Breaking News
शिल्पा मास्केको ‘हालीमुहाली’ (भिडियो)

काठमाडौँ। सौगात मान सिंह बस्नेतको निर्देशनमा बनेको वेब सिरिज ‘हालीमुहाली’ को शिर्ष गीत सार्वजनिक गरिएको छ। रचना रिमालको स्वर रहेको गीतमा भुपेन्द्र महतको शब्द तथा सुरेश अधिकारीको संगीत रहेको छ। शिल्पा मास्के स्टारर सिरिजमा कृष्ण बहादुर थापाको डिओपी,अविन शाक्यको छायांकन,समिर मियाँको भिएफएक्स,राजेन्द्र मोक्तानको कलर कृपा बज्राचार्यको कोरियोग्राफी रहेको छ।

सिरिजमा शिल्पाको अलावा बिशाल पहारी,विक्की खड्का,कुन्दन थारुको अभिनय रहेको छ। अर्जेश रेग्मीको स्क्रिप्ट र अनुप न्यौपानेको स्क्रिनप्ले रहेको छ। कार्यकारी निर्माता हरी तामाङ रहेको ‘हालीमुहाली’ को सम्पादन पनि सौगात मान सिंह बस्नेतले नै गरेका हुन्।

चलचित्र ‘जम्प’ मङ्सिर २९ गतेबाट देशभर प्रदर्शनमा आउने

काठमाडौँ। आशुतोष ध्वज कार्कीको लेखन तथा निर्देशनमा बनेको चलचित्र ‘जम्प’ को प्रदर्शन मिती फाइनल गरिएको छ। यति बेला पोस्ट प्रोडक्सनको अन्तीम चरणमा रहेको चलचित्र मङ्सिर २९ गतेबाट देशभर प्रदर्शनमा आउने छ। नयाँ र जोश बोकेको टिम मिलेर निर्मण गरेको चलचित्र साइकोलोजिक थ्रिलर जनरामा बनेको छ। राष्ट्रिय धावक बनेका मुख्यपात्रलाई समय परिवर्तन गर्ने अलौकिक क्षमता प्राप्त हुन्छ । आफ्नो विगत्का दबाएर राखिएका अनुभूतिहरूले उसलाई पिरोल्न थाल्छन् । यससँगै आएका ट्विस्टहरू र भ्रष्टचारको जालो वरपर यो चलचित्र रुमल्लिन्छ।

क्रियटिभ माकुरा मिडियाको ब्यानरमा निर्माण भएको चलचित्रले नेपाली चलचित्र उद्योगको लागि नयाँ मानक स्थापित गर्नेमा निर्माण टिम ढुक्क छ । इशा खड्का कार्यकारी निर्माता रहेको चलचित्र ‘जम्प’ले नेपाली चलचित्रमा नयाँ लहरको उत्प्रेरकको रुपमा काम गर्दै रचनात्मक कथा कथन र नवीनताको पुनर्जागरण गर्ने टिमको दृढ विश्वास छ । चलचित्रमा सरोज श्रेष्ठ,सन्देश शाक्य,बिनिता थापा मगर,मन्जिल जिसी,सगुन तामाङ,रोशनी स्याङ्ग्बो,शंकर महर्जन र प्रवल कडेलको मुख्य भूमिका रहेको छ। बिदेशी फिल्म फेस्टिभलमा आफ्नो दरिलो उपस्थिति जनाई सकेको चलचित्रले नेपाली दर्शकलाई छुट्टै स्वाद दिने लेखक तथा निर्देशक आशुतोष ध्वज कार्कीले बताए।

क्रिएटिभ माकुरा टिममा आशुतोष ध्वज कार्की, प्रसन थापा, देबेश राजकर्णिकार, अंकित सिंह, एन्जेलिका खत्री, निरोज महर्जन, विपिन कपाली, अरिश राजकर्णिकार, सम्राट खनाल र सुरज कटुवाल रहेका छन्। यो टिमले दर्शकलाई पूर्ण मनोरंजन दिने बिस्वाशका साथ चलचित्र ‘जम्प’ को प्रचार प्रसार पनि थालनी गरेका छन्। चलचित्रलाइ गोबिन्द शाहीले वितरणको जिम्मा लिएका छन्।

