धुनिबेसी नगरपालिका पूर्ण खोप सुनिश्चितता तथा दिगोपना घोषणा

धादिङबेशी,२६ जेष्ठ । धुनिबेसी नगरपालिका बालबालिकाका लागि राष्ट्रिय खोप कार्यक्रम अन्तर्गत लक्षित उमेर समूहका सबै बालबालिकाले आवश्यक सबै खोप प्राप्त गरेको सुनिश्चित भएपछि नगरपालिकालाई पूर्ण खोप सुनिश्चितता तथा दिगोपना प्राप्त स्थानीय तहका रूपमा औपचारिक रूपमा घोषणा गरिएको छ। नगरपालिकाको आयोजनामा सम्पन्न कार्यक्रममा जिल्ला जनस्वास्थ्य कार्यालय धादिङका प्रमुख अर्जुन पौडेल, नगर प्रमुख बालकृष्ण आचार्य, तथा स्वास्थ्य शाखा प्रमुख ध्रुव अधिकारी लगायतको उपस्थिति रहेको थियो।

कार्यक्रममा खोप कार्यक्रमलाई प्रभावकारी रूपमा सञ्चालन गर्न योगदान पुर्‍याउने स्वास्थ्यकर्मी, महिला स्वास्थ्य स्वयंसेविका तथा सरोकारवालाहरूलाई प्रशंसापत्र र सम्मान गरिएको थियो।

कार्यक्रमलाई सम्बोधन गर्दै नगर प्रमुख बालकृष्ण आचार्यले बालबालिकाको स्वास्थ्य सुरक्षा सुनिश्चित गर्न खोप कार्यक्रम अत्यन्त महत्वपूर्ण रहेको उल्लेख गर्दै आगामी दिनमा पनि कुनै पनि बालबालिका खोप सेवाबाट वञ्चित नहुने प्रतिबद्धता व्यक्त गर्नुभयो ।

जिल्ला जनस्वास्थ्य कार्यालय प्रमुख अर्जुन पौडेलले पूर्ण खोप सुनिश्चितता प्राप्त गर्नु मात्र उपलब्धि नभई यसलाई दीगो रूपमा कायम राख्नु थप जिम्मेवारी भएको उल्लेख गर्दै निरन्तर सहकार्य आवश्यक रहेको बताउनु भयो ।

त्यस्तै, स्वास्थ्य शाखा प्रमुख ध्रुव अधिकारीले नगरपालिकाले नियमित खोप सेवा सञ्चालन, अभिलेखीकरण तथा अनुगमन प्रणालीलाई प्रभावकारी बनाउँदै पूर्ण खोप सुनिश्चितता हासिल गरेको जानकारी दिनुभयो ।

घोषणासँगै धुनिबेसी नगरपालिका बालबालिकाको स्वास्थ्य संरक्षण तथा रोग नियन्त्रणका क्षेत्रमा महत्वपूर्ण उपलब्धि हासिल गर्ने स्थानीय तहका रूपमा स्थापित भएको छ।

लेखकको बारेमा

असल खबरअसल साथी मिडिया प्रा.लि.द्वारा संचालित असल खबर डटकम डिजिटल खबर पत्रिका हो । २०७६ सालबाट नियमित रुपमा विभिन्न समसामयिक खबरहरुको साथै सामाजिक, आर्थिक, राजनीतिक ,खेलकुद ,खोजमुलक सामग्रीहरु पनि सदैव प्रकाशन र प्रसारण गर्दै आइरहेका छौँ । देश तथा विदेशको हरेक कुना-कुनामा रहेका जनमानसमाको हात-हात र नजर-नजरमा सहि र सत्य खबर पुर्याउन हामी कटिबद्ध छौँ ।

यो पनि पढ्नुहोस् : स्वावलम्बी बहिरा विद्यालयमा पङ्खा हस्तान्तरण र निःशुल्क स्वास्थ्य परीक्षण