एकीकृत विद्यालय अवधारणामा जानुपर्ने समय आएको छ – जि.स.स. प्रमुख अधिकारी

धादिङबेशी । जिल्ला समन्वय समितिका प्रमुख नवराज अधिकारीले मण्डली माध्यमिक विद्यालयको ऐतिहासिक पृष्ठभूमिदेखि हाल देखिएको विद्यार्थी संख्याको गम्भीर अवस्थासम्म औँल्याउँदै अब जिल्लाले एकीकृत विद्यालयको अवधारणातर्फ जानुपर्ने आवश्यकता औँल्याउनुभएको छ ।

मण्डली माध्यमिक विद्यालयको ६९औँ वार्षिकोत्सव तथा अभिभावक दिवस कार्यक्रममा सम्बोधन गर्दै प्रमुख अधिकारीले विद्यालयको भव्य उत्सव सफलताको शुभकामना व्यक्त गर्दै आफ्नो भनाइ अत्यन्त संक्षेपमा राख्नुभएको थियो । उहाँले वि.सं. २०१४ सालमा स्थापना भएको मण्डली माध्यमिक विद्यालय ६९ वर्ष पूरा गरी ७० औँ वर्षमा प्रवेश गरेको उल्लेख गर्दै विद्यालयको नाम ‘मण्डली’ कसरी रहन गयो भन्ने ऐतिहासिक पृष्ठभूमि पनि स्पष्ट पार्नुभयो । २००९ सालको भीषण बाढीपहिरोपछि त्यस क्षेत्रमा बसोबास गर्ने योगीहरूको जमात (मण्डली) र त्यही स्थानमा रहेको समाधिबाट ‘मण्डली पाटा’ नाम चलनमा आएको र सोही स्थानमा विद्यालय स्थापना हुँदा मण्डली माध्यमिक विद्यालय नामाकरण भएको उहाँले स्मरण गर्नुभयो । “आजसम्म आइपुग्दा यो विद्यालयले हजारौँ होनहार सन्ततिहरू उत्पादन गरिसकेको छ, जसमा तपाईं–हामी प्रायः सबै पर्छौँ,” उहाँले भन्नुभयो ।

घट्दो विद्यार्थी संख्या चिन्ताको विषय कार्यक्रममा प्रमुख अधिकारीले हाल देखिएको विद्यार्थी संख्या घट्दो अवस्थाप्रति गम्भीर चिन्ता व्यक्त गर्नुभयो । उहाँका अनुसार धादिङ जिल्लामा अघिल्लो वर्ष ७७ हजार ५०९ विद्यार्थी रहेकामा यो वर्ष ५ हजार ९६७ जना घटेर ७४ हजार ५४२ मा सीमित भएको छ । “एकै वर्षमा करिब ६ हजार विद्यार्थी घट्नु भनेको हाम्रो शैक्षिक भविष्यका लागि गम्भीर प्रश्न हो,” उहाँले भन्नुभयो । उहाँले जन्मदरसमेत तीव्र रूपमा घटिरहेको तथ्य प्रस्तुत गर्दै कतिपय वडामा वार्षिक जन्म संख्या २० जनाभन्दा कम रहेको उल्लेख गर्नुभयो । “अब एउटा विद्यालयले दुई जना विद्यार्थी पनि नपाउने अवस्था सिर्जना हुँदैछ,” उहाँको भनाइ थियो ।

एकीकृत विद्यालय अवधारणामा जोड
यही यथार्थका कारण जिल्लामै एकीकृत विद्यालय र एकीकृत आवासीय विद्यालयको अवधारणामाथि बहस सुरु गरिएको प्रमुख अधिकारीले जानकारी दिनुभयो । बेनिघाट रोराङ गाउँपालिका र निलकण्ठ नगरपालिका दुई वर्ष लगातार लिजा मूल्यांकनमा प्रथम भएको उदाहरण प्रस्तुत गर्दै उहाँले ती स्थानीय तहहरूले अघि सारेका एकीकृत विद्यालय अभ्यास उल्लेख गर्नुभयो ।

शैक्षिक उपलब्धि र चुनौती
एसईई नतिजाको सन्दर्भमा गंगाजमुना गाउँपालिका धादिङ जिल्लामा दोस्रो स्थानमा रहेको उल्लेख गर्दै प्रमुख अधिकारीले ८३ प्रतिशतभन्दा बढी उत्तीर्ण दर सकारात्मक भए पनि अब सत प्रतिशत नतिजातर्फ लक्ष्य गर्नुपर्नेमा जोड दिनुभयो। जिल्ला समन्वय समिति र शिक्षा निकायको तर्फबाट सत प्रतिशत एसईई तथा प्लस टु उत्तीर्ण गराउने विद्यालयलाई सम्मान गरिएको स्मरण गर्दै उहाँले आगामी वर्ष मण्डली माध्यमिक विद्यालयलाई पनि सो सूचीमा देख्ने अपेक्षा व्यक्त गर्नुभयो ।

सत प्रतिशत नतिजाका असल अभ्यास
प्रमुख अधिकारीले सत प्रतिशत नतिजा ल्याएका विद्यालयका असल अभ्यासहरू पनि साझा गर्नुभयो। अतिरिक्त कक्षा सञ्चालन, बिहान–बेलुका विशेष अध्ययन समय, शैक्षिक सामग्री तथा खाजा व्यवस्थापन, शिक्षक–अभिभावक नियमित अन्तरक्रिया, घरदैलो अनुगमन र शिक्षकहरूको निस्वार्थ समर्पण नै उत्कृष्ट नतिजाको मुख्य आधार भएको उहाँले बताउनुभयो । “कुनै अतिरिक्त भत्ता वा प्रलोभन बिना विद्यार्थीको भविष्यका लागि समर्पित शिक्षकहरूले नै सत प्रतिशत नतिजा सम्भव बनाएका छन्,” उहाँले भन्नुभयो ।

मण्डली माविप्रति आशा
मण्डली माध्यमिक विद्यालयका शिक्षकहरू दक्ष, अभिभावक सचेत र विद्यार्थी लगनशील रहेको उल्लेख गर्दै प्रमुख अधिकारीले यस्ता असल अभ्यासहरू परिष्कृत रूपमा अपनाउन सके विद्यालयले आगामी दिनमा अझ उत्कृष्ट नतिजा ल्याउने विश्वास व्यक्त गर्नुभयो ।

अन्त्यमा, विद्यालयको चौतर्फी प्रगतिमा जिल्ला समन्वय समितिको निरन्तर साथ र सहयोग रहने प्रतिबद्धता व्यक्त गर्नु भएको थियो ।

साभार: प्रत्यूष दैनिकबाट

लेखकको बारेमा

असल खबरअसल साथी मिडिया प्रा.लि.द्वारा संचालित असल खबर डटकम डिजिटल खबर पत्रिका हो । २०७६ सालबाट नियमित रुपमा विभिन्न समसामयिक खबरहरुको साथै सामाजिक, आर्थिक, राजनीतिक ,खेलकुद ,खोजमुलक सामग्रीहरु पनि सदैव प्रकाशन र प्रसारण गर्दै आइरहेका छौँ । देश तथा विदेशको हरेक कुना-कुनामा रहेका जनमानसमाको हात-हात र नजर-नजरमा सहि र सत्य खबर पुर्याउन हामी कटिबद्ध छौँ ।