Breaking News
कोलकाताको डेल्फिक सांस्कृतिक सम्मेलन नेपाली ढाका टोपीमय

काठमाडौँ। भारतको कोलकातामा अन्तर्राष्ट्रिय डेल्फिक सांस्कृतिक सम्मेलन सम्पन्न भएको छ । अन्तर्राष्ट्रिय डेल्फिक काउन्सिलको आयोजना तथा इन्डियन डेल्फिक काउन्सिल र वेस्ट बङ्गाल डेल्फिक काउन्सिलको सहकार्यमा अक्टोबर १२ देखि १४ सम्म भएको सो सम्मेलनमा नेशनल डेल्फिक काउन्सिल नेपालले पनि सहभागिता जनाएको छ ।

सम्मेलनमा सहभागी नेपाल डेल्फिकका अध्यक्ष श्रीदेव बिएलले नेपालको कला, संस्कृति, भाषा तथा कलाका विविध आयामहरूका बारेमा विश्वभरका डेल्फियनहरूमाझ प्रवर्धन गरेको बताए । सो अवसरमा विश्वभरका कला तथा संस्कृति अभियन्ताहरूलाई नेपालको भौगोलिक विविधतासँगै सांस्कृतिक विविधताको बारेमा पनि विशेष समय लिएर जानकारी गराएका थिए । नेपाल डेल्फिकको तर्फबाट नेपालको कला, संस्कृति, प्रमुख चाडपर्वहरू, प्रचलनहरू तथा संस्कारहरूका बारेमा प्रस्तुतिसहित नेपालको परिचय दिइएको थियो । नेपाल डेल्फिकका अध्यक्ष बिएलले सम्मेलनमा सहभागी सबैलाई नेपालको मौलिक ‘नेपाली ढाका टोपी’ र रुद्राक्ष लगाइदिई यसको महत्वबारे प्रकाश पारेका थिए । सो अवसरमा इन्डियन डेल्फिक काउन्सिलका तर्फबाट नेपाल डेल्फिकलाई सिद्धार्थ गौतम बुद्धको पेन्टिङ प्रदान गरिएको थियो । पेन्टिङ प्रदान गर्दै ज्ञानको खोजीमा पहिले नेपालबाट भारत आएका गौतम बुद्ध अब नेपाल फर्किन लागेको बताइएको थियो ।

सो सम्मेलनमा अन्तर्राष्ट्रिय डेल्फिक काउन्सिलका महासचिव रमेश प्रसन्ना सहित जर्मनी, संयुक्त राज्य अमेरिका, बेलायत, ग्रिस, क्यानडा, फिलिपिन्स, मलेसिया, फ्रान्स, बङ्गलादेश, इन्डोनेसिया, इटाली, अस्ट्रेलिया, टर्की लगायत भारतका सबै राज्य काउन्सिलका सदस्यहरू, भारतका सरकारी उच्च पदाधिकारीहरू, भारतका लागि विभिन्न देशका राजदूतहरू, तथा स्थानीय एवम् बलिउडका चलचित्रकर्मीहरू र सङ्गीतकर्मीहरूको उपस्थिति थियो । सो सम्मेलनमा वेस्ट बङ्गाल सरकारले सहकार्य गरेको थियो । सरकारका तर्फबाट वेस्ट बङ्गालका विधायक तथा अभिनेता मदन मित्राले सम्पूर्ण डेल्फियनहरूलाई सत्कार गरेका थिए । नवरात्रीको समयमा वेस्ट बङ्गालमा हुने विशेष दुर्गा पूजाको विश्वव्यापी प्रवर्द्धन गर्ने उद्देश्यले तथा पर्यटन प्रवर्द्धनका लागि त्यहाँको राज्य सरकारले यो सम्मेलनको आयोजना सहकार्य गरेको थियो ।

अन्तर्राष्ट्रिय डेल्फिक काउन्सिलले विश्वभरि सांस्कृतिक र कलात्मक गतिविधिहरूलाई प्रवर्द्धन र संरक्षण गर्दछ। यसले कलासँग सम्बन्धित प्राचीन तथा नयाँ आयामका खेलहरूको प्रतियोगिताहरू आयोजना गर्नुका साथै चलचित्र, सङ्गीत तथा कलाका विभिन्न आयामहरूको खोजी र प्रवर्द्धनमा कार्य गर्दछ । डेल्फिक काउन्सिल नेपालसहित विभिन्न १५० भन्दा धेरै देशहरूमा सक्रिय छ ।

