नुवाकोटको लिखु गाउँपालिकामा एक दिने मानसिक स्वास्थ्य सचेतना तथा मनोसामाजिक परामर्श कार्यक्रम सम्पन्न

धादिङ,२४ पुस
नुवाकोट जिल्लाको लिखु गाउँपालिकाको आयोजनामा जनप्रतिनिधि तथा गाउँपालिकामा कार्यरत कर्मचारीहरूका लागि एकदिने मानसिक स्वास्थ्य सचेतना तथा मनोसामाजिक परामर्श कार्यक्रम सम्पन्न भएको छ। मानसिक स्वास्थ्यप्रतिको बुझाइ अभिवृद्धि गर्ने तथा तनाव व्यवस्थापनमा सहयोग पु¥याउने उद्देश्यले कार्यक्रम आयोजना गरिएको हो।कार्यक्रममा धादिङका नीलकण्ठ नगरपालिकाका मनोसामाजिक परामर्शकर्ता रामकुमार थापाले सहजिकरण गर्नुभएको थियो। सहजिकरणका क्रममा उहाँले स्वास्थ्यको समग्र परिभाषा, मानसिक स्वास्थ्य भनेको के हो, मानसिक रूपमा स्वस्थ व्यक्तिमा देखिने व्यवहारहरू, मनोसामाजिक अवधारणाको अर्थ तथा मनोसामाजिक समस्या उत्पन्न हुने कारणहरूबारे सहजिकरण गर्नुभएको थियो ।

त्यसैगरी मानसिक स्वास्थ्य समस्याका कारण बढ्दै गएको आत्महत्याको अवस्थाबारे चर्चा गर्दै मानसिक सुस्वास्थ्य कायम राख्न अपनाउन सकिने उपायहरू, तनाव व्यवस्थापनका व्यवहारिक तरिका तथा सकारात्मक सोचको महत्वबारे जानकारी गराउनुभएको थियो। सहजिकरणका क्रममा दैनिक जीवनमा आइपर्ने तनाव र दबाबलाई कसरी सामना गर्ने तरिकाहरुको बारेमा जानकारी गराउनु भएको थियो ।कार्यक्रममा स्वागत मन्तव्य राख्दै गाउँपालिकाका मनोसामाजिक परामर्शकर्ता गोमा जम्कट्टेलले गाउँपालिकाले मनोसामाजिक समस्या भएका व्यक्तिहरुको घरमै गएर निशुल्क सेवा प्रवाह गरीरहेको बताउनुभयो । साथै उहाँले मनोसामाजिक समस्या भए खुलेर कुरागर्न र परामर्शको लागि आउनको लागि आग्रह गर्नुभयो । कार्यक्रमका प्रमुख अतिथि लिखु गाउँपालिकाका अध्यक्ष ध्रुव श्रेष्ठले लिखु गाउँपालिकाले मानसिक स्वास्थ्यलाई प्राथमिकतामा राख्दै विभिन्न सचेतनामूलक तथा सहयोगी कार्यक्रमहरू सञ्चालन गर्दै आएको बताउनुभयो। उहाँले मानसिक स्वास्थ्य समस्यालाई लुकाएर होइन, खुलेर स्वीकार गरी समाधानतर्फ अघि बढ्नुपर्ने आवश्यकता औंल्याउँदै आगामी दिनहरूमा पनि लिखु गाउँपालिकाले मानसिक स्वास्थ्य क्षेत्रमा थप कार्यक्रमहरू सञ्चालन गर्ने प्रतिबद्धता व्यक्त गर्नुभयो।

कार्यक्रममा सहभागी जनप्रतिनिधि तथा कर्मचारीहरूले यस्ता कार्यक्रमले कार्यक्षेत्रमा देखिने मानसिक तनाव न्यूनीकरण गर्न तथा व्यक्तिगत र व्यावसायिक जीवन सन्तुलनमा राख्न सहयोग पुग्ने प्रतिक्रिया दिएका छन्। गाउँपालिकाका उपाध्यक्ष सुभद्रा अधिकारी उप्रेतीको अध्यक्षतामा सम्पन्न भएको कार्यक्रममा गाउँपालिकाका अध्यक्ष ध्रुव श्रेष्ठको प्रमुख आतिथ्यता रहेको थियो । लिखु गाउँपालिकाका प्रमुख प्रशासकीय अधिकृत अशोक विष्टको विशेष आतिथ्यता रहेको कार्यक्रममा वडा अध्यक्षहरु,शाखा प्रमुखहरु,कार्यपालिका सदस्यहरु,वडा सचिव,स्वास्थ्य चौकी ईन्चार्ज लगायत सरोकारवाला निकायहरुको सहभागिता रहेको थियो ।

यो पनि पढ्नुहोस् : फालिएकाे पत्रिकाको दोस्रो जीवन : ‘पोख्रेली सिसाकलम’

लेखकको बारेमा

असल खबरअसल साथी मिडिया प्रा.लि.द्वारा संचालित असल खबर डटकम डिजिटल खबर पत्रिका हो । २०७६ सालबाट नियमित रुपमा विभिन्न समसामयिक खबरहरुको साथै सामाजिक, आर्थिक, राजनीतिक ,खेलकुद ,खोजमुलक सामग्रीहरु पनि सदैव प्रकाशन र प्रसारण गर्दै आइरहेका छौँ । देश तथा विदेशको हरेक कुना-कुनामा रहेका जनमानसमाको हात-हात र नजर-नजरमा सहि र सत्य खबर पुर्याउन हामी कटिबद्ध छौँ ।