Breaking News
मुकुन र लक्ष्मीको चलचित्र ‘बिच्छेद’ को पहिलो गीत सार्वजनिक (भिडियो)

काठमाडौँ। मुकुन भुसाल र लक्ष्मी बर्देवा स्टारर नेपाली चलचित्र ‘बिच्छेद’को पहिलो गीत सार्वजनिक गरिएको छ । मङ्सिर ८ बाट प्रदर्शनमा आउने चलचित्रको ‘गाजले’ बोलको गीत सार्वजनिक गरिएको हो। ‘गाजले’ शीर्षकको गीतमा राम अविरल बिस्टको शब्द रचना, एसडी योगीको सङ्गीत तथा योगी र ऋतिका श्रेष्ठको स्वर रहेको छ । चलचित्रका प्रमुख कलाकारहरू मुकुन भुसाल र लक्ष्मी बर्देवा फिचर्ड गीतमा प्रेम भाव प्रकट गरिएको छ । यसका कोरियोग्राफर सुरेन बसेल हुन् ।

यसअघि मुकुन र लक्ष्मीले चलचित्र ‘बुलबुल’मा एकसाथ अभिनय गरेका थिए । अभिनयमा यी दुवै कलाकार उम्दा मानिन्छन् । नेपाल रिलिजसँगै अन्य विभिन्न मुलुकहरूमा समेत एकसाथ प्रदर्शनको तयारी भइरहेको निर्देशक सत्यराज चौलागाईंले बताए । यो चलचित्रका निर्माताहरू राज कुमार पण्डित, दिमेश श्रेष्ठ सुवास राई र सावित्री बज्राचार्य हुन् । सह निर्माता प्रबिन राजथला हुन् ।

अभिनेता मुकुन भुसालले लेखेको कथामा निर्देशक चौलागाईँले पटकथा लेखेका छन् । गाउँले परिवेशमा आधारित रहेको यो चलचित्रको छायाङ्कन रामेछापको एक गाउँमा गरिएको छ । मुकुन र लक्ष्मीका अलावा यस चलचित्रमा सुष्मा निरौला, प्रिया रिजाल, लय सङ्ग्रौला, हिउँवाला गौतम, सरिता राजोपाध्याय, लक्ष्मीनाथ तिमिल्सिना, जीवन थापा, जयराम सापकोटा लगायतका कलाकारहरूको अभिनय रहेको छ । चलचित्रमा सङ्कल्प भुजेलको छायाङ्कन, भूपेन्द्र अधिकारीको सम्पादन रहेको छ भने समीर मियाको भिएफएक्स, किरण तुलाधरको ब्याकग्राउन्ड स्कोर र रेनिश फागोको कलर ग्रेडिङ रहेको छ ।

चलचित्रका गीतमा एसडी योगी, सुरज थापा र आशिश महरको सङ्गीत, सत्यराज चौलागाईँ र राम अविरल विष्टको शब्द रचना रहेको छ भने एसडी योगी, सुनिता थेगिम, हृतिका श्रेष्ठ, सुरज थापा र आशिश महरको स्वर रहेको छ । सुरेन बसेल कोरियोग्राफर हुन् । चलचित्रलाई काठमाडौँ उपत्यकामा रिच इन्टरटेन्मेन्ट र उपत्यका बाहिर एफडी कम्पनीले वितरण गर्दैछन् ।

कस्तो छ पशुपति प्रसाद २ भष्मे डन ? दर्शक भन्छन् – रुने पनि हाँस्ने पनि एकैपटक भयो

सात बर्ष अघि निर्देशक दिपेन्द्र के खनालले पशुपति प्रसाद निर्देशन गरेका थिए । त्यस बेला देखि नै यो फिल्मले दर्शकहरूमाझ निकै कौतूहलता निर्माण गर्न सफल भएको थियो । उनै निर्देशक खनालले सात बर्षपछि सिक्वेलका रुपमा पशुपति प्रसाद २ भष्मे डन लिएर आएका छन् ।

