Breaking News
ओएसआरका संचालक अग्रवाल हिरासतमुक्त

काठमाडौं । चलचित्र ‘प्रसाद २’का निर्माताको उजुरीपछि पक्राउ परेका ओएसआर डिजिटलका संचालक ओम प्रकाश अग्रवाल आइतबार बेलुका हिरासतमुक्त भएका छन् ।

काठमाडौं प्रहरी परिसरका अनुसार प्रहरीले खोजेको बेला उपस्थित हुने हाजिर जमानिको सर्तमा उनलाई छाडिएको हो । प्रहरीले अग्रवालका कानून व्यवसायी आशिष श्रेष्ठ वैद्यको जिम्मा जमानिमा छाडेको जनाएको छ ।

शुक्रबार पक्राउ परेका अग्रवाललाई प्रहरीले आइतबार दिउँसो म्याद थपका लागि जिल्ला अदालतमा उपस्थित गराएको थियो । पक्राउ परेको मितिदेखि चार दिन लागू हुने गरि उनको म्याद थपिएको थियो ।

अदालतमा पेश गर्नुअघि प्रहरीले अग्रवालसँग बयान समेत लिएको थियो । ‘प्रसाद २’का निर्माताहरु सुदर्शन बस्नेत र ज्याक श्रेष्ठले आफूहरुको मञ्जुरीबिना स्वदेश तथा विदेशमा फिल्म प्रसारण गरि आफूहरुलाई १ करोड ५० लाख रुपैयाँ आर्थिक नोक्सानी पुर्‍याएको भन्दै ठगी आपराधिक विश्वासघात अन्तर्गत उजुरी दिएका थिए ।

उनीहरुले उजुरीमा अग्रवालसहित फिल्म निर्देशक सुदर्शन थापा र सम्पादक मिलन श्रेष्ठलाई प्रतिवादी बनाएका थिए । निर्देशक थापा र सम्पादक श्रेष्ठविरुद्ध प्रहरीले पक्राउ पूर्जी जारी गरेको छ ।

सुदर्शन थापाविरुद्ध पक्राउ पुर्जी जारी भएपछि पत्नी सुप्रिया कटवालको आक्रोश : कुरीकुरी नेपाल सरकार

काठमाडौं, २१ असोज । चलचित्र क्षेत्रमा यतिवेला एकले अर्कोलाई पक्राउ गर्ने क्रम सुरु भएको छ । पछिल्लो समय अभिनेता अनमोल केसी पक्राउ परेसँगै चलचित्र क्षेत्रको विवाद छताछुल्ला भएको छ । अनमोललाई पक्राउ गराएका चलचित्र निर्माता तथा निर्देशक सुदर्शन थापा पनि अहिले कानूनी उल्झनमा परेका छन् । थापाविरुद्ध अहिले पक्राउ पुर्जी जारी भएको छ ।

सो कुरा थापाकी पत्नी सुप्रिया कटवालले नै खुलासा गरेकी छिन् । उनले न्यायालयको त विश्वास नभएको भन्दै अरु कसको विश्वास रह्यो र ? भन्दै प्रश्न गरेकी छिन् । चलचित्र प्रसाद–२ प्रकरणमा थापाविरुद्ध पक्राउ पुर्जी जारी भएको बुझिएको छ । सो प्रकरणमा यसअघि नै ओएसआर डिजिटलका ओम प्रकाश अग्रवाल पक्राउ परिसकेका छन् । उनलाई चार दिन थुनामा राखेर अनुसन्धान गर्न काठमाडौं जिल्ला अदालतले अनुमति दिएको छ ।

यही प्रकरणमा सुदर्शन थापाविरुद्ध पनि पक्राउ पुर्जी जारी भएको छ । थापा भने अहिले सम्पर्कविहीन रहेको बताईएको छ । उनकी पत्नी सुप्रियाले भने फेशबुकमा यस्तो लेखेकी छिन्-