निश्चल बस्नेत निर्देशित ‘दिमाग खराब’को ट्रेलर सार्वजनिक

काठमाडौँ। निश्चल बस्नेतको प्रतिक्षित चलचित्र ‘दिमाग खराब’को ट्रेलर सार्वजनिक गरिएको छ । सार्वजनिक ट्रेलरले एक भूईमान्छे कसरी देशमा नियम कानुनका बाबजुत मुठ्ठीभरका भ्रष्ट सत्ताधारीबाट शोषित र पीडित छन् भन्ने विषयको नेपथ्यमा उसले सोका विरुद्ध गर्ने संघर्षको कथा पेस गर्छ ।

झण्डै आधा दर्जन बढी चलेका कलाकारको अभिनय रहेको चलचित्रको ट्रेलरले दर्शकलाई फरक सिनेमा पस्कने संकेत गरेको छ ।

सिनेमा आर्ट्स र ब्ल्याक हर्स पिक्चर्सको निर्माण रहेको चलचित्रमा खगेन्द्र लामिछाने, दयाहाङ राई, स्वस्तिमा खड्का, अपर्ण थापा, विजय बराल, सुमन कार्की, पुष्कर गुरुङ, माओत्से गुरुङ, राजन खतिवडा, रमा थपलिया, गौरभी आरएल सिंह, गीत अधिकारी, कृष्णभक्त महर्जन, धीरज भट्ट, राहुल सिवाकोटी, नविन खड्कालगायतको पनि अभिनय छ । निर्देशक निश्चल बस्नेत र अभिनेत्री सुपुष्पा भट्ट पनि चलचित्रको एक गीतमा विशेष भुमिकामा देखिएका छन् ।

आकाश बरालको लेखन र मनोज पण्डित स्क्रिप्ट डाक्टर रहेको सिनेमा राजनीतिक विषयमा केन्द्रित रहेर निर्माण भएको हो । तिहारको अवसर पारेर आगामी कार्तिक २४ गतेबाट प्रदर्शनमा आउने चलचित्रमा रौनक विक्रम कँडेल निर्माता र सुरज बम ठकुरी कार्यकारी निर्माताको रुपमा रहेका छन् ।

चलचित्रमा सुसन प्रजापतिको छायांकन, निमेष श्रेष्ठको सम्पादन, जयन के बाइबा र बाबुल गिरीको संगीत, राजकुमार उप्रेतीको द्वन्द्व निर्देशन तथा रोहित शाक्यको ब्याकग्राउन्ड स्कोर छ ।

सुदूरपश्चिमको सबैभन्दा अग्लो हिमशृङ्खला अपी हिमालमा छायाङ्कन गरिएको भिडियो सार्वजनिक

काठमाडौँ। दार्चुला जिल्लामा पर्ने सुदूरपश्चिमको सबैभन्दा अग्लो हिमशृङ्खला अपी हिमालमा पहिलो पटक छायाङ्कन गरिएको म्युजिक भिडियो ‘आए म त ‘सार्वजनिक गरिएको छ । मौसमका कारण धेरै एडभेन्चर शो हरुले समेत छायांकन गर्न नसकेको करिब ७,१३२ मिटर उचाई रहेको हिमालको बेस क्याम्पमा भिडियोको टिम पुर्याएर कलाकार एबम निर्देशक राजु भट्टले भिडियो सुटिङ गरेका हुन् । काठमाण्डौको बसन्तपुर देखि दार्चुलाको अपी हिमाल सम्मको दृश्यहरु समेटेर तयार पारिएको भिडियो निर्माण गर्न २ हप्ता लागेको निर्देशक भट्टले जानकारी दिए ।

धनगढीकी स्थानिय कलाकार बोन्दिता धामी र दार्चुला अपीका स्थानियको साथमा राजु भट्टको अभिनय रहेको भिडियोले नेपालको प्राकृतिक सौन्दर्यतालाइ एउटा दरिलो श्रब्य दृश्य मार्फत प्रस्तुत गरेको छ । २ युवा सिनेमाटोग्राफर केशव पाण्डे र निर्देशक भट्टको एउटा अथक मेहनतबाट तयार भिडियो हेर्दा दार्चुलाको अपी क्षेत्र लगायत समग्र नेपालको पर्यटनकोक्षेत्रको लागि एउटा कोसे ढुंगाको काम गर्ने देखिन्छ।

