‘हामीभन्दा साना देशले तहल्का मच्चाउँदा हाम्रो फुटबल भने प्रतिबन्धको भुमरीमा’– ओली

काठमाडौँ । संसारभर विश्वकप फुटबलको रौनक छ । भुइँतहका र भूगोलका हिसाबले नेपालभन्दा साना मुलुकहरूले समेत खेलमैदानमा चामत्कारिक प्रदर्शन गर्दै विश्वको ध्यान खिचिरहेका छन् । तर, ठीक यही बेला नेपाली फुटबलको आन्तरिक वृत्त भने आफ्नै खिचातानी र प्रतिबन्धको अँध्यारो सुरुङभित्र रुमल्लिरहेको छ । यसै विरोधाभासपूर्ण परिदृश्यलाई लिएर प्रमुख प्रतिपक्षी दल नेकपा एमालेका अध्यक्ष केपी शर्मा ओलीले खेल नेतृत्वमाथि कडा प्रहार गरेका छन् ।

राष्ट्रिय खेलकुद महासंघद्वारा आयोजित एक कार्यक्रममा बोल्दै ओलीले नेपाली खेलकुद क्षेत्रमा व्याप्त उल्टोपाल्टो प्रवृत्तिप्रति गम्भीर चिन्ता र आक्रोश व्यक्त गरे ।
अध्यक्ष ओलीले विश्व फुटबलमा भइरहेको बदलाव र नेपालको टिठलाग्दो अवस्थाको तुलना गर्दै खेल पदाधिकारीहरूको नियतमाथि प्रश्न उठाए । उनले भने, ‘हामीभन्दा साना देशहरू आश्चर्यजनक ढंगले खेलिरहेका छन् । हामीजस्तै अल्पविकसित वा विकासशीलमा भर्खर प्रवेश गर्दै गरेका देशहरूले विश्व फुटबलमा तहल्का मच्चाइरहेका छन् । तर विडम्बना, हाम्रो फुटबल भने प्रतिबन्धको अवस्थामा छ ।’

नेपाली फुटबलको सर्वोच्च निकाय एन्फाभित्रको आन्तरिक कलह र बाह्य हस्तक्षेपका कारण सिर्जित फिफा र एएफसीको कडा कदमप्रति लक्षित गर्दै उनले अगाडि थपे, ‘के कारणले नेपाल फुटबल संघमाथि बाह्य हस्तक्षेप भयो ? त्यो हस्तक्षेप आमन्त्रण गर्ने खेल बुझ्नेहरू हुन् कि स्वार्थ बुझ्नेहरू हुन् ? यसको जवाफ खोजिनुपर्छ ।’
खेलकुद क्षेत्रमा राजनीतिकरण र व्यक्तिगत महत्त्वाकांक्षा हाबी हुँदा खेलाडीहरूको भविष्य संकटमा परेको ओलीको विश्लेषण थियो । सबै चिज आफ्नै पोल्टामा पार्न खोज्ने खेल नेतृत्वको संकीर्ण मानसिकताले नै आज नेपाली फुटबल अन्तर्राष्ट्रिय मञ्चमा शिर निहुराउनुपर्ने स्थितिमा पुगेको उनले औँल्याए ।

‘जब नेतृत्वले संस्था र खेलाडीभन्दा माथि उठेर सबै चीज आफ्नै लागि मात्रै गर्न खोज्छ, तब यस्तै दुर्घटना निम्तिन्छ,’ ओलीले स्पष्ट पारे ।

अध्यक्ष ओलीले अब परम्परागत गुटबन्दी र नातावादको भरमा खेलकुद चल्न नसक्ने चेतावनीसमेत दिएका छन् । खेलकुद क्षेत्रलाई खेल भावनाअनुरूप नै अघि बढाउनुपर्नेमा जोड दिँदै उनले अबको नेतृत्व योग्यता, क्षमता र स्वच्छ प्रतिस्पर्धाका आधारमा मात्र चयन गरिनुपर्ने धारणा राखे । खेलकुदको विकासका लागि दलीय भागबन्डाभन्दा माथि उठेर वास्तविक खेलप्रेमी र विज्ञहरूलाई जिम्मेवारी दिनुपर्ने उनको सुझाव थियो ।

यो पनि पढ्नुहोस् : विश्वकप फुटबलः क्यानडाद्वारा दक्षिण अफ्रिका पराजित

लेखकको बारेमा

असल खबरअसल साथी मिडिया प्रा.लि.द्वारा संचालित असल खबर डटकम डिजिटल खबर पत्रिका हो । २०७६ सालबाट नियमित रुपमा विभिन्न समसामयिक खबरहरुको साथै सामाजिक, आर्थिक, राजनीतिक ,खेलकुद ,खोजमुलक सामग्रीहरु पनि सदैव प्रकाशन र प्रसारण गर्दै आइरहेका छौँ । देश तथा विदेशको हरेक कुना-कुनामा रहेका जनमानसमाको हात-हात र नजर-नजरमा सहि र सत्य खबर पुर्याउन हामी कटिबद्ध छौँ ।