डिजिटल पहुँचको नयाँ ढोका : सुबिसुको २५औँ वर्षमा धादिङको बहिरा विद्यालयमा निःशुल्क इन्टरनेट

धादिङबेशी,१२ धादिङ । सूचना प्रविधिको पहुँचबाट टाढा रहँदै आएका विशेष आवश्यकता भएका बालबालिकाका लागि नीलकण्ठ–८ मा एक सकारात्मक परिवर्तनको सुरुवात भएको छ। सुबिसु लिमिटेडको २५औँ वार्षिक उत्सवको अवसर पारेर धादिङ जिल्लाको एकमात्र स्वाबलम्बी बहिरा आधारभूत विद्यालयमा निःशुल्क इन्टरनेट सेवा जडान गरिएको छ।

डिजिटल शिक्षामार्फत बहिरा विद्यार्थीहरूलाई ज्ञानसँग जोड्ने उद्देश्यले गरिएको यो पहलले विद्यालयको शिक्षण–सिकाइ वातावरणमा नयाँ सम्भावनाको ढोका खोलेको छ। कार्यक्रम नीलकण्ठ नगरपालिकाका प्रवक्ता तथा वडा नं. ८ का अध्यक्ष प्रकाश श्रेष्ठको प्रमुख आतिथ्यतामा सम्पन्न भएको हो।

कार्यक्रमलाई सम्बोधन गर्दै प्रमुख अतिथि श्रेष्ठले प्रविधिको तीव्र विकाससँगै शिक्षामा समान पहुँच अनिवार्य भएको उल्लेख गर्नुभयो। “शिक्षा सबैका लागि समान हुनुपर्छ, चाहे उनीहरूको क्षमता जुनसुकै होस्,” उहाँले भन्नुभयो, “बहिरा विद्यार्थीहरूका लागि इन्टरनेट अब केवल सुविधा होइन, सिकाइको बलियो आधार बन्नेछ।” उहाँले सुबिसु लिमिटेडले सामाजिक उत्तरदायित्वको उदाहरण प्रस्तुत गरेको भन्दै खुलेर प्रशंसा गर्नुभयो।

इन्टरनेट जडानपछि विद्यालयमा उत्साह थपिएको छ। प्रधानाध्यापक रामप्रसाद अधिकारीले यसले बहिरा विद्यार्थीहरूको सिकाइ क्षमतामा उल्लेखनीय सुधार ल्याउने विश्वास व्यक्त गर्नुभयो। अनलाइन शैक्षिक सामग्री, भिडियो, सांकेतिक भाषामा आधारित स्रोत तथा डिजिटल प्लेटफर्ममार्फत पठनपाठन अझ प्रभावकारी बन्ने उहाँको भनाइ छ। साथै, यस्ता सहयोग दीर्घकालीन रूपमा निरन्तर रहनुपर्ने आवश्यकता पनि उहाँले औंल्याउनुभयो।

सुबिसु लिमिटेडका रिजनल टेक्निकल इन्चार्ज तथा लायन्स क्लब अफ धादिङ मण्डलीका अध्यक्ष महेश रिजालले कम्पनीले शिक्षा, स्वास्थ्य र प्रविधिलाई केन्द्रमा राखेर सामाजिक उत्तरदायित्वका कार्यक्रमहरू सञ्चालन गर्दै आएको जानकारी दिनुभयो। समुदायको वास्तविक आवश्यकतालाई ध्यानमा राख्दै भविष्यमा पनि यस्ता सहयोगात्मक कार्यक्रमलाई निरन्तरता दिइने प्रतिबद्धता उहाँले व्यक्त गर्नुभयो।

कार्यक्रममा विद्यालय व्यवस्थापन समिति, शिक्षक, स्थानीय जनप्रतिनिधि तथा अभिभावकहरूको उल्लेखनीय उपस्थिति रहेको थियो। सहभागीहरूले निःशुल्क इन्टरनेट जडानले बहिरा विद्यार्थीहरूको शैक्षिक गुणस्तर सुधारमा महत्वपूर्ण योगदान पुर्‍याउने अपेक्षा व्यक्त गरेका छन्।

यो पनि पढ्नुहोस् : खेल पत्रकारलाई एआई तालिम

सुबिसुको यो पहल केवल इन्टरनेट जडानमा सीमित छैन, यो बहिरा बालबालिकाका लागि डिजिटल भविष्यतर्फको एउटा बलियो कदम बनेको छ।

लेखकको बारेमा

असल खबरअसल साथी मिडिया प्रा.लि.द्वारा संचालित असल खबर डटकम डिजिटल खबर पत्रिका हो । २०७६ सालबाट नियमित रुपमा विभिन्न समसामयिक खबरहरुको साथै सामाजिक, आर्थिक, राजनीतिक ,खेलकुद ,खोजमुलक सामग्रीहरु पनि सदैव प्रकाशन र प्रसारण गर्दै आइरहेका छौँ । देश तथा विदेशको हरेक कुना-कुनामा रहेका जनमानसमाको हात-हात र नजर-नजरमा सहि र सत्य खबर पुर्याउन हामी कटिबद्ध छौँ ।