विधि मानेर चल्ने विद्यालयलाई प्राथमिकता दिन्छौँ : उपाध्यक्ष सिम्खडा

धादिङबेशी । १ पुस । गंगाजमुना गाउँपालिकाका उपाध्यक्ष रामेश्वर सिम्खडाले मण्डली माध्यमिक विद्यालयको ६९औँ वार्षिकोत्सव तथा अभिभावक दिवसका अवसरमा विद्यालयको गौरवशाली इतिहास, शैक्षिक योगदान र स्थानीय सरकारको शिक्षा सुधारका प्रयासबारे प्रकाश पार्नुभएको छ।

सोमबार आयोजित कार्यक्रममा सम्बोधन गर्दै उपाध्यक्ष सिम्खडाले आफूले माध्यमिक शिक्षा आर्जन गरेको यही विद्यालयले जिल्लास्तर र स्थानीय सरकारको नेतृत्वदायी तहमा पुग्ने थुप्रै व्यक्तित्व उत्पादन गरेको उल्लेख गर्नुभयो। गाउँपालिका अध्यक्ष, प्रवक्ता, विभिन्न वडाध्यक्षहरू तथा आफू स्वयं समेत यसै विद्यालयका पूर्वविद्यार्थी हुनु संयोग मात्रै नभई मण्डली माध्यमिक विद्यालयको शैक्षिक गुणस्तर र ऐतिहासिक योगदानको प्रमाण भएको उहाँको भनाइ थियो।

“मैले माध्यमिक शिक्षा आर्जन गरेको यही विद्यालयले मलाई आजको जिम्मेवारीसम्म पुर्‍याउन महत्वपूर्ण भूमिका खेलेको छ,” उपाध्यक्ष सिम्खडाले भन्नुभयो, “आज यही विद्यालयको पूर्वविद्यार्थीका रूपमा तपाईंहरूकै बीच उभिन पाउनु मेरो लागि गर्वको विषय हो।”

शैक्षिकसँगै खेलकुदमा पनि मण्डलीको पहिचान

उपाध्यक्ष सिम्खडाले मण्डली माध्यमिक विद्यालयले खेलकुद क्षेत्रमा पनि जिल्लामा विशिष्ट छवि बनाएको स्मरण गर्नुभयो। आफू कक्षा आठमा अध्ययनरत रहँदा बिरेन्द्रशील प्रतियोगितामा सहभागी भएको अनुभव सुनाउँदै उहाँले १५ सय मिटर दौड, भलिबललगायतका खेलमा मण्डलीले निलकण्ठ, भैरवी र मच्छिन्द्र माध्यमिक विद्यालयसँग प्रतिस्पर्धा गर्दै लगातार तीन पटकसम्म शिल्ड जितेको इतिहास उल्लेख गर्नुभयो।

त्यस समय जिल्लाभर “के हो मण्डली माध्यमिक विद्यालय ? कस्तो पानी रहेछ त्यहाँको ? ” भन्ने चर्चा चल्नु विद्यालयको उपलब्धिको उदाहरण भएको उहाँको भनाइ थियो। उहाँले आफ्ना गुरुहरू—स्व. कृष्ण भट्ट, देवीदत्त उपाध्याय, बुद्धसागर, श्री खनाल तथा घुम्दीमा ‘कख’ सिकाउने गुरु हस्त दाइप्रति श्रद्धापूर्वक स्मरण गर्नुभयो।

शिक्षा सुधारमा गाउँपालिकाको पहल

उपाध्यक्ष सिम्खडाले स्थानीय सरकारले शिक्षा क्षेत्र सुधारका लागि गरेका पहल र त्यस क्रममा देखिएका चुनौतीबारे पनि स्पष्ट पार्नुभयो। गाउँपालिकाले आवश्यकताका आधारमा १३ जना शिक्षकहरू विभिन्न अनुदानमार्फत थप गरेको, विद्यार्थी संख्याका आधारमा शिक्षक व्यवस्थापन तथा समायोजन गरिएको जानकारी उहाँले दिनुभयो।

माथिल्लो सरकारका नीतिगत निर्देशन कार्यान्वयन गर्ने क्रममा केही विद्यालयहरूले अवज्ञा गरेको विषय गम्भीर रहेको उल्लेख गर्दै उहाँले शिक्षा सम्बन्धी विधि कुनै व्यक्तिको नभई राज्य सरकारले अंगीकार गरेको साझा विधि भएको स्पष्ट पार्नुभयो। स्थानीय आवश्यकता र भूगोललाई मध्यनजर गर्दै साना परिमार्जन गरिए पनि मूल नीति भने राज्यकै भएको उहाँको भनाइ थियो।

सक्षम र उत्तरदायी विद्यालय व्यवस्थापनलाई समर्थन

विद्यालय सञ्चालनका शैलीबारे एउटा विचार उद्धृत गर्दै उपाध्यक्ष सिम्खडाले नीति, विधि र स्थानीय आवश्यकता बुझेर आत्मनिर्भर ढङ्गले विद्यालय सञ्चालन गर्ने प्रशासकीय प्रवृत्तिलाई गंगाजमुना गाउँपालिकाले प्राथमिकताका साथ समर्थन गर्ने बताउनुभयो। “उदाहरणीय ढङ्गले विद्यालय सञ्चालन गर्ने व्यवस्थापन नै दीगो शैक्षिक विकासको आधार हो,” उहाँले भन्नुभयो।

साझा प्रयासमा जोड

उपाध्यक्ष सिम्खडाले अभिभावक, शिक्षक, विद्यालय व्यवस्थापन समिति र स्थानीय सरकारबीच हातेमालो भए मात्र विद्यालय, गाउँपालिका र समाज अघि बढ्न सक्ने उल्लेख गर्नुभयो। उहाँले सत्यलाई सत्य र गलतलाई गलत भनेर सच्याउँदै अघि बढ्न सबैलाई आग्रह गर्नुभयो।

कार्यक्रममा विद्यालयले स्थापना गरेको अक्षयकोषबाट अपाङ्ग, टुहुरा तथा अध्ययनमा उत्कृष्ट विद्यार्थीहरूलाई प्रोत्साहन गरिएकोप्रति प्रशंसा गर्दै उहाँले यसलाई सामाजिक उत्तरदायित्वको उदाहरणका रूपमा प्रस्तुत गर्नुभयो।

अन्त्यमा, आफूलाई शिक्षा दिने विद्यालय, अभिभावकसरहका अग्रजहरू र शिक्षकहरूप्रति सम्मान व्यक्त गर्दै उपाध्यक्ष सिम्खडाले उहाँहरूको दीर्घायुको कामना गर्नुभयो। साथै मण्डली माध्यमिक विद्यालयलाई उत्तरी धादिङको प्राविधिक शिक्षाको केन्द्रका रूपमा विकास गर्न लागिपरेका सबैप्रति धन्यवाद ज्ञापन गर्नुभयो।

लेखकको बारेमा

असल खबरअसल साथी मिडिया प्रा.लि.द्वारा संचालित असल खबर डटकम डिजिटल खबर पत्रिका हो । २०७६ सालबाट नियमित रुपमा विभिन्न समसामयिक खबरहरुको साथै सामाजिक, आर्थिक, राजनीतिक ,खेलकुद ,खोजमुलक सामग्रीहरु पनि सदैव प्रकाशन र प्रसारण गर्दै आइरहेका छौँ । देश तथा विदेशको हरेक कुना-कुनामा रहेका जनमानसमाको हात-हात र नजर-नजरमा सहि र सत्य खबर पुर्याउन हामी कटिबद्ध छौँ ।