ।

ऐतिहासिक र धार्मिक महत्वसहित पर्यटकीय सम्भावना बोकेको यस क्षेत्रको संरक्षणमा स्थानीय तह सक्रिय रहेको छ । रामकोट दरबारको ऐतिहासिक पहिचानका कारण पनि पछिल्ला वर्षहरूमा यो स्थान चर्चामा छ ।

ऐतिहासिक तथा पर्यटकिय क्षेत्रको संरक्षण र व्यवस्थापनमा वडाले थप पहल गरिरहेकोे नीलकण्ठ नगरपालिका वडा नम्बर ८ का वडा अध्यक्ष प्रकाश कुमार श्रेष्ठले बताउनुभयो ।

लेखकको बारेमा

असल खबरअसल साथी मिडिया प्रा.लि.द्वारा संचालित असल खबर डटकम डिजिटल खबर पत्रिका हो । २०७६ सालबाट नियमित रुपमा विभिन्न समसामयिक खबरहरुको साथै सामाजिक, आर्थिक, राजनीतिक ,खेलकुद ,खोजमुलक सामग्रीहरु पनि सदैव प्रकाशन र प्रसारण गर्दै आइरहेका छौँ । देश तथा विदेशको हरेक कुना-कुनामा रहेका जनमानसमाको हात-हात र नजर-नजरमा सहि र सत्य खबर पुर्याउन हामी कटिबद्ध छौँ ।

यो पनि पढ्नुहोस् : खेल पत्रकारलाई एआई तालिम