दयाहाङ र दीया स्टारर ‘दयारानी’ माघ २६ मा

काठमाडौं। अभिनेता दयाहाङ राई र अभिनेत्री दीया पुनको मुख्य भुमिका रहेको चलचित्र ‘दयारानी’ को प्रदर्शन मिति घोषणा गरिएको छ । चलचित्र आगामी माघ २६ गतेबाट प्रदर्शनमा आउने भएको हो । निर्माण टिमले मंगलबार एक पोस्टर सार्वजनिक गर्दै रिलिज मिति घोषणा गरेको छ । सार्वजनिक पोस्टरमा अभिनेता राई र अभिनेत्री पुनलाई मात्र समावेश गरिएको छ ।

अभिनेता माओत्से गुरुङले यही चलचित्रबाट निर्देशनमा डेव्यु गरेका हुन् । उनले यसअघि तीन पटक चलचित्रको रिलिज मिति घोषणा गरेर पोष्टपोण्ड गरेका थिए । चलचित्रमा दया र दीयाका अलावा विजय बराल, प्रमिसा गुरुङ, पुस्कर गुरुङ, टिकाराम घलेलगायतका कलाकार पनि अभिनय छ ।

बासुरी फिल्मस् र माओत्से फिल्मस्को ब्यानरमा निर्मित चलचित्रले खराब श्रीमान र दयालु श्रीमती बीचको कथा भन्ने छ । चलचित्रलाई शैलेन्द्र ध्वज कार्कीको खिचेका हुन् । मोहन गुरुङ, किरण गुरुङ, केन्द्र लिम्बु र न्यू आइटी भेन्चरको सहकार्यमा निर्माण भएको चलचित्रका कार्यकारी निर्माता रामबाबु गुरुङ र अपिल विष्ट हुन् । चलचित्रको कास्टिङ डारेक्टर मणिराम पोखरेल हुन् ।

गोलरक्षक एन्जिलाको कथामा बन्ने चलचित्र ‘अन्जिला’को छायाङ्कन सुरु

काठमाडौँ। महिला राष्ट्रिय फुटबल टिमकी नम्बर एक गोलरक्षक एन्जिला तुम्बापो सुब्बाको जीवनबाट प्रभावित रहेको चलचित्र ‘अन्जिला’ को छायाङ्कन सुरु भएको छ । मिलन चाम्सले निर्देशन गर्ने यो चलचित्रको सोमबार एन्जिलाकै जन्मथलो इलामको आइतबारे बजारमा शुभमुहुर्त गरी छायाङ्कन सुरु भएको हो । इलाम, झापा र काठमाडौँमा यस चलचित्रको छायाङ्कन हुनेछ । पहिलो दिन कलाकारहरू माओत्से गुरुङ र सिर्जना सुब्बाको दृश्यसँगै छायाङ्कन सुरु भएको हो ।

यो चलचित्रमा एन्जिला स्वयंको मुख्य भूमिका रहनेछ । खेलमा पोख्त एन्जिला पहिलो पटक अभिनयको पनि अनुभव बटुल्दै छिन् । उनीसँगै चलचित्रमा दयाहाङ राई, मिरुना मगर, सिर्जना सुब्बा, पशुपति राई, माओत्से गुरुङ, बुद्धि तामाङ, विजय बराल, हरि खड्का लगायतको पनि अभिनय रहनेछ ।

