सीपमूलक तालिमले नगरलाई आत्मनिर्भर बनाउन मद्दत पुग्छः नगर प्रमुख ढुंगाना

धादिङको नीलकण्ठ नगरपालिका वडा नं. ८ मा स्थानीयबासीलाई स्वरोजगार बनाउने उद्देश्यका साथ सञ्चालित विभिन्न सीपमूलक तालिमहरू शनिबार एक भव्य समारोहका बीच सम्पन्न भएका छन्। वडाकै आफ्नै तालिम केन्द्रमार्फत सञ्चालन गरिएका तीनवटा प्रमुख तालिमहरूबाट यस पटक ६५ जना प्रशिक्षार्थीहरू दीक्षित भएका हुन्। हाल सम्म ६ सय जनाले विभिन्न सिपहरु सिकेर दीक्षित भएका छन् ।

तालिम समापन तथा प्रमाणपत्र वितरण कार्यक्रममा बोल्दै प्रमुख अतिथि एवं नीलकण्ठ नगरपालिकाका नगर प्रमुख भीमप्रसाद ढुङ्गानाले स्थानीय स्तरमा सञ्चालन गरिने यस्ता व्यावहारिक तालिमहरूले नगरको आर्थिक विकासमा ठूलो टेवा पु¥याउने बताउनुभयो। नगर प्रमुख ढुङ्गानाले भन्नुभयो, “स्थानीय सरकारको मुख्य प्राथमिकता नै नागरिकलाई आत्मनिर्भर र स्वावलम्बी बनाउनु हो। वडाले आफ्नै तालिम केन्द्र स्थापना गरेर जुन उदाहरणीय कार्य गरेको छ, यसले नगरलाई उद्यमशीलता तर्फ अघि बढाउन मद्दत गर्छ। यहाँ सिकेको सीपलाई केवल प्रमाणपत्रमा मात्र सीमित नराखी व्यावसायिक रूपमा प्रयोग गर्न म सबै सहभागीहरूलाई आग्रह गर्दछु। तपाईँहरू उद्यमी बन्नुहोस्, नगरपालिका आवश्यक परेको सहयोग र समन्वय गर्न सधैँ तयार छ।“

सामाजिक विकास कार्यालय, गजुरीको सहयोग तथा ‘सिद्धिविनायक टेक्निकल ट्रेनिङ सेन्टर प्रा.लि.’ को आयोजनामा सम्पन्न भएको यस कार्यक्रममा विभिन्न विधाका ६५ जना सफल प्रशिक्षार्थीहरूलाई प्रमाणपत्र वितरण गरिएको थियो। जसअन्तर्गत बजारमा माग बढ्दै गएको वारिस्टा अर्थात् कफी बनाउने तालिममा २० जना र स्थानीय पर्यटन प्रवद्र्धन गर्ने उद्देश्यले आयोजित होमस्टे तालिममा २० जना सहभागी भएका थिए। यसैगरी, आधुनिक प्रविधिसँग जोडिनका लागि सञ्चालन गरिएको २२० घण्टाको आधारभूत कम्प्युटर तालिममा २५ जना स्थानीय युवाहरूले सफलतापूर्वक सीप हासिल गरेका छन्।वडामा सीप विकासका लागि छुट्टै तालिम केन्द्र स्थापना गरी सञ्चालन गर्न, आवश्यक कम्प्युटर व्यवस्थापन गर्न तथा तालिम हलको सुदृढीकरणमा ‘अनन्त आशा नेपाल’ ले महत्त्वपूर्ण भूमिका निर्वाह गर्दै आएको छ। कार्यक्रमका सभापति एवं वडाध्यक्ष प्रकाश कुमार श्रेष्ठले अनन्त आशा नेपालको सो योगदानको विशेष प्रशंसा गर्नुभयो। यो अभियानलाई सफल बनाउन नीलकण्ठ नगरपालिका, रामकोट माध्यमिक विद्यालय तथा अन्य सहयोगी संघ–संस्थाहरूको समेत बलियो समन्वय रहेको थियो।

यो पनि पढ्नुहोस् : नेपाल पत्रकार महासंघ धादिङ उत्कृष्ट जिल्ला शाखाको रूपमा सम्मानित

वडाध्यक्ष श्रेष्ठको अध्यक्षतामा सम्पन्न सो गरिमामय कार्यक्रममा उप–प्रमुख दीपक विश्वकर्मा, नेपाल नगरपालिका संघका सल्लाहकार सरोज अधिकारी र फेडेन धादिङका अध्यक्ष शिवहरी अधिकारी लगायतको उपस्थिति रहेको थियो। कार्यक्रमलाई सम्बोधन गर्नुहुदै उप मेयर दिपवक विश्वकर्मा र नेपाल नगरपालिका संघका सल्लाहकार सरोज अधिकारीले सिप सिकेर व्यवसायी बन्नको लागि आग्रह गर्नुभएको थियो । युवाहरुलाई देशमै स्वरोजगार बनाउन सकिए बैदेशिक रोजगारमा जाने युवाहरुमा कमी आउने भन्दै उहाँहरुले देशमै केहि गर्नको लागि आग्रह गर्नुभयो । साथै स्थानीय सरकारले युवाहरुलाई देशमै रोक्ने उदेश्यले मेयर उद्यमशीलता जस्ता कार्यँक्रम सन्चालन गरीरहेको बताउनुभयो । आफ्नै गाउँ–ठाउँमा आधुनिक प्रविधि र व्यावसायिक सीप सिक्न पाएपछि तालिममा सहभागी प्रशिक्षार्थीहरू स्वरोजगार बन्न थप उत्साहित देखिएका छन्। नीलकण्ठ नगरपालिका र सहयोगी संस्थाहरूको यो सहकार्यले नीलकण्ठ–८ लाई नमुना सीप विकास केन्द्रको रूपमा स्थापित गर्दै लगेको सहभागीहरूले बताएका छन्।

लेखकको बारेमा

असल खबरअसल साथी मिडिया प्रा.लि.द्वारा संचालित असल खबर डटकम डिजिटल खबर पत्रिका हो । २०७६ सालबाट नियमित रुपमा विभिन्न समसामयिक खबरहरुको साथै सामाजिक, आर्थिक, राजनीतिक ,खेलकुद ,खोजमुलक सामग्रीहरु पनि सदैव प्रकाशन र प्रसारण गर्दै आइरहेका छौँ । देश तथा विदेशको हरेक कुना-कुनामा रहेका जनमानसमाको हात-हात र नजर-नजरमा सहि र सत्य खबर पुर्याउन हामी कटिबद्ध छौँ ।