सांङकोष माविमा एक दिने अभिभावक उत्प्रेरणा तथा मनोसामाजिक परामर्श कार्यक्रम सम्पन्न

धादिङ,१९ जेठ
नीलकण्ठ नगरपालिका वडा नम्बर १२ स्थित सांङकोष माविमा एक दिने ‘अभिभावक उत्प्रेरणा तथा मनोसामाजिक परामर्श’ कार्यक्रम भव्यताका साथ सम्पन्न भएको छ। बदलिँदो परिवेशमा बालबालिकाको मनोविज्ञान बुझ्न र उनीहरूलाई सही मार्गदर्शन दिन अभिभावकको भूमिका कस्तो हुनुपर्छ भन्ने उद्देश्यका साथ उक्त कार्यक्रमको आयोजना गरिएको हो। कार्यक्रममा विद्यालयका कक्षा ७ देखि १० सम्मका विद्यार्थीका अभिभावकहरूको उल्लेख्य तथा उत्साहजनक सहभागिता रहेको थियो।किशोरावस्थामा प्रवेश गर्दै गरेका बालबालिकाहरूको व्यवहार र उनीहरूको मानसिक स्वास्थ्यलाई लिएर अभिभावकहरू निकै गम्भीर हुनुभएको थियो। कार्यक्रममा प्रमुख सहजकर्ता एवं मनोसामाजिक परामर्शकर्ता रामकुमार थापाले असल अभिभावकत्वको परिभाषा र यसका व्यावहारिक पाटाहरूमाथि विशेष सहजीकरण गर्नुभएको थियो। उहाँले बालबालिकाको मनोविज्ञानलाई कसरी बुझ्ने र उनीहरूसँग कसरी मित्रवत् व्यवहार गर्ने भन्नेबारे प्रकाश पार्नुभयो।

उहाँले बालबालिकाको अगाडि अभिभावकले गर्नुपर्ने आचरण र देखाउनुपर्ने सकारात्मक व्यवहारहरू,मनोसामाजिक समस्याका लक्षणः बालबालिकाहरू मानसिक वा सामाजिक रूपमा तनावमा हुँदा कस्ता लक्षणहरू देखाउँछन् र त्यसलाई समयमै कसरी पहिचान गर्ने,शब्दको चयन (भाषाको प्रभाव)ः बालबालिकासँग कुरा गर्दा प्रयोग गर्न मिल्ने उत्प्रेरक शब्दहरू र उनीहरूको मनोबल गिराउने, प्रयोग गर्न नमिल्ने शब्दहरूको बारेमा सहजिकरण गर्नुभएको थियो । साथै उहाँले “बालबालिकालाई गाली वा सजाय गरेर भन्दा उनीहरूको भावना बुझेर मायालु र सकारात्मक व्यवहार गर्दा मात्र उनीहरूको चौतर्फी विकास हुने बताउनु भएको थियो ।

कार्यक्रममा सहभागी अभिभावकहरूले यस किसिमको परामर्श निकै फलदायी र समयसान्दर्भिक रहेको भन्दै खुसी व्यक्त गर्नुभएको थियो । घरपरिवार र समाजमा व्यस्त रहँदा आफ्नै छोराछोरीको मनोविज्ञान बुझ्न कतै न कतै चुकेको महसुस भएको बताउनुभयो । कार्यक्रमको प्रशंसा गर्दै एक सहभागी अभिभावकले भन्नुभयो, “यो कार्यक्रमले हाम्रो ज्ञानको आँखा खोलिदिएको छ। जानेर वा नजानेर हामीले बालबालिकामाथि गर्ने कतिपय व्यवहारहरू गलत रहेछन् भन्ने बुझ्यौं। आज यहाँ सिकेका कुराहरूलाई हामी आफ्नो व्यवहार र दैनिक जीवनमा पूर्ण रूपमा उतार्ने प्रतिबद्धता व्यक्त गर्दछौं।“ कार्यक्रमले समाजमा सकारात्मक सोचको विकास गर्न र बालबालिकाको भविष्य उज्ज्वल बनाउन ठूलो मद्दत पुग्ने भन्दै सहभागीहरूले विद्यालयलार्य धन्यवाद समेत व्यक्त गर्नुभएको थियो ।

यो पनि पढ्नुहोस् : हिमाली सांस्कृतिक परिवारलाई कार्कीको ५ लाख सहयाेग घाेषणा, ढकालको सवा लाख सहयोग

लेखकको बारेमा

असल खबरअसल साथी मिडिया प्रा.लि.द्वारा संचालित असल खबर डटकम डिजिटल खबर पत्रिका हो । २०७६ सालबाट नियमित रुपमा विभिन्न समसामयिक खबरहरुको साथै सामाजिक, आर्थिक, राजनीतिक ,खेलकुद ,खोजमुलक सामग्रीहरु पनि सदैव प्रकाशन र प्रसारण गर्दै आइरहेका छौँ । देश तथा विदेशको हरेक कुना-कुनामा रहेका जनमानसमाको हात-हात र नजर-नजरमा सहि र सत्य खबर पुर्याउन हामी कटिबद्ध छौँ ।