‘भष्मे डन’ले दशैं बक्स अफिसमा उत्साहजनक ओपनिङ गरेको छ । शनिबार देशब्यापी रिलिज भएको फिल्मका शोज खचाखच छन् । दोस्रो दिन आइतबार पनि फिल्म घरेलु बक्स अफिसको शीर्षस्थानमा छ । देशभर शतप्रतिशत अकुपेन्सी कायम गरेको फिल्मलाई झन्डै साढे २ करोड बराबरको ओपनिङ मिलेको छ । निर्माण कम्पनी टुकी आर्ट्सले सार्वजनिक गरेको एक पोस्टरमा पहिलो दिने कमाई २ करोड ४० लाख उल्लेख छ ।

फिल्म हेरेका प्रायः दर्शकले निर्देशक र निर्मातासँग ‘पशुपति प्रसाद ३’को डिमाण्ड गरेका छन् । यो फिल्ममा समाजको नाटकीय शैलीमा एउटा सुशासनको प्रत्याभूत गर्न नसकेको कुरा उठाउन खोजिएको छ । हरेक मान्छेमा समस्या मात्रै होइनन् प्रणालीबाट हैरान भएको कुरा समेत प्रस्तुत गर्न खोजिएको छ । जुन माहौल बनाएर हलसम्म दर्शक तान्न निर्माण टिम सफल भयो, त्यसरी नै हलसम्म पुगेका दर्शकलाई सन्तुष्ट बनाउन सफल देखिएको छ ।

विश्वभर विपत् जस्तो महामारी रुपमा फैलिएको कोरोना प्रकोपबाट धेरै देशहरु आक्रान्त भएका थिए । यसको चपेटामा समेत नेपाल परेको थियो । यस अघि प्राकृतिक विपत भुकम्प जसबाट त नेपालमा धेरैेले जनधनको क्षति बेहोर्नु परेको थियो । कतिले ज्यान गुमाए त कतिले धन । यस्ता प्रकोप र महामारीबाट धेरै नै मानिसहरु फलिफाप भएका थिए ।

यस्तै अवस्थाबाट सिर्जना भएको फिल्म हो पशुपति प्रसाद २ भष्मे डन । फिल्म पशुपति प्रसाद २ भष्मे डनको पात्र भष्मे डनलाई सम्पन्नशाली बनाएको छ । जसलाई कोरोनाले लखपति बनाएको देखाइन्छ । पशुपतिप्रसादमा ’भष्मे डन’को चरित्र सम्झँदै उत्साहित भएर हल पुगेका दर्शक उनीबाट निकै सन्तुष्ट लिइरहेका छन् ।

फिल्म पशुपति प्रसादमा भष्मेको थोरै पृष्ठभुमि थियो । पहिलो फिल्ममा पशुपतिप्रसादको दुखद अन्त्यसँगै अहिले भष्मेमा आएको परिर्वतनबाट दर्शक मज्जा लिइरहेका छन् । यहाँ मुगुमा जन्मिएको, बाउ आमाले संस्थालाई जिम्मा लगाएर पठाएको र संस्थाले पढाउन त बोर्डिङ मै पढायो तर जेलमा जस्तै राखिदिएको भनिन्छ । संस्थामा बस्दा कतिपय साथीलाई विदेशी खैरेले लगेको भनिन्छ, यता, भष्मे भने मासुभात खाएर भाग्ने तयारीमा थियो । त्यहि समयमा भुइँचालो आयो, र उ जिउँदै आर्यघाटमा पुग्यो र बाँचेको देखाइन्छ । फिल्मको कथा पनि यहि पृष्ठभुमिबाट अगाडी बढेको छ ।

दर्शकलाई सिक्वेलमा सन्तुष्ट बनाउन सात बर्षमा भष्मेको चरित्रमा केही कुराहरुको परिवर्तन आएको छ । पशुपति प्रसाद खकुरेलको मितबा अब उसका बा भएका छन् । क्याण्डी क्रस खेल्ने भष्मे अब पब्जी खेल्न सुरु गरेको छ । बितेका यी सात बर्षमा भष्मेमा आएको गज्जबको परिवर्तन देख्न सकिन्छ । सँगै कालीप्रसाद नागाको चरित्रमा सौगात मल्ल र मैनाको चरित्रमा स्वस्तिमा खड्का थपिएका छन् ।

भष्मेको दाँत सुनको बनेका छन् । अब उसलाई लावारिस भन्ने शब्दका कारण रिस उठन थालेको छ । उसलाई अब जसरी हुन्छ बाबुआमा भेट्नुछ । नागरिकता बनाउनुछ र आफै ठेक्कापट्टाको काम गर्नु छ ।