एन्जिलाको बालापनदेखि खेल जीवनसम्मको कथामा उनले फुटबलर बन्नका लागि गरेको सङ्घर्ष र सफलताको कथालाई चलचित्रमा जोड दिइने निर्देशक चाम्सले जानकारी दिए । सफल खेलाडी बन्नु अगाडि एन्जिलाले धेरै दुःखहरू भोगेको र इच्छाशक्ति भएदेखिन् असम्भव भन्ने कुरा नहुने सन्देश चलचित्रले दिने चाम्सले बताए । निर्देशक चाम्सले यो चलचित्र ठ्याक्कै एन्जिलाको बायोपिक भने नभएको बताए । उनले ७५ प्रतिशत एन्जिलाकै जीवनी हुने तर बायोपिक भने नहुने बताए ।

निर्माता प्रेम कुमार श्रेष्ठले एन्जिलाको कष्टकर बाल्य जीवनदेखि सफलतासम्मको कथालाई चलचित्रमा देखाइने बताए । १४ वर्षदेखि एन्जिलाको अभिभावकत्व ग्रहण गर्दै आएका उनले शिक्षा-दिक्षादेखि खेलाडी बनाउने सहमतिमा हस्ताक्षर गरेर एन्जिलालाई मोरङबाट काठमाडौँ ल्याएका थिए । श्रेष्ठले एन्जिलाको सङ्घर्ष र सफलताको कथाले धेरैलाई ‘इन्स्पायर’ गर्छ भन्ने लागेर चलचित्र बनाउन लागेको बताए ।

२०५३ मा पाँचथर जिल्लाको फाक्तेपमा जन्मिएकी एन्जिलाले १३ वर्षको उमेरदेखि नै फुटबल खेल्न सुरु गरेकी थिइन् । सन् २०१४ मा श्रीलङ्कामा सम्पन्न एएफसी यु–१४ गर्ल्स रिजनल ट्रफीबाट अन्तर्राष्ट्रिय प्रतियोगितामा डेब्यू गरेकी उनी २०१४ बाट राष्ट्रिय टिममा परेकी थिइन् । तर, उनी २ वर्ष बेन्चमै सीमित भइन् । त्यसयता भने उनी महिला राष्ट्रिय फुटबल टिमको भरपर्दो गोलरक्षक बनेकी छन् । एन्जिला ‘पल्सर स्पोर्टस् अवार्ड २०७७’ को पिपुल च्वाइस अवार्डको मनोनयनमा समेत परेकी थिइन् । यो विधामा मनोनयनमा पर्ने एन्जिला फुटबलकी एक मात्र खेलाडी हुन् ।

एन्जिला ओलम्पिक क्वालिफाईङ राउन्डमा दोस्रो राउन्ड सम्म खेल्ने पहिलो महिला गोलरक्षक हुन् । यसै गरी उनी चीनमा भएको एसियन गेम्स खेल्ने, हिरो गोल्ड कपमा भारतलाई जित्ने, साफको सेमिफाइनलमा भारतलाई जित्ने पहिलो गोलरक्षक र क्याप्टेन हुन् । उनी साफको सिल्भर मेडलिष्ट गोलरक्षक हुन् भने श्रीलङ्कामा भएको साउथ रिजनल जोन टुर्नामेन्टमा भारत, इरान, भुटान, ताजकिस्तान र श्रीलङ्कालाई जितेर पहिलो पटक गोल्ड मेडल ल्याउने गोलरक्षक हुन् । पाकिस्तान लिगमा उनी गोलरक्षक रहेर पनि दुई गोल गरेकी थिइन्, जुन गोलरक्षक खेलाडीको इतिहासमा पहिलो बनेको थियो ।

एन्जिला चर्चित क्लोथिङ ब्रान्ड ली-निङको नेपालको पहिलो र विश्वको पाँचौँ ब्रान्ड एम्बासडर हुन् । साथै, उनी गोर्खा वाच र हन्ड्रेड स्पोर्टसको पनि पनि पहिलो ब्रान्ड एम्बासडर हुन् । नेपाली खेलाडीको नाम अङ्कित गरी पहिलो पटक टी-शर्ट, घडी (गोर्खा) र चप्पल (म्याजिक) बनेका छन्, जुन नाम एन्जिलाको नै हो ।

