Breaking News
शिभिल बचत तथा ऋण सहकारी संस्थामा पुन: कोईराला 

पोखरा । शिभिल  बचत तथा ऋण सहकारी संस्था लिमिटेडको चौधौं साधारण सभा तथा सातौं अधिवेशन सोमबार पोखरामा सम्पन्न भएको छ । अधिवेशनले बालकृष्ण कोईरालाको अध्यक्षतामा ९ सदस्यीय कार्यसमिति समेत चयन गरेको छ । समितिको उपाध्यक्षमा श्रीमती कविता भुषाल शर्मा, सचिवमा श्री विनोद प्रसाद लामिछाने, कोषाध्यक्ष हरीप्रसाद लामिछाने, सह-सचिव अन्जिता बांस्तोला तथा सदस्यहरुमा  क्रमश : एल के शर्मा , दिपक प्रसाद पौडेल, दान बहादुर के सी, श्रीमती निर्मला कोईराला र लेखासमिती संयोजकमा दिपक भण्डारी, सदस्य शिव प्रसाद लामिछाने र रोज श्रेष्ठ निर्विरोध निर्वाचित भएको निर्वाचन समिति संयोजक नगेन्द्र राज बरालले जानकारी दिनुभयो । 

संस्थाका अध्यक्ष बालकृष्ण कोईरालाको अध्यक्षता तथा  संस्थाका जेष्ठ सदस्य श्रीमती  दमयन्ति तिमिल्सिनाको प्रमुख आतिथ्यतामा सम्पन्न कार्यक्रमा  उपाध्यक्ष कबिता भुषाल शर्माले स्वागत मन्तब्य  तथा सचिव बिनोद प्रसाल लामिछानेले कार्यक्रम संचालन गर्नुभएको थियो । कार्यक्रममा ऋण समिति संयोजक एल के शर्माले संस्थाको सम्पूर्ण गतिविधिबारे प्रकाश पार्दै बजारमा जसरी सहकारीहरु जोखिममा रहेको गुनासोहरु सुनिएको छ तेस्तो हल्लाको पछाडि नलागिकन शिभिल बचत तथा ऋण सहकारीमा निर्धक्क भै  बचत गर्न सम्पूर्ण शेयर सदस्य तथा वचत कर्ताहरुलाई आग्रह गर्नुभएको छ ।

कार्यक्रममा अध्यक्ष, सचिव, कोषाध्यक्ष तथा लेखासमितिको प्रतिवेदन माथि छलफल  गरि सर्वसहमतिमा पारित गरिएको संस्थाका व्यवस्थापक बिष्णु प्रसाद सापकोटाले जानकारी गराउनुभयो ।

पृथ्वी हिरण्य उ.मा.वि. को  ६४ औं वार्षिकोत्सब

पोखरा । बागलुङ नगरपालिका वाड नम्बर १२ मा रहेको पृथ्वी हिरण्य उच्च मा.वि.ले ६४ औं वार्षिकोत्सब एवं अभिभावक दिवस मनाएको छ ।

विविध कार्यक्रम सहित पौष ५ गतेबाट प्रारम्भ भएको वार्षिकोत्सब ९ गते समापन गरिएको प्रअ बुद्धिप्रसाद रिजालले बताउनु भयो । पुर्व शिक्षामन्त्री दिनानाथ शर्माको प्रमुख आतिथ्यतामा सम्पन्न उक्त कार्यक्रममा बागलुङ नगरपालिकाका उपप्रमुख राजु खड्का, बानपा १२ का वडाध्यक्ष कोपिलामणि शर्मा, पुर्व वडाध्यक्ष गुरुदत्त पाठक र नेपाल समाजवादी पार्टीका केन्द्रीय सदस्य चित्र सापकोटाको विशिष्ट उपस्थिति थियो । शिक्षक राजु शर्माको संचालन रहेको कार्यक्रममा शिक्षिका कमला चापागाईं, विद्यार्थी त्रय दिप्ती शर्मा, विवेक आचार्य र सुमिना चापागाईंले स्वागत मन्तव्य राख्नु भएको थियो ।

भुतपुर्व विद्यार्थी एल्मुनाई एसोसिएसनका सदस्य राजन शर्माले विद्यालयको समग्र विकासमा पुर्व विद्यार्थीहरुको साथ सदैव रहने जनाउनु भएको थियो । वार्षिकोत्सबको अवसरमा विद्यालयलाई दीर्घकालसम्म सेवा गर्नुहुने शिक्षक/शिक्षिका पदमनाथ पौडेल र राधिका कँडेल पौडेललाई सम्मान गरिएको थियो । सामाजिक, राजनैतिक र साहित्यिक व्यक्तित्व पुर्व शिक्षामन्त्री दिनानाथ शर्माद्वारा बाबू शशिधर पाध्या र जसोदा पाध्याको स्मृतिमा स्थापित उत्कृष्ट विद्यार्थी सम्मान पुरस्कारद्वारा विभिन्न विधामा उत्कृष्ट अङ्क प्राप्त गरि विद्यालयको गरिमालाई उच्च राख्ने २२ जना विद्यार्थीहरुलाई सम्मान गरिएको वि.व्य.स अध्यक्ष धुर्व बहादुर खत्रीले बताउनुभयो ।