संसारभर नै पछिल्ल्लो समय युवाहरुको रोजाईमा एडभेन्चर ,ट्रेकिंङ एबम ट्राभलिङ सम्बन्धीको फिल्म एवं कार्यकमहरु पर्ने गरेकोमा यस म्युजिकल फिल्मले नेपालको आन्तरिक एबम बाह्रय पर्यटनको विकासमा महत्त्वपूर्ण भूमिका खेल्ने देखिन्छ । म्युजिक नेपालको युट्युब च्यानल र अफिसियल मोबाइल एप्स मोमो एप मार्फत एकैसाथ सार्वजनिक ‘आए म त ‘ भिडियोलाइ समग्र दार्चुला जिल्ला र अपी गाउँपालिकाले समेत आफ्नोक्षेत्रको प्रचार प्रसार माध्यम बनाउन सक्छन । राजु भट्टको आफ्नै शब्द ,संगीत र मानश्वी मालाकारको एरेन्ज रहेको ‘आए म त ‘ गीतमा राजु र ममता गुरुङको स्वर रहेको छ।

“हाँस्दा अरूसँग, रुँदा मसँग” गजलको म्युजिक भिडियो सार्वजनिक

काठमाडौं । कवि तथा गजल कार नबराज बराल ‘निशान्त’ को शब्दमा आधुनिक गजल “हाँस्दा अरूसँग, रुँदा मसँग” सार्वजनिक भएको छ ।

यस गजलमा राजन बरालले सङ्गीत भरेका छन् भने स्वर पनि राजन बराल कै रहेको छ । मनोहर सुनामको एरेन्ज रहेको यस गजलमा सितारमा सीतामैंया राजथल, बाँसुरीमा गोपाल देव, तबला र रिदम भुवन गन्धर्व, स्याक्सोफाने र गितारमा मनोहर सुनामले साथ दिएका छन् ।

यस म्युजिक भिडियोको परिकल्पना, सम्पादन, छायाङ्कन, सिनेमेटोग्राफी तथा निर्देशन दिवश बरालले गरेका छन् । कास्कीको माछापुच्छ्रे गाउँपालिकाको लाहाचोक र मङ्की हिल हट्स एन्ड रेस्ट्रो प्रा.लि. का रमणीय स्थलमा यस म्युजिक भिडियोको छायाङ्कन गरिएको छ ।

स्टुडियो साउन्ड डिजाइन नक्सालमा रेकर्डिङ गरिएको यस गीतको रेकर्डिङ, मिक्सिङ र मास्टरिङको काम भोला पौडेलबाट सम्पादन भएको थियो ।

यस म्युजिक भिडियोमा किशोर सुनार, शङ्कर सुनार र एलिसा कुँवरको मन छुने कारुणिक अभिनय देख्न सकिन्छ । यो म्युजिक भिडियो बडा दशैंको शुभकामनासहित विजया दशमीको दिन राजन बराल अफिसियल युट्यसव च्यानल https://www.youtube.com/@rajanbaral615 तथा यहाँ क्लिक गरेर  हेर्न सकिन्छ । 

धनकला कुँवरको गीत ‘बा आमा’ सार्वजनिक (भिडियो)

काठमाडौँ। गायिका धनकला कुँवरको स्वरमा रहेको नयाँ गीत भिडियो सार्वजनिक गरिएको छ। सार्वजनिक ‘बा आमा’ बोलको गीतमा प्रकाश अर्यालको शब्द तथा अर्जुन बस्न्यातको संगीत रहेको छ। अर्जुन थापाको निर्देशन र सम्पादनमा बनेको भिडियोलाई जयराम थापाले खिचेका हुन्। भिडियोमा राम बाबु रेग्मी,राधा पाण्डे गिरि,नबराज पनेरु,जिज्ञासा थापा र आराध्य रेग्मीको अभिनय रहेको छ। भिडियो ओएसआर डिजिटलको अफिसियल च्यानल मार्फत सार्वजनिक गरिएको छ।