ज्वालामुखीमा राष्ट्रपति रनिङ शिल्ड सम्पन्न: त्रिपुरासुन्दरी मावि च्याम्पियन

धादिङबेशी,५ पौष । ज्वालामुखी गाउँपालिकाको आयोजनामा संचालन भएको राष्ट्रपति रनिङ शिल्ड प्रतियोगिता आज औपचारिक रूपमा समापन भएको छ । शुक्रबारदेखि सुरु भएको प्रतियोगितामा गाउँपालिकाभित्रका माध्यमिक विद्यालयहरूले उत्साहजनक सहभागिता जनाएका थिए ।

प्रतियोगितामा त्रिपुरासुन्दरी माध्यमिक विद्यालय, ज्वालामुखी–५, खरीले उत्कृष्ट प्रदर्शन गर्दै स्वर्ण १२, रजत ५ र कास्य ३ पदक जितेको छ । त्यसैगरी सुनखानी माध्यमिक विद्यालय, ज्वालामुखी–६, सुनखानीले स्वर्ण १०, रजत ७ र कास्य ११ पदक प्राप्त गरेको छ । अन्नपूर्ण माध्यमिक विद्यालय, ज्वालामुखी–५, सुनखानीले स्वर्ण ६, रजत ७ र कास्य ८ पदक हात पार्न सफल भयो ।

समापन समारोह ज्वालामुखी गाउँपालिकाका अध्यक्ष यमनाथ दनैको अध्यक्षतामा सम्पन्न भएको थियो । कार्यक्रममा बागमती प्रदेशका आन्तरिक मामिला तथा कानुन मन्त्री शिवराज अधिकारी प्रमुख अतिथिका रूपमा उपस्थित हुनुहुन्थ्यो भने गाउँपालिकाका पूर्व अध्यक्ष विनोदराज तिमल्सिना, प्रमुख प्रशासकीय अधिकृत हरेराम शाह लगायतको आतिथ्यता रहेको थियो ।

समारोहलाई सम्बोधन गर्दै प्रमुख अतिथि समेत रहनुभएका मन्त्री अधिकारीले खेलकुदले अनुशासन, सहकार्य र नेतृत्व विकासमा महत्वपूर्ण भूमिका खेल्ने उल्लेख गर्दै यस्ता प्रतियोगिताले ग्रामीण तहमा लुकेका प्रतिभा उजागर गर्न मद्दत पुग्ने बताउनुभयो । उहाँले आफ्नो जन्मभूमिको ऋण तिर्न र आधुनिक नेपाल निर्माणका लागि युवा पुस्तासँग सहकार्य गर्न तयार रहेको उद्घोष गर्नुभयो । उहाँले आफ्नो ७७–७८ वर्षको राजनीतिक यात्रा स्मरण गर्दै नयाँ ’जेन्जी’ पुस्ताको परिवर्तनको चाहनालाई सलाम गर्नुभयो । “तपाईँहरू जस्तै सानो उमेरदेखि म राजनीतिमा होमिएको हुँ,“ उहाँले भन्नुभयो, “आजको डिजिटल संसारमा युवाहरूले जे सोचेका छन्, त्यहीअनुसारको प्रगति लोकतन्त्रमा मात्र सम्भव छ ।“ उहाँले लोकतन्त्र समाप्त भए विकासका सबै ढोका बन्द हुने चेतावनी दिँदै यसको रक्षाका लागि सबैलाई सतर्क रहन आग्रह गर्नुभयो ।

गाउँपालिका अध्यक्ष दनैले राष्ट्रपति रनिङ शिल्डले विद्यार्थीहरूलाई खेलकुदतर्फ आकर्षित गरेको र आगामी दिनमा अझ व्यवस्थित रूपमा प्रतियोगिता संचालन गरिने प्रतिबद्धता व्यक्त गर्नुभयो । राष्ट्रपति रनिङ शिल्ड प्रतियोगिताको आयोजनाले ज्वालामुखी गाउँपालिकामा खेलकुदको वातावरण थप सशक्त बनेको सहभागीहरुले बताएका छन् ।

लेखकको बारेमा

असल खबरअसल साथी मिडिया प्रा.लि.द्वारा संचालित असल खबर डटकम डिजिटल खबर पत्रिका हो । २०७६ सालबाट नियमित रुपमा विभिन्न समसामयिक खबरहरुको साथै सामाजिक, आर्थिक, राजनीतिक ,खेलकुद ,खोजमुलक सामग्रीहरु पनि सदैव प्रकाशन र प्रसारण गर्दै आइरहेका छौँ । देश तथा विदेशको हरेक कुना-कुनामा रहेका जनमानसमाको हात-हात र नजर-नजरमा सहि र सत्य खबर पुर्याउन हामी कटिबद्ध छौँ ।