२०५७ सालमा स्थापित उक्त पुरस्कार प्रत्येक शैक्षिकसत्रका २ जना विद्यार्थीलाई पुरस्कृत गर्ने गरिएकोमा २०७८ सालदेखि ३ जना विद्यार्थीलाई प्रदान गर्ने गरिएको थियो । पुरस्कार राशी रु.२००० रहेको छ । कार्यक्रममा बोल्ने वक्ताहरूले विद्यालयलाई यस क्षेत्रको उत्कृष्ट शैक्षिक गन्तव्य निर्माण गर्न लाग्नु पर्नेमा जोड दिनुभयो । विद्यालय स्तरमा रहेका बालबालिकाहरुलाई पढाईका साथमा खेलकुदका क्रियाकलापमा सक्रिय बनाउनु पर्ने कुरा विशिष्ट अतिथी राजु खड्काले बताउनुभयो ।

कार्यक्रममा बोल्दै वडाध्यक्ष कोपिलामणि शर्मा र वि.व्य.स. अध्यक्ष ध्रुवबहादुर खत्रीले नगरपालिकाले लिएको बालमैत्री पालिका घोषणाको उद्देश्यमा सक्रियताका साथ लागिरहेको र विद्यालयको भौतिक, शैक्षिक उन्नतिका लागि कुनै कसर बाकी नराख्ने कुरा उदृत गर्नु भएको थियो ।

महाकालेश्वर “क” टोल विकास संस्थाको अध्यक्षमा घिमिरे

पोखरा । महाकालेश्वर “क” टोल विकास संस्था पोखरा ११ फूलवारीको तेश्रो वार्षिक साधारसभा तथा दोश्रो अधिवेशन शनिबार सम्पन्न भएको छ । अधिवेशनले दामोदर घिमिरेको अध्यक्षतामा ११ सदस्यीय कार्यसमिति समेत चयन गरेको छ ।

समितिको उपाध्यक्षमा रुद्रनाथ घिमिरे, सचिवमा सोमलाल तिवारी, कोषाध्यक्षमा जगन्नाथ बास्तोला, सह-सचिवमा सिता आचार्य, सदस्यहरुमा क्रमश: चेत बहादुर हमाल, विक्रम श्रेष्ठ, दिपेन्द्र ढकाल(राजु), सुशिला घिमिरे, विष्णु बहादुर छेत्री र तुला पुन निर्विरोध निर्वाचित भएका छन। संस्थाका अध्यक्ष कर्नेल डिल्लिराम बास्तोलाको अध्यक्षता तथा पोखरा ११ का जनप्रतिनिधि सुशिल बास्तोलाको प्रमुख आतिथ्यतामा सम्पन्न कार्यक्रममा सचिव सोमलाल तिवारीले कार्यक्रम संचालन गरेका थिए।

उक्त कार्यक्रममा अध्यक्ष, सचिव तथा कोषाध्यक्षको प्रतिवेदन माथि समेत छलफल गरि पारित गरिएको थियो ।

बागलुङ समाज पोखरा बचत तथा ऋण सहकारी संस्थाको अध्यक्षमा आचार्य

पोखरा । बागलुङ समाज पोखरा बचत तथा ऋण सहकारी संस्था लिमिटेडको पाँचौ अधिवेशन शनिबार पोखरामा सम्पन्न भएको छ । अधिवेशनले जयराम आचार्यको अध्यक्षतामा ९ सदस्यीय कार्यसमिति समेत चयन गरेको छ । समितिको उपाध्यक्षमा चेतनारायण सापकोटा, सचिवमा महेन्द्र ढकाल, कोषाध्यक्ष भवानीशंकर शर्मा तथा सदस्यहरुमा क्रमश : प्रमोदनारायण श्रेष्ठ, शेरबहादुर घर्ती क्षेत्री, रमना किरण श्रेष्ठ, यशोधा कँडेल र मेघराज शर्मा निर्विरोध निर्वाचित भएको निर्वाचन समिति संयोजक भानुभक्त कँडेलले बताए ।

