पहिरो रोकथाम र सडक निर्माण कार्य तीव्र

धादिङ, साउन ०९ गते ।
अस्मिता पोखरेल ।
एक वर्षअघि नागढुंगा–मुग्लिङ सडकखण्ड अन्तर्गतको झ्याप्ले खोलामा पहिरो खस्यो । जसकारण ठूलो मानवीय क्षति भयो । ३५ जनाले अकालमै ज्यान गुमाए । यो दर्दनाक घटना पुनः दोहोरिन नदिन हाल उक्त क्षेत्रमा पहिरो रोकथाम र सडक निर्माणमा तीव्रता दिइएको छ ।

स्थानीयको भनाइ अनुसार, त्यहाँ वि.सं २०५७/०५८ सालमा पनि ठूलो पहिरो गएको थियो । गत वर्ष लगातार दुई/तिन दिन भएको वर्षाले भिरालो ठाउँमा माटो भिजेर पहिरो झरेको भन्ने अनुमान छ ।

नागढुंगा–मुग्लिङ सडक पुर्वीखण्डका योजना प्रमुख केशव ओझाका अनुसार पहिला त्यहाँ लगाइएको टेवा पर्खालमा माइक्रोपाइल प्रविधिको प्रयोग गरेर काम गरिएको छ । हाल टेवा पर्खालको पुनर्निर्माण, स्वाइल एंकरिङ र ग्याविन वालको काम भइरहेको छ । टेवा पर्खाल भत्किएको ठाउँमा पहिरो रोक्न, पर्खाल बलियो बनाउँन, वा सडक टिकाउनको लागि स्वाइल एनकरेज गर्ने गरी काम भइरहेको छ ।

माटो खसेको र सवारी साधनहरु पुरिएका ठाउँमा लेदो माटोहरु पन्छाएर ग्याविन पर्खाल निमार्णको काम अन्तिम चरणमा छ । अहिले वर्खाको समयमा पनि गर्न मिल्ने काम भएको हुनाले नियमित रुपमा काम भइरहेको योजना प्रमुख ओझाको भनाइ छ ।

हाल मनसुनको समयमा सडक सञ्चालनमा समस्या नआओस् भनेर तत्कालीन उपायहरू लागू गरिएको ओझाले जानकारी दिनुभयो । झ्याप्ले खोलाको सम्पुर्ण कामहरु लागत पनि धेरै हुने र अहिले निमार्ण भइरहेको ठेक्काबाट सम्भव नहुने हुनाले त्यसको दिर्घकालिन कामहरु पछि अध्ययनबाट प्राप्त भए बमोजिम नै हुने छ । उहाँले भन्नुभयो, “यो तत्कालिन व्यवस्थापनको लागि मात्रै हो पहिरो व्यवस्थापनको सम्पुर्ण कामहरु अहिले गरेको हैन” ।

उक्त सडकखण्डको चार किलो भन्ने स्थानमा महेश खोलाले गरेको कटान रोक्न टेवा पर्खाल निर्माण गरिएको छ । परेवाभिरमा सुख्खा पहिरोबाट खसेको माटोहरु सबै पन्छाएर ग्याबिन जाली लाउने काम सम्पन्न भएसकेको छ । उहाँका अनुसार कमेरे भीरको थप अध्ययन गर्ने काम भइरहेको र अध्ययन प्रतिवेदन आइसकेपछि स्रोतहरु पहिचान गरेर काम अगाडि बढाइने छ ।

यो पनि पढ्नुहोस् : पोखरा कलेज अफ म्यानेजमेन्टमा विद्यार्थीद्वारा नमुना पत्रकार सम्मेलन, व्यावहारिक सीप विकासमा जोड

नागढुंगा पूर्वी खण्ड आयोजना सडकखण्डअन्तर्गत दुईओटा प्याकेजहरु छन्। योजना प्रमुख ओझाले भन्नुभयो, ‘एउटा प्याकेज नागढुंगादेखि नैबिसे खण्डसम्म १२.२ किलोमिटर र नविसेदेखि मलेखुखण्डसम्म ४३.५ किमि छ । कुल ५५ किमिमध्ये हालसम्म करिब आधा अर्थात २७ किमि पहिलो तहको कालोपत्रे सम्पन्न भएको छ ।

यस खण्डमा पर्ने १५ वटा पुलहरुमध्ये नौ ओटा पुलहरुमा गाडीहरु नै चल्न सुरु गरेका छन् । सडकतर्फ पनि चालु आवसम्म पहिलो तहको कालोपत्रे ५५ किमिमा सक्ने योजना छ । आयोजनाको कुल समग्रमा हेर्दा ४४ प्रतिशत भौतिक प्रगति छ । पहिलो प्याकेजको करिब ८४ प्रतिशत र दोस्रो प्याकेजको ४४ प्रतिशत काम भइसकेको छ ।

लेखकको बारेमा

असल खबरअसल साथी मिडिया प्रा.लि.द्वारा संचालित असल खबर डटकम डिजिटल खबर पत्रिका हो । २०७६ सालबाट नियमित रुपमा विभिन्न समसामयिक खबरहरुको साथै सामाजिक, आर्थिक, राजनीतिक ,खेलकुद ,खोजमुलक सामग्रीहरु पनि सदैव प्रकाशन र प्रसारण गर्दै आइरहेका छौँ । देश तथा विदेशको हरेक कुना-कुनामा रहेका जनमानसमाको हात-हात र नजर-नजरमा सहि र सत्य खबर पुर्याउन हामी कटिबद्ध छौँ ।