पशुपति प्रसादलाई देखिनसक्ने त्यहि भष्मे डन अहिले भुवन बहादुरको नाममा नागरिकता बनाउन दौडधुप गरिरहेको देखाइन्छ । आफ्नो चरित्रमा विपिनले सक्दो मिहिनेत गरेका छन् । पहिलो हाफमा उनका केही संवादहरुले दर्शकलाई हसाउँछ ।
पशुपति प्रसादको निधन भएको सात बर्षपछि उसँग पंगा लिन आउने कालीप्रसाद उर्फ नागा (सौगात मल्ल) ।

नकारात्मक पात्रबाट असल पात्रमा परिवर्तन भएका भष्मेको चरित्रमा ‘व्रत बसेको छु नत्र’ भन्ने डायलगले दर्शकदिर्घाबाट तालीको वााही लिन सफल छन् ।

कालीप्रसाद उर्फ नागा (सौगात मल्ल) को अभिनय मौलिक छ । सौगात मल्लले मधेशीको चरित्रलाई आफ्नो पक्षबाट न्याय गरेका छन् । उनको लवाई अनि बोलाईले उनी गैर मधेशी हुन् है भन्ने छनक समेत दिएको छैन । नागा रुँदा दर्शक सँगै रुन्छन्, हाँस्दा सँगै हाँस्छन् ।

फिल्ममा एक दृष्य छ, जहाँ संवादमै भनिएको हुन्छ, छ्या ! कस्तो रुने पनि हाँस्ने पनि एकै पटक भयो । फिल्म पनि यहि संवाद जस्तै बनेको छ, कतै रुवाउने र फेरि रुवाउँदा रुवाउँदै हँसाउने ।

‘भष्मे डन’को शनिबारको व्यापार २ करोड ५० लाख

काठमाडौं, ५ कार्तिक । बडादशैंको फूलपातीको अवसर पारेर हिजो शनिबारबाट प्रदर्शनमा आएको फिल्म ‘पशुपति प्रसाद २: भष्मे डन’ले पहिलो दिनमै बक्सअफिसमा बम्पर व्यापार गरेको छ ।

प्राप्त जानकारी अनुसार फिल्मले हिजो शनिबार मात्रै २ करोड ५० लाख हाराहारीमा व्यापार गरेको बुझिएको छ । फिल्म निर्माण टिमले यसको आधिकारिक विवरण सार्वजनिक गर्ने तयारी पनि गरिरहेको छ ।

यो फिल्म नेपालका तीन सयबढि स्क्रिनबाट प्रदर्शनमा आएको थियो । ‘फिल्मको हिजो राती १० बजेसम्मका शोहरुमा दर्शकको उच्च चाप देखिन्थ्यो । बेलुकाको सम्पूर्ण जानकारी नआइसकेकाले प्राप्त हुनसाथ छिटै व्यापारिक विवरण सार्वजनिक वितरक करण श्रेष्ठले बताए ।’

शनिबार बिहानी बाटै धेरै जसो शो ‘सोल्डआउट’ भएका थिए भने कतिपय हलमा दर्शकको उल्लेख्य भिड देखिएको थियो । फिल्मले दशैंको एक साताको लामो बिदा भएकाले बक्स अफिसमा सुनामी ल्याउने आकलन सुरुवात देखिनै गरिँदै आएको थियो ।

हिजो फिल्म हेर्ने दर्शकहरूले पनि फिल्मलाई राम्रो प्रतिक्रिया दिइरहेका छन् । फिल्मले अझ राम्रो वर्ड अफ माउको साथ पाउन सफल देखिएको छ । निर्देशक दिपेन्द्र के खनालले शनिबार फिल्मलाई मिलेको समर्थन अपेक्षाकृत नै भएको बताएका छन् ।

फिल्मको निर्माण टिम हिजो शनिबार बिहानी शोबाट नै कलाकार विपिन कार्की, सौगात मल्ल, स्वस्तिमा खड्का, लेखक तथा निर्माता खगेन्द्र लामिछाने र निर्देशक खनाल दिनभर राजधानीका विभिन्न हलमा पुगेर दर्शकसँग साक्षात्कार गरेका थियो ।