संस्थाका अध्यक्ष विष्णुकुमार श्रेष्ठको अध्यक्षता तथा संस्थाका संस्थापक अध्यक्ष अमृतलाल श्रेष्ठको प्रमुख आतिथ्यतामा सम्पन्न कार्यक्रमा उपाध्यक्ष जयराम आचार्यले स्वागत मन्तब्य तथा सचिव विष्णु पौडेलले कार्यक्रम संचालन गरेका थिए। उक्त कार्यक्रममा संस्थाका कानुनी सल्लाहकार डा.भानुभक्त कंडेल बागलुङ समाज पोखराका अध्यक्ष डिल्लि शर्मा , संस्थाका निवर्तमान अध्यक्ष कमला गिरि , सियर सदस्यको तर्फबाट लेखनाथ आचार्य , मेघराज शर्मा लगायतले आ-आफ्नो धारणा राखेका थिए।

कार्यक्रममा अध्यक्ष, सचिव, कोषाध्यक्ष, तथा लेखासमितिको प्रतिवेदन माथी छलफल गरि पारित गरिएको थियो साथै संस्थाले संस्थामा आबद्ध ७० वर्ष भन्दा माथिका ज्येष्ठ सदस्य, शेयर सदस्यबाट उत्कृष्ट बचत कर्ता र कारोबार कर्ता लगायतलाई सम्मान पनि गरेको थियो ।

भानुभक्तलाई विद्यावारिधि

पोखरा । संस्कृत व्याकरणका विशिष्ट अध्येता एवं विन्दुवासिनी संस्कृत विद्यापीठ पोखराको व्याकरण विभागमा प्राध्यापन कार्यमा संलग्न उप प्रा.भानुभक्त आचार्यलाई नेपाल संस्कृत विश्वविद्यालयले सिद्धान्तकौमुदी श्लोक सिद्धान्तकौमुद्योस्समीक्षणात्मकानुशीलनम् शीर्षकका लागि विद्यावारिधि (P.H.D.) उपाधि प्रदान गरेको छ ।

सिद्धान्तकौमुदी भट्टोजिदीक्षितद्वारा विरचित प्रौढ एवं असाधारण ग्रन्थ हो भने श्लोकसिद्धान्तकौमुदी सिद्धान्तकौमुदीलाई विभिन्न शास्त्रीय छन्दमा संस्कार गरी नेपाली विद्वानबाट आधुनिक शिक्षाशास्त्रको शैलीलाई यथासंभव प्रयोग गरी तयार गरिएको विशिष्ट कृति हो । यी दुबै ग्रन्थका विषयवस्तुलाई विशेष अध्ययन , चिन्तन, मनन र अनुसन्धानका साथ छ अध्यायमा विभक्त गराई शोधप्रबन्ध आचार्यले निर्माण गर्नुभएको छ ।

संस्कृत व्याकरणका वैदिक, पौराणिक, आधुनिक परम्परा साथै नेपाली विद्वानहरुले शुरु गरेका संस्कृतमा व्याकरण लेखन परम्पराको समेत अनुशीलन गरी संस्कृत व्याकरणका नवीनतम पक्ष अनुसन्धान ग्रन्थमा समावेश गरिएका छन्।

जलजला-७, धाइरिङ्ग पर्वत स्थायी बसोबास भई हाल पोखरामा रहंदै आउनुभएका आचार्यले प्रारम्भिक शिक्षा फर्से धाइरिङ प्रा.वि. र शालग्राम गण्डकीवेद विद्याश्रम गलेश्वरधाम म्याग्दीबाट ग्रहण गर्नुभएको हो भने उच्चमाध्यमिक शिक्षा जनता विद्यापीठ दाङ्बाट प्राप्त गर्नुभएका आचार्यले शास्त्री एवं आचार्य उपाधि तीनधारा संस्कृत छात्रावासमा रही वाल्मीकि विद्यापीठ काठमाण्डौबाट हासिल गर्नुभएको छ । विद्यार्थी अवस्थादेखि नै संस्कृत व्याकरणमा विशेष अभिरुचि पूर्वक दख्खल राख्दै आउनुभएका आचार्यले सिद्धान्तकौमुदी र मैथिली विद्वान् सुरेश झा द्वारा निर्मित श्लोकसिध्दान्तकौमुदीको समीक्षणात्मक अनुशीलन गरी शोधकार्य सम्पन्न गरि विद्यावारिधि उपाधि प्राप्त गर्नुभएको हो ।

गायिका दिलमाया खातीको निधन

काठमाडौं । नेपाली सुगमसंगीतकी चर्चित गायिका दिलमाया खातीको निधन भएको छ । दमबाट पीडित ८४ वर्षीया खातीको गएराति निधन भएको पारिवारिक श्रोतले जानकारी गरायो । दार्जिलिङमा जन्मिएकी उनले ‘बिछोडको पीडा नसकी खप्न दशैंको बेलामा,’ ‘सम्झेर बुझेर दिइहाल त्यो जोवन,’ ‘खोलाको दुई किनार भो तिम्रो र मेरो पिरती’ लगायतका एक सयभन्दा बढी गीतहरु गाएकी छन् ।