Breaking News
‘आईसी डिजाइनर रनवे’ सिजन १३ का लागि २४ मोडल छनौट

काठमाडौँ । १३औँ ‘आईसी डिजाइनर रनवे’का लागि २४ मोडल छानिएका छन् । दरबारमार्गस्थित होटेल याक एन्ड यतिमा आयोजित अडिसनबाट १८ महिला र ६ पुरुष गरेर २४ मोडल छानिएका हुन् ।

अभिनेत्री प्रियंका कार्की, अन्तर्राष्ट्रिय मोडल सविता कार्की, नेक्स्ट मोडल्स नेपालका सिइयो रवि धमला, कर्मसियल फोटोग्राफर राजभाइ सुवाल, मिस्टर नेपाल विजेता समर्पण कार्की, आईसी कलेजकी प्रबन्ध निर्देशक शैलजा अधिकारी र राजश्री थापा लगायतको निर्णयले मोडल छानेका हुन् । छानिएका मोडल आगामी चैत्र १६ (मार्च २९) गते होटेल याक एन्ड यतिमा आयोजना हुने ‘आइसी डिजाइनर रनवे’ नामक फेसन सोमा र्‍याम्पमा प्रस्तुत हुनेछन् ।

‘आइसी डिजाइनर रनवे’ एक उत्कृष्ट फेसन सो हो । विगत धेरै वर्षदेखि नियमित आयोजना हुँदै आएको यो फेसन सोको अबको सिजनमा आइसी कलेजका २०२१ ब्याजका विद्यार्थी डिजाइनरहरूले तयार पारेका फरक फरक पहिरन १५ सिक्वेलमा प्रदर्शन हुनेछ ।

शोमा विभिन्न फरक फरक देशका १२ जना अन्तर्राष्ट्रिय मोडलको पनि सहभागिता रहनेछ । फेसन शोको म्यानेजमेन्ट जिम्मेवारी नेक्स्ट मोडल्स नेपालले लिएको छ । अहिलेसम्मकै उत्कृष्ट फेसनको शोको रुपमा ‘आइससी डिजाइनर रनवे’ १३ आफूले प्रस्तुत गर्ने तयारी गरेको नेक्स्ट मोडल्स नेपालका सिइयो रवि धमलाले जानकारी दिए ।

‘आइसी डिजाइनर रनवे’को मुख्य उद्देश्य नेपाली फेसन डिजाइनरको प्रचारप्रसार गर्दै उनीहरुले डिजाइन गरेका नेपाली फेसनका आकर्षक डिजाइन अन्तर्राष्ट्रिय स्तरमा पुर्‍याउनु रहेको आयोजक आइसी कलेजकी प्रबन्ध निर्देशक शैलजा अधिकारीले जानकारी दिइन् ।

गणेश गुरुङको हङकंग आएर सोल्टिनी सार्वजनिक

काठमाडौँ। बिगत २ दशक देखी नेपाली कल्चरल चलचित्र निर्माण र निर्देशनमा सकृय गणेश गुरुङ (सुबास) ले २०५८ सालमा गुरुङ चलचित्र काशी (कान्छि) मा कलाकार र सह निर्देशकको रुपमा चलचित्र क्षेत्रमा प्रबेश गरी मिह्थेबा ,ङै नासा,भुलिगय पाप लाग्ला ,ङै जिन्दगी,ङै क्या,आस्यो,भेडिगोठाले,कुटुम्बेरी लगायत दर्जनौ गुरुङ समुदायमा आधारित चलचित्र निर्माण निर्देशन गरि सकेका छन् । आफ्नो भाषा संस्कृति को जगेर्णा गर्नुपर्छ भन्ने बिचार राख्नने निर्देशक गुरुङले थुप्रै गुरुङ भाषाको गीतमा समेत संगीत र स्वर दिएका छन् यसैको सिलसिलामा बिदेश पुगेर आफ्नो र गाउँ घरको मौलिकता बिर्सिएर बिदेशी सस्कृतीमा आकर्शित भइ रहेको कथामा आधारित म्युजिक भिडियो हङकंग खसी ङोलोस्यो (हङकंग आएर सोल्टिनी) सार्वजनिक गरेका छन् ।