यस चलचित्रमा प्रदीप भारद्वाज र यम थापाको लेखन रहेको छ भने पटकथामा मुख्य सहायक निर्देशक गिरिराज घिमिरेले साथ दिएका छन् । सुदीप बरालको डिओपी रहने यसका सम्पादक मिलन श्रेष्ठ हुन् ।

मुन लभ इन्टरटेन्मेन्टको ब्यानरमा बन्न लागेको चलचित्रका निर्माता प्रेम कुमार श्रेष्ठ हुन् भने विनोद अग्रवाल र राजेश बागादिया सह-निर्माता हुन् । विनोद सुवेदी खत्री निर्माण नियन्त्रक हुन् ।

तपाईंले पढ्नै पर्ने किताब छुट्यो कि ?

पोखरा । विश्वमा रहेका अथवा प्रकाशित भएका धेरै पुस्तकहरु तपाईं हामीहरुले पढ्छौ, अझ भनौँ पढ्दै आएका छौ । जसले गर्दा त्यहाँ भएका कतिपय कुराहरु व्यवहार उतारेर व्यवहारिक पनि भएका छौँ, भने कतिपय राम्रा पक्षका कुराहरुले तपाईं हाम्रो त जिवन नै परिवर्तन भएको पनि छ । त्यो स्वयम् तपाईं हामीले नै प्रत्यक्ष अनुभव अथवा अनुभुति गरेका छौँ ।विश्वमा प्रकाशित भएका कतिपय पुस्तकहरु जुन सुकै भए पनि तपाईं हामीलाई मनमा ईच्छा जागो भने त्यसलाई नपढी हामीहरुले छौड्दै-छोड्दैनौ किनकि, त्यो मनले गरेको संकल्प हो, अझ भन्नु पर्दा त उर्जावान शक्तिशाली मनले गरेको संकल्प हो । विश्मा प्रकाशित भएका किताबहरु छानेर किन्न हामीलाई असाध्यै कठिन पनि हुन्छ र मनमा द्वन्द पनि पैदा हुन्छ, जसले गर्दा हामीले पढ्नै पर्ने किताब छुट्छ र केही समयपछि पढे हुने किताब पहिला पढिन्छ र भाग एक नपढी भाग दुई पढ्न पुगिन्छ अनि त्यसपछि कस्तो अनुभव हुन्छ भने आैशिको रातमा बत्ति नै बाल्न भुले जस्तो महशुस हुन्छ तर हुनुपर्ने के हो भने अन्धकारबाट उज्यालो तर्फको ज्ञान हुनुपर्ने हो सही किताब छनौट नभएको अवस्थामा किताब पढ्नेहरुमा त्यो अल्पज्ञानका रुपमा सधै नै रहिरहन पनि सक्छ ।

अब तपाईं हामीले किताब पढ्दा कस्तो पढ्ने अथवा छनौट गर्ने त ?

तपाई हामी विद्यारम्भ गर्नु पूर्वक विद्यार्थी बन्नुपर्छ, जिज्ञासु हुनुपर्छ, प्रश्नकर्ता हुनुपर्छ, अनि त्यसपछि टिपोट गर्ने बानी पनि हुनुपर्छ । अब विश्वमा प्रकाशित भएका किताबहरु मध्ये जति धेरै किताब पढ्दा पनि तपाईं आन्दित हुनुहन्न किन कि पढ्ने व्यक्ति बढि जिज्ञासु हुन्छ तर तपाईंले कतै यो किताब त पढ्न छुटाउनु भएन ? त्यो किताब हो श्रीमद्भागवत गित जसलाई तपाईंको सफताको, ज्ञानको भण्डार अथवा तपाईंको जिवन चलाउने कानुनी किताब भनौ, किनकि यसमा मानिसको जिवनसँग जोडिएका हरेक क्रियाकलाप यसमा पाईन्छन् । यसको प्रयोग स्वयम् माहात्मा गान्धिले गर्नुभएको कुरा माहात्मा गान्धिको जिवनीमा पढ्न सकिन्छ । उहाँले आफु बेलायत हुदाँ फेरि गिता पढ्न सुरु गर्नु भएको थियो र त्यसलाई व्यवहारमा भने भारतमा भएको अङ्ग्रेज विरुद्धका विभिन्न आन्दोलन जस्तै उदारतावादी, उग्रवादी, गान्धिवादी, भारत छोड आन्दोनमा समस्या पर्न साथ गिता पल्टाइ हाल्ने र त्यसको समाधान खोजी हाल्नु हुन्थ्यो र त्यसैको अनुसारण गर्नुहुन्थ्यो । गान्धि जीको हरेक समस्याको समाधान गर्ने साथी भनेको नै गिता हो, किनकि उहाँसँग सदाको साथी नै लौरो र गिता हुन्थ्यो ।