यो देशमा पहुँच छ भने जे गरेपनी चल्दो रहेछ । प्रहरीले जाहेरीमा समेत प्रमाण नदेखेपछि डाइरेक्ट सरकारी वकिल बाट गएर राजनीतिक पहुँचका भरमा पक्राउ पुर्जी जारी गर्ने ? न्यायालय को त बिश्वास छैन कस्को बिश्वास रहयो र ? पारिश्रमिकमा काम गर्ने निर्देशक/सम्पादक र आफ्नो लगानिले डिजिटल राईट्स लिने कम्पनी संचालक जस्ता निर्दोष मान्छेलाई फसाउने यार सक्छौ भने मुख्य नाइकेलाई अगाडी ल्याउ म साथ दिन्छु । राजनीतिक शक्तिको चरम दुरुपयोग
कुरिकुरी नेपाल सरकार
प्रसाद-२ प्रकरण

प्रस्तावित विधेयकमा चलचित्रकर्मीको असन्तुष्टि

काठमाडौँ, २१ असोज । ‘चलचित्रसम्बन्धी कानुनलाई संशोधन र एकीकरण गर्न बनेको विधेयकको मस्यौदा २०८०’ का केही बुँदाहरूमा असहमति रहेको चलचित्रसँग सम्बन्धित सङ्घसंस्थाले निष्कर्ष निकालेका छन् ।

नेपाल चलचित्र निर्माता सङ्घको नेतृत्वमा चलचित्र निर्देशक समाज, चलचित्र सङ्घ, कलाकार सङ्घ, प्राविधिक सङ्घलगायत आठ संस्थाले प्रस्तावित विधेयकमा रहेका त्रुटि र असहमतिका विषयमा चलचित्र विकास बोर्डका अध्यक्ष भुवन केसीको ध्यानाकर्षण गराउँदै आफ्नो असहमतिबारे जानकारी गराएका छन् ।

प्रस्तावित विधेयकलाई स्वीकार गर्न नसकिने निष्कर्षसहित असहमतिका बारेमा जानकारी गराइएको निर्माता सङ्घका अध्यक्ष नवल खड्काले बताए । “चलचित्रकर्मीको सहमति, सहभागिता, भावना र पेसागत सुरक्षाको प्रत्याभूतिबिना परिकल्पना गरिएको यो विधेयक अघि नबढाउन माग गरेका हौँ”, उनले भने, “बोर्डको स्वायत्ता भन्दा बाहिर गएर बनाइएको विधेयकले चलचित्र क्षेत्रलाई कुनै फाइदा पुग्दैन ।”

आफ्नो असहमतिका विषयमा जानकारी गराइएपछि सकारात्मक संवाद भएको कलाकार सङ्घका अध्यक्ष मोहन निरौलाले जानकारी दिए । उनले भने, “छलफल र कुराकानी सकारात्मक भएको छ । हामीले असहमति जनाएको विषय सम्बोधन हुनेमा आशावादी छौँ ।” चलचित्र विकास बोर्डले विधेयकको मस्यौदा वेबसाइटबाट सार्वजनिक गर्दै सुझावसमेत मागेको थियो । रासस

अनमोललाई थुनाएका सुदर्शन थापाविरुद्ध पनि उजुरी, अहिले सम्पर्कबाहिर

काठमाडौं, २१ असोज । अभिनेता अनमोल केसीलाई थुनाएका निर्माता तथा निर्देशक सुदर्शन थापाविरुद्ध पनि उजुरी परेको छ। उनीविरुद्ध चलचित्र निर्माता सुदर्शन बस्नेतले उजुरी दिएको बताईएको छ । अहिले थापा सम्पर्कविहीन भएका छन् ।

यसअघि चलचित्र रावायणको लागि अनुवन्ध भएर १० लाख रुपैयाँ अग्रिम बुझेको र पछि चलचित्रमा काम नगरेको आरोपमा थापाले अनमोल केसीलाई पक्राउ गराएका थिए । प्रहरीले केसीलाई हाजिरी जमानीमा रिहा गरेको छ ।

चलचित्र प्रसाद–२ का निर्माण पक्षले यसअघि ओएसआर डिजिटलका प्रमुख ओमप्रकाश अग्रवाललाई पनि पक्राउ गराईसकेको छ । अदालतले अग्रवाललाई चार दिन हिरासतमा राखेर अनुसन्धान गर्न प्रहरीलाई अनुमति दिएको छ ।