क्लाईमेक्स आर्टको प्रस्तुती रहेको गीतमा स्वर सुबाश गुरुङ (गणेश) र खुशी गुरुङको रहेको छ। गीतमा सुबाश गुरुङकै शब्द रहेको छ साथै संगीत सम्योजन तेजेन्द्र गुरुङको रहेको छ। हंगकंगका स्थायी वासिन्दा सुबाश गुरुङ्(गणेश) गुरुङ चलचित्र कर्मीहरुको साझा संस्था गुरुङ फिलिम एसोसिएसनका संस्थापक समेत हुन् ।

अगस्त्य मा नाजिरको ५ फरक गेटअप

काठमाडौँ। फागुनको १८ गतेबाट रिलिजमा आउन लागेको चलचित्र ‘अगस्त्यः च्याप्टर १’ को निर्माण पक्षले अभिनेता नाजिर हुसेनको लुक्स सार्वजनिक गर्दै नयाँ पोष्टर सार्वजनिक गरेको छ । सार्वजनिक पोष्टरमा नाजिरको ५ फरक गेटअप प्रस्तुत गरिएको छ ।

नाजिरले चलचित्रमा आफूलाई ५ फरक गेटअपमा प्रस्तुत गरेको यसका लेखक तथा निर्देशक सौरभ चौधरीले जानकारी दिए । नाजिरको गेटअप हेर्दा पनि उनले चलचित्रका लागि निकै मिहिनेत गरेको देखिन्छ । निर्माणपक्षले दिएको जानकारी अनुसार, नाजिरले यो चलचित्रका लागि २० केजी तौल बढाएका थिए । सार्वजनिक पोष्टरमा नाजिरको चलचित्रमा सुरुवातदेखि अन्तिम सम्मको भूमिकालाई प्रस्तुत गरिएको निर्माणपक्षले जानकारी दिएको छ ।

डार्क हर्स इन्टरटेन्मेन्ट र सेभेन सिज इन्टरटेन्मेन्टको प्रस्तुतिमा तयार भएको चलचित्रमा प्रकाश मल्ल, अनिष तामाङ र बिनोद पौडेलको लगानी छ । चलचित्रका कार्यकारी निर्माता विश्व गौचन र अभिषेक चौधरी हुन् । चलचित्रमा सौगात मल्ल, नाजिर हुसेन, मलिका महत, प्रमोद अग्रहरी, विजय बराल, रवीन्द्र झा लगायतका कलाकारको अभिनय छ ।

सातौँ नेपाल अन्तर्राष्ट्रिय चलचित्र महोत्सव (निफ) मा ४० देशका ८८ फिल्म छनोट

काठमाडौं । नेपाल अन्तर्राष्ट्रिय चलचित्र महोत्सव (निफ)ले छनोट फिल्मको ‘लाइनअप’ सार्वजनिक गरेको छ । मंगलबार आयोजित पत्रकार सम्मेलनमा ४० देशका ८८ फिल्म छनोट भएको जानकारी दिइयो । निफको सातौं संस्करण चैत १ देखि ५ गतेसम्म काठमाडौंमा हुँदैछ । क्यूएफएक्सका सिभिल, लबिम, भक्तपुर र छाया सेन्टरमा रहेका मल्टिप्लेक्समा फिल्म देखाइने भएको छ ।

निफमा छनोट भएका फिल्मको लाइनअप हेर्दा थुप्रै फिल्म कान्स, लोकार्नो, बर्लिन लगायतका फेस्टिभलमा स्क्रिनिङ भइसकेका छन् । राष्ट्रिय र अन्तर्राष्ट्रिय गरी दुई भागमा फेस्टिभललाई विभाजन गरिने र फिचर, लघु र वृत्तचित्र विधामा अवार्ड वितरण गरिने उल्लेख छ ।

जसमा १७ फिचर, ५१ छोटा फिल्म र २० डकुमेन्ट्री फिल्म छन् । १४ विधामा पुरस्कार वितरण हुने जनाइएको छ । फिल्म प्रदर्शनसँगै फिल्मका विभिन्न विधासँग सम्बन्धित कार्यशाला, छलफल र अन्तरक्रिया पनि गरिने जनाइएको छ । नेपाल पानोरमा अन्तर्गत नेपाली फिचर फिल्ममा कमल एक्चै मगरको निर्देशनमा बनेको डेसान,झरना थापाको निर्देशनमा बनेको एक भगवत एक गीता,सनोल दास निर्देशित पखेटा र लक्ष्मण सुनार निर्देशित बुलाकी सेलेक्सनमा परेका छन्।