गिताको बारेमा केही जानौँ र बुझौँ

श्रीमद्भगवद्गीता हिन्दूहरूको अझ भनौँ सनातनीहरुको पवित्रत ग्रन्थ मध्येको एक हो गिता। यसमा जीवनको सार खिँचिएको छ । यसको अनुशरणले जीवन निर्वाहमा महत्त्वपूर्ण योगदान गर्छ । यसमा श्रीकृष्ण, अर्जुन, धितराष्ट्र, सञ्जय लगायको संवाद रहेको छ । यसमा भगवान् श्रीकृष्णले कुरुक्षेत्रको रणभूमिको मैदानमा अर्जुनलाई उपदेश दिनुभएको थियो र यसको ३५ वर्षपछि कलियुग शुरु भएको किम्बदन्ति पाईन्छ । गीतामा १८ अध्याय छन् । त्यसैपनि १८ अंक महाभारतमा महत्त्वपूर्ण छ । अठारको अर्थ बलिदान पनि लाग्छ ।

विश्वप्रसिद्ध वैज्ञानिक अल्बर्ट आइन्स्टाइनले आफुले जिवनको सुरुवात कालमा नपढेर जीवनकालको अन्त्यतिर गीता अध्ययन गर्न थालेका थिए । यस्तो महान् ग्रन्थ बाल्यकाल देखि नै किन अध्ययन गरिएनछ भनेर आइन्स्टाइनलाई पश्चात्ताप लागेको कुरा उनको जिवनिमा पढ्न पाईन्छ।

अर्जुनले मात्र नभएर सञ्जय, हनुमान् र बर्बरीकले पनि श्रीकृष्णबाट गीता उपदेश सुनेका थिए । संस्कृत भाषामा लेखिएको गीताको अहिलेसम्म १७५ भाषामा अनुवाद भइसकेको छ । यसलाई संसारभरि अत्यधिक रुचिका साथ अध्ययन गरिन्छ । अहिले त विश्वका अधिकांश विश्वविद्यालयमा यसलाई पाठ्यक्रममा समावेश समेत गरेका छन् ।

गीतामा श्रीकृष्णले आफ्ना आमाबुवा, दाजुभाइ, पत्नी र बच्चाहरूको सेवा गर्नु पहिलो कर्तव्य हो र यो उहाँको कर्म हो भन्नुभएको छ। आफ्नो परिवारको हेरचाह गर्नु उनको कर्तव्य हो। उहाँको कर्तव्य यहाँ मात्रै होइन, मानिसको हैसियतले आफ्नो वरपरका मानिसहरूलाई अप्ठ्यारो परिस्थितिमा सहयोग गर्नु पनि उहाँको कर्तव्य हो र साथसाथै मानिस आफ्नो समाजप्रति उत्तरदायी पनि हुनुपर्छ । कलियुगमा संसारभर नै अनैतिकता, हिंसा, अतिवाद आदिको माहोल छ र त्यसैले गीताको ज्ञान आवश्यक छ। आज मानिस केवल स्वार्थ र लालसामा डुबेको छ र आफ्नो स्वार्थ पूरा गर्न अरुको शोषणमा व्यस्त छ । मानिस बुद्धिमान र संवेदनशील पनि छ, त्यसैले सबै प्राणीहरूले आफूभित्र ईश्वरलाई खोज्नुपर्छ। मानिसले सधैं करुणा बुझ्नुपर्छ र अरूलाई पनि त्यस्तै व्यवहार गर्नुपर्छ। परहित आधार हो, जो सबैको खुशीको कारण हो।

