Breaking News
‘प्लानेट अप द एप्स’ को नयाँ शृंखलाको ट्रेलर सार्वजनिक

काठमाडौं । हलिउड ब्लकबस्टर ‘प्लानेट अफ द एप्स’को युनिभर्सलाई पुनः ठूलो पर्दामा हेर्न पाइने भएको छ । अघिल्लो भाग रिलिज भएको ६ वर्षपछि ‘किङ्डम अफ द प्लानेट अफ द एप्स’ को ट्रेलर सार्वजनिक भएको छ । यसमा मुख्य पात्र सिजरको छोरा कर्नेलियस फर्किएको छ । अब एप्स मानिसको शत्रु बनेको देखिन्छ ।

झण्डै ५५ वर्ष पुरानो हलिउडको सबैभन्दा शानदार फ्रेन्चाइजीमध्येको एक ‘प्लानेट अफ द एप्स’ले सन् १९६८ देखि दर्शकलाई मनोरञ्जन दिंदै आएको छ । यसअघि यो फ्रेन्चाइजीका नौ सिरिज रिलिज भइसकेका छन् । यो १० औं सिरिज हुनेछ ।

‘किङ्डम अफ द प्लानेट अफ द एप्स’लाई वेस बलले निर्देशन गरेका हुन् । यो फिल्ममा ओवेन टीग, फ्रेया एलन, केभिन डुरन्ड, पिटर म्याकन, विलियम एच. जोस फ्राइडम्यानको अभिनय छ । रिक जाफा र अमान्डा सिल्भरले पटकथा तयार गरेका छन् । भारत र नोपलमा फिल्मको रिलिज मिति भने घोषणा गरिएको छैन । अमेरिकामा भने यो फिल्म २४ मे २०२४ मा प्रदर्शन हुने जनाइएको छ ।

सिंहदरबार परिसरभित्र टिकटक बनाउन निषेध

काठमाडौँ । सिंहदरबार परिसरभित्र अनुमतिविना फोटो, भिडियो खिच्न र टिकटक बनाउन निषेध गरिएको छ । नेपाल प्रहरी सिंहदरबार सुरक्षा गणले सिंहदरबारभित्र विभिन्न ठाउँमा सूचना राखेर फोटो खिच्न र टिकटक बनाउन निषेध गरेको हो ।

पछिल्लो समय सिंहदरबारभित्रका बगैँचा तथा भीआईपी कार्यालयको अगाडि गएर फोटो खिच्ने तथा टिकटक बनाउने काम बढेकोले सुरक्षा प्रोटोकलअनुसार विना अनुमति त्यस्ता काम गर्न रोक लगाइएको हो । अनुमति लिएर मिडिया तथा सञ्चारकर्मीले समाचार सम्प्रेषण गर्न फोटो, भिडियो खिच्न भने रोक लगाइएको छैन।

बागलुङ समाज पोखरा बचत तथा ऋण सहकारी संस्थाको अध्यक्षमा आचार्य

पोखरा । बागलुङ समाज पोखरा बचत तथा ऋण सहकारी संस्था लिमिटेडको पाँचौ अधिवेशन शनिबार पोखरामा सम्पन्न भएको छ । अधिवेशनले जयराम आचार्यको अध्यक्षतामा ९ सदस्यीय कार्यसमिति समेत चयन गरेको छ । समितिको उपाध्यक्षमा चेतनारायण सापकोटा, सचिवमा महेन्द्र ढकाल, कोषाध्यक्ष भवानीशंकर शर्मा तथा सदस्यहरुमा क्रमश : प्रमोदनारायण श्रेष्ठ, शेरबहादुर घर्ती क्षेत्री, रमना किरण श्रेष्ठ, यशोधा कँडेल र मेघराज शर्मा निर्विरोध निर्वाचित भएको निर्वाचन समिति संयोजक भानुभक्त कँडेलले बताए ।

संस्थाका अध्यक्ष विष्णुकुमार श्रेष्ठको अध्यक्षता तथा संस्थाका संस्थापक अध्यक्ष अमृतलाल श्रेष्ठको प्रमुख आतिथ्यतामा सम्पन्न कार्यक्रमा उपाध्यक्ष जयराम आचार्यले स्वागत मन्तब्य तथा सचिव विष्णु पौडेलले कार्यक्रम संचालन गरेका थिए। उक्त कार्यक्रममा संस्थाका कानुनी सल्लाहकार डा.भानुभक्त कंडेल बागलुङ समाज पोखराका अध्यक्ष डिल्लि शर्मा , संस्थाका निवर्तमान अध्यक्ष कमला गिरि , सियर सदस्यको तर्फबाट लेखनाथ आचार्य , मेघराज शर्मा लगायतले आ-आफ्नो धारणा राखेका थिए।

कार्यक्रममा अध्यक्ष, सचिव, कोषाध्यक्ष, तथा लेखासमितिको प्रतिवेदन माथी छलफल गरि पारित गरिएको थियो साथै संस्थाले संस्थामा आबद्ध ७० वर्ष भन्दा माथिका ज्येष्ठ सदस्य, शेयर सदस्यबाट उत्कृष्ट बचत कर्ता र कारोबार कर्ता लगायतलाई सम्मान पनि गरेको थियो ।

गीतकार ज्ञानेन्द्र गदालको ‘फूल हौ तिमी’

काठमाण्डौ। गीतकार ज्ञानेन्द्र गदालको शब्द रचना रहेको नयाँँ गीत ‘फूल हौ तिमी’ सार्वजनिक गरिएको छ । संगीतकार सन्तोष श्रेष्ठको संगीत रहेको यो गीतमा निशान भट्टराई र अश्मिता अधिकारीको स्वर रहेको छ । संगीतकार तथा नेपाल संगीत तथा नाट्य प्रज्ञा प्रतिष्ठानका उपकुलपति शम्भूजित बासकोटाको प्रमुख आतिथ्यतामा गदालको नयाँ गीत भिडियो सार्वजनिक गरिएको हो ।

सौरभ तुलाधरको निर्देशनमा बनेको भिडियोमा निकेश धामी र श्रद्धा अधिकारीको अभिनय रहेको छ। अमेरिकाको विभिन्न स्थानमा छायांकन गरिएको उक्त भिडियो आकर्षक बनेको प्रमुख अतिथि बासकोटाले मन्तव्यको क्रममा बताए । बासकोटालाई नेपाली म्यूजिक भिडियो निर्माणको थालनी गर्ने ब्यक्तिको रुपमा पनि लिने गरिन्छ । लेकटाओको ए एन्ड ए इन, अमेरिकाको प्रायोजन रहेको यो गीतको भिडियो न्युयोर्कको मोक्तान डिजिटलले निर्माण गरेको हो ।