आयोजक नेपाल फिल्म एण्ड कल्चरल एकेडेमीका अध्यक्ष केपी पाठकले फेस्टिभललाई मोफसलमा प्रदेश स्तरमा पनि बिस्तारको तयारी भएको बताए ।अन्तर्राष्ट्रिय प्रतिस्पर्धाअन्तर्गत सर्वोत्कृष्ट हुने फिचर फिल्मलाई १५ सय अमेरिकी डलर राशिको गौतम बुद्ध अवार्ड दिइने भएको छ । राष्ट्रिय तथा अन्तर्राष्ट्रिय फिचर फिल्मबाट एउटालाई ‘चलचित्र समाजहरुको अन्तर्राष्ट्रिय महासंघ, आईएफएफएस डन क्विहोटे अवार्ड’ प्रदान गरिने भएको छ ।

पत्रकार सम्मेलनलाई सम्बोधन गर्दै कलाकार निर शाहले नेपालमा चलचित्र क्षेत्र राष्ट्रिय र उद्योगका रुपमा विकास हुन नसकेको बताएका छन् । उनले नेपालमा अहिलेसम्म पनि चलचित्र नामको कर्म मात्रै रहेको बताए । कलाकार शाहले चलचित्र कर्मलाई दिगो रुपले टेवा दिने उपयुक्त किसिमको पुँजी व्यवस्थापन नहुनु र बजार व्यवस्थापन नहुनु चलचित्र कर्मको सबैभन्दा ठूलो चुनौती रहेको बताए । उनले देशमा नेपाली सिनेमा देखाउने चलचित्र घर नै नरहेको बताए ।

उनले भने, ‘ हामीसँग चलचित्र नामको कर्म छ, तर त्यो उद्योग हुनसक्यो कि सकेन ? त्यसमा अध्ययन गर्न जरुरी छ । हामी राष्ट्रिय चलचित्र उद्योग भन्छौँ, त्यो उद्योग हुनसक्यो की सकेन भन्नेमा विश्लेषणात्मक अध्ययनको जरुरी छ । मेरो विचारमा हुन सकेको छैन । राष्ट्रिय पनि हुन सकेको छैन । उद्योग पनि हुन सकेको छैन । चलचित्र चाहीँ छ । चलचित्र कर्मलाई दिगो रुपले टेवा दिने उपयुक्त किसिमको पुँजी व्यवस्थापन नहुनु र बजार व्यवस्थापन नहुनु आजको हाम्रो चलचित्र कर्मको सबैभन्दा ठूलो चुनौती हो ।’

सिरोसा बनिन् मिसेस नोबेल नेपाल २०२४

काठमाडौं। मिसेस नोबेल नेपाल २०२४ को ताज काठमाडौंकी सिरोसा सापकोटाले पहिरिन सफल भएकी छिन् । ताजसँगै उनले यहि चैतमा इजिप्टमा हुने एन.एफ.इ.ए. अवार्ड २०२४ मा इन्ट्री टिकट समेत प्राप्त गरेकी छिन् । हिमायलन मुभिज प्रोडक्सन हाउसद्वारा आईतबार राजधानीको म्यूजिक सिटी स्टुडियोमा आयोजित कार्यक्रममा शिला श्रेष्ठ फ्स्ट रनर अप र जुना भण्डारी सेकेन्ड रनर अप बन्न सफल भएका छन् ।

