Breaking News
डा. बरालको “माया सिम्ले छौ कि जल्किनी” गीतको म्युजिक भिडियो आउँदै


काठमाडौं । लेखक डा. खगराज बरालको शब्दमा लोक लयमा आधारित आधुनिक गीत “माया सिम्ले छौ कि जल्किनी” छिटै सार्वजनिक हुने तयारीमा रहेको छ ।

युवा वयका दुई मायालु जोडी बिच पिरतीले भरिएको यो गीतमा राजन बरालले सङ्गीत भरेका छन् । मनोहर सुनामको एरेन्ज रहेको यस गीतमा लोकप्रिय गायिका रचना रिमाल र नवोदित गायक राजन बरालको स्वर रहेको छ । मुनलाइट इन्टरनेसनल मिडिया प्रा.लि. ले निर्माण गरेको म्युजिक भिडियोश्याम ढकालको निर्देशनमा तयार भएको हो ।नगरकोट र साँखुको प्राकृतिक दृश्यमा छायाङ्कन गरिएको यस म्युजिक भिडियोको छायाङ्कन कृष्ण महराले गरेका छन् ।

यस म्युजिक भिडियोमा सन्तोषकुमार दाहाल र देवी त्रिपाठीको अभिनय देख्न सकिन्छ । यो म्युजिक भिडियो बडा दशैंको शुभकामना सहित मुनलाइट इन्टरनेसनल मिडिया प्रा.लि.को अफिसियल युट्युब च्यानल मुनलाइट मिडिया(@moonlightmedia3548) बाट सार्वजनिक हुनेछ ।

भानुभक्तलाई विद्यावारिधि

पोखरा । संस्कृत व्याकरणका विशिष्ट अध्येता एवं विन्दुवासिनी संस्कृत विद्यापीठ पोखराको व्याकरण विभागमा प्राध्यापन कार्यमा संलग्न उप प्रा.भानुभक्त आचार्यलाई नेपाल संस्कृत विश्वविद्यालयले सिद्धान्तकौमुदी श्लोक सिद्धान्तकौमुद्योस्समीक्षणात्मकानुशीलनम् शीर्षकका लागि विद्यावारिधि (P.H.D.) उपाधि प्रदान गरेको छ ।

सिद्धान्तकौमुदी भट्टोजिदीक्षितद्वारा विरचित प्रौढ एवं असाधारण ग्रन्थ हो भने श्लोकसिद्धान्तकौमुदी सिद्धान्तकौमुदीलाई विभिन्न शास्त्रीय छन्दमा संस्कार गरी नेपाली विद्वानबाट आधुनिक शिक्षाशास्त्रको शैलीलाई यथासंभव प्रयोग गरी तयार गरिएको विशिष्ट कृति हो । यी दुबै ग्रन्थका विषयवस्तुलाई विशेष अध्ययन , चिन्तन, मनन र अनुसन्धानका साथ छ अध्यायमा विभक्त गराई शोधप्रबन्ध आचार्यले निर्माण गर्नुभएको छ ।

संस्कृत व्याकरणका वैदिक, पौराणिक, आधुनिक परम्परा साथै नेपाली विद्वानहरुले शुरु गरेका संस्कृतमा व्याकरण लेखन परम्पराको समेत अनुशीलन गरी संस्कृत व्याकरणका नवीनतम पक्ष अनुसन्धान ग्रन्थमा समावेश गरिएका छन्।

जलजला-७, धाइरिङ्ग पर्वत स्थायी बसोबास भई हाल पोखरामा रहंदै आउनुभएका आचार्यले प्रारम्भिक शिक्षा फर्से धाइरिङ प्रा.वि. र शालग्राम गण्डकीवेद विद्याश्रम गलेश्वरधाम म्याग्दीबाट ग्रहण गर्नुभएको हो भने उच्चमाध्यमिक शिक्षा जनता विद्यापीठ दाङ्बाट प्राप्त गर्नुभएका आचार्यले शास्त्री एवं आचार्य उपाधि तीनधारा संस्कृत छात्रावासमा रही वाल्मीकि विद्यापीठ काठमाण्डौबाट हासिल गर्नुभएको छ । विद्यार्थी अवस्थादेखि नै संस्कृत व्याकरणमा विशेष अभिरुचि पूर्वक दख्खल राख्दै आउनुभएका आचार्यले सिद्धान्तकौमुदी र मैथिली विद्वान् सुरेश झा द्वारा निर्मित श्लोकसिध्दान्तकौमुदीको समीक्षणात्मक अनुशीलन गरी शोधकार्य सम्पन्न गरि विद्यावारिधि उपाधि प्राप्त गर्नुभएको हो ।