सिद्धलेकले ल्यायो ६० करोड ५० लाखको बजेट

धादिङबेशी,९ असार । धादिङको सिद्धलेक गाउँपालिकाले आगामी आर्थिक वर्ष २०८३/०८४ का लागि ६० करोड ५० लाख ४५ हजार २ सय ६० रुपैयाँको बजेट सार्वजनिक गरेको छ। गाउँपालिकाको १९ औँ गाउँसभाबाट “उज्यालो सिद्धलेक, समृद्ध सिद्धलेक” भन्ने मूल नारासहित नीति, कार्यक्रम र बजेट प्रस्तुत गरिएको हो।

कुल बजेटमध्ये संघीय र प्रदेश सरकारबाट प्राप्त हुने सशर्त, समपूरक र विशेष अनुदानतर्फ ३३ करोड १२ लाख ५४ हजार रुपैयाँ विनियोजन गरिएको छ। बाँकी २७ करोड ३७ लाख ९१ हजार २ सय ६० रुपैयाँ आन्तरिक राजस्व, राजस्व बाँडफाँड र वित्तीय समानीकरण अनुदानबाट व्यवस्थापन गरिने गाउँपालिकाले जनाएको छ।

गाउँपालिकाले पूर्वाधार विकास र सुशासनलाई प्राथमिकतामा राख्दै लागत साझेदारीमा विकास योजना सञ्चालन गर्ने नीति लिएको छ। “एक टोल, एक उपभोक्ता समिति” गठन गरिने तथा सडक मर्मत र संरक्षणका लागि “हाम्रो सडक, हाम्रै सुरक्षा” कार्यक्रम सञ्चालन गरिने जनाइएको छ। नागरिकसँग प्रत्यक्ष संवादका लागि “जनतासँग अध्यक्ष” रेडियो कार्यक्रम र डिजिटल संवादसमेत सञ्चालन गरिने भएको छ। गाउँपालिकाको आफ्नै केन्द्रीय सर्भर स्थापना गरी वडा कार्यालय र स्वास्थ्य संस्थामा इन्टरनेट तथा सीसीटीभी जडान गर्ने योजना पनि अघि सारिएको छ।

शिक्षातर्फ सामुदायिक विद्यालयमा कक्षा १ देखि १२ सम्मको शिक्षालाई पूर्ण निःशुल्क बनाउने गरी ‘निःशुल्क शिक्षा कार्यविधि २०८३’ लागू गरिने भएको छ। आधारभूत तहमा स्थानीय पाठ्यक्रम “हाम्रो सिद्धलेक” लागू गरिनेछ भने “जहाँ विद्यार्थी, त्यहाँ शिक्षक” नीति अनुरूप विद्यालयलाई ल्यापटप खरिदमा अनुदान दिने व्यवस्था गरिएको छ।

स्वास्थ्य तथा सामाजिक सुरक्षातर्फ घरमै स्वास्थ्य सेवा पुर्‍याउने कार्यक्रम ल्याइएको छ। “अध्यक्षसँग ज्येष्ठ नागरिक स्वास्थ्य परीक्षण कार्यक्रम” मार्फत ज्येष्ठ नागरिकलाई घरमै स्वास्थ्य परीक्षण र औषधि उपलब्ध गराइनेछ। गर्भवती तथा सुत्केरी महिलालाई निःशुल्क एम्बुलेन्स सेवा र “उपाध्यक्षसँग सुत्केरी पोषण कार्यक्रम” सञ्चालन गरिने भएको छ। ‘ग’ वर्गका अपाङ्गता भएका व्यक्तिलाई निःशुल्क स्वास्थ्य बीमाको व्यवस्था गरिएको छ।

कृषि, रोजगार र पर्यटनतर्फ “हाम्रो उत्पादन, हाम्रो स्वाभिमान” अभियान सञ्चालन गरिने भएको छ। प्रत्येक वडामा “एक वडा, एक पर्यटकीय गन्तव्य” र “एक घर, एक उद्यमी, एक वडा, एक उत्पादन” अभियान लागू गरिने जनाइएको छ। ढेवालेक क्षेत्रमा पाइने दुर्लभ काँडे भ्याकुर प्रजातिको संरक्षण गर्दै वन पर्यटन केन्द्रका रूपमा विकास गर्ने योजना पनि बजेटमा समेटिएको छ। वैदेशिक रोजगारीबाट फर्किएका नागरिकको सीप उपयोग गर्न “रिटर्नी स्वयंसेवक” परिचालन गरिने गाउँपालिकाले जनाएको छ।

राजस्व व्यवस्थापनतर्फ व्यवसाय दर्ता, होडिङ बोर्ड, खानी, क्रसर, ढुंगा–गिट्टी निकासी तथा तीन पाङ्ग्रे अटो रिक्सालाई करको दायरामा ल्याइने नीति लिइएको छ। गाउँसभाले नीति, कार्यक्रम र बजेट पारित गरेको छ। गाउँ सभाकै अवसर पारेर पालिकाले बिभिन्न बिधामा उत्कृष्ट कार्यसम्पादनको मुल्याङ्कन गदैै सम्मान समेत गरेको थियो ।

लेखकको बारेमा

असल खबरअसल साथी मिडिया प्रा.लि.द्वारा संचालित असल खबर डटकम डिजिटल खबर पत्रिका हो । २०७६ सालबाट नियमित रुपमा विभिन्न समसामयिक खबरहरुको साथै सामाजिक, आर्थिक, राजनीतिक ,खेलकुद ,खोजमुलक सामग्रीहरु पनि सदैव प्रकाशन र प्रसारण गर्दै आइरहेका छौँ । देश तथा विदेशको हरेक कुना-कुनामा रहेका जनमानसमाको हात-हात र नजर-नजरमा सहि र सत्य खबर पुर्याउन हामी कटिबद्ध छौँ ।