चर्चित फेसन कोरियोग्राफर हिमानी सुब्बाको कोरियोग्राफिमा “जती हेर्यो उती राम्रो” बोलको गीतमा ओपनिङ्ग नृत्य गरेका प्रतियोगीहरूले सुब्बाकै कोरियोग्राफिमा दुई साताको प्रशिक्षण पश्चात् स्टेजमा आफूलाई पारङ्गत रुपमा परिचय चरण, प्रश्नोक्तर र क्राउनिङ्ग चरणमा उतारेका थिए । कार्यक्रममा विविध सव–टाईटलहरू समेत वितरण गरिएको थियो जसमा सिरोसा सापकोटा मोस्ट इन्टिलिजेन्ट, शिला श्रेष्ठ मस्ट करिज्म्याटिक, जुना भण्डारी मोस्ट एट्राक्टीभ, रोशनी श्रेष्ठ मोस्ट स्मार्ट, निशा दुवाल मोस्ट डिलिजेन्ट, बुद्धिसरा अर्याल मोस्ट अनेस्ट, सिता राउत मोस्ट प्यासोनेट र रिया दाहाल वेस्ट फोटोजेनिक एवं पब्लिक भिडियो च्वाइस अवार्ड प्राप्त गर्न सफल भएका थिए ।

कार्यक्रमको निर्णायक मण्डलमा अभिनेता तथा चलचित्रकर्मी विशाल विष्ट,मनिष राउत, मिसेस हिमालयन नेपाल–२०२० माया लामा, व्युटिसियन नेपाल २०२१ तथा मोडल मन्जु थापा र मिसेस हिमालयन नेपाल २०२३ अनुषा केसी रहेका थिए । कार्यक्रममा कलाकारहरूले आकर्षक नृत्य समेत प्रस्तुत गरेका थिए । विवाहित महिलाहरूले आफूलाई आफ्नो घरपरिवार, व्यवसाय सम्हाल्दै स्टेज सम्मको यात्रा तय गरी आफूलाई प्रमाणित गर्न सक्छन् भन्ने कुरा दर्शाउन र महिलाहरूमा निहित प्रतिभाको प्रस्फुटन गराउन कार्यक्रमको आयोजना गरिएको आयोजक पक्षले जनाएको छ ।

नीति शाहको डेब्यु चलचित्र ‘खजुरे ब्रो’ (फोटो फिचर)

काठमाडौँ। यस अघि तीन वटा चलचित्रमा अनुबन्धित भएर पनि मोडल नीति शाह नायिका बन्न सकेकी थिईनन् । उनी यतिबेला बल्ल चलचित्रमा नायिका भएकी छिन् । सुरज सुनुवार निर्देशित चलचित्र ‘खजुरे ब्रो’ मा उनी नायिका भएकी हुन् ।

चलचित्रको यतिबेला धमाधम छायाँकन भई रहेको छ। चलचित्रमा नीति संगै रेयर राई,महेश त्रिपाठी,नविन मानन्धर,प्रकाश भुजेल,बिनिता थापा मगर,सुष्मा निरौला, पुस्कर कार्की,मनिष राउत,प्रेम सुब्बा र सुजाता राईको मुख्य भूमिका रहनेछ।


आईडलका पलको स्वर र पाण्डेयको शब्दमा ‘सम्झना’

काठमाडौ । गीतकार दयाराम पाण्डेयको शब्द रचनामा ‘सम्झना’ बोलको नयाँ गीत सार्वजनिक गरिएको छ । इण्डियन आईडल–३ का उपविजेता अमित पलको स्वर रहेको उक्त गीत सोमबार यु ट्युब मार्फत सार्वजनिक गरिएको हो । गायक पलले नेपाली गीत गाउने आफ्नो रहर पूरा भएकोमा खुसी व्यक्त गरेका छन् । कृष रिजालको संगीत रहेको गीतको इजाज अलिले संगीत संयोजन र मिक्सिङ गरेका छन् । सार्वजनिक भिडियोमा सुरेन्द्रमान कार्कीको छायांकन, सम्पादन र कलर ग्रेडिङ रहेको छ ।

विशाल गुरुङले निर्देशन गरेक भिडियोमा मुक्ति उप्रेती र योगिसा महर्जन फिचर्ड छन् । ए.बि. म्यूजिक क्रिएशनको प्रस्तुति यस गीतको रोचक पक्ष यो छ कि यसका रचनाकार दयाराम पाण्डेय काठमाडौ नेपालमा बस्छन्, त्यस्तै गायक अमित पल सिलिगुढी भारतमा बस्छन भने संगीतकार कृष रिजाल कोलोराडो अमेरिकामा बसोबास गर्दै आएका छन् । र यस गीतको रेकर्डिङ स्ट्रिङ्गस् स्टूडियो दार्जिलिङमा गरिएको हो ।