परहित दुई शब्द मिलेर बनेको छ – परको अर्थ – आफैलाई अलग र हित को अर्थ – राम्रो।

गीतामा श्रीकृष्णले असल कर्म र असल कर्मको वर्णन गर्नुभएको छ, जसमा हाम्रो कुनै रुचि छैन। कहिलेकाहीँ हामीले त्यस्ता मानिसहरूलाई दया देखाउनुपर्छ र तिनीहरूको भलाइ गर्नुपर्छ। यो वास्तवमा मानिसको नैतिक दायित्व र अन्तिम कर्तव्य हो। यसलाई सहायताको रूपमा चिनिन्छ, यसैलाई भनिन्छ सत्कर्म, यसैलाई भनिन्छ मानवता र यही नै मानिसको धर्म हो। यी कर्महरूलाई पुण्य कर्म भनिन्छ। जब कुनै व्यक्तिले आफ्नो लाभ-हानिको ख्याल नगरी अरूको कल्याण गर्छ, त्यसलाई परोपकारी भनिन्छ।

अभ्युत्थानमधर्मस्य तदात्मनम् सृजम्यहम्


यसको अर्थ – जब जब धर्मको पतन हुन्छ र अधर्म बढ्छ, तब म धर्मको उत्थानको लागि अवतार लिन्छु। ऋषि-मुनिहरूको रक्षा, दुष्टको नाश र धर्मको स्थापनाको लागि युगौँदेखि पृथ्वीमा जन्म लिइरहेको छु। कृष्णले अर्जुनलाई कर्मण्यवधिकारस्ते मा फलेषु कदाचन भनेर कर्मको पूर्ण ज्ञान बताउँछन्।


कर्मफलहेतुर्भुर्म ते संगोस्तवकर्मणि


यसको अर्थ- काम गर्नु तिम्रो कर्तव्य हो, निःस्वार्थ काम गर, नतिजाको चिन्ता नगर। समय आएपछि त्यसको नतिजा पक्कै पाउनुहुनेछ। काम गर्नु तिम्रो अधिकार हो तर फल चाहनु तिम्रो अधिकार होइन। कर्म गर र परिणामको चाहना नगर अर्थात् परिणामको चाहना नगरी काम गर । क्रोधको बारेमा श्री कृष्ण बताउँछन् कि,

ध्यायतो विषयपुंसः संगस्तेसुपजयते संगतसञ्जयते कामः कामतक्रोधोभिजयते


यसको अर्थ – वस्तुहरूको बारेमा सोच्दै, व्यक्ति तिनीहरूसँग संलग्न हुन्छ। यस कारणले तिनीहरूमा कामनाहरू उत्पन्न हुन्छन् र कामनाहरूमा बाधा उत्पन्न हुँदा क्रोध उत्पन्न हुन्छ। क्रोधको बारेमा थप व्याख्या गर्दै उहाँ व्याख्या गर्नुहुन्छ :


क्रोधाद्भवति सम्मो: सम्मोहत्स्मृतिभिभ्रम्:।
स्मृतिभ्रंशबुद्धिनाशो बुद्धिनाशत्प्राणश्यति


यसको अर्थ – क्रोधले मानिसको मन मार्छ, स्मरणशक्ति भ्रमित हुन्छ, स्मृति-भ्रमले मानिसको बुद्धि नष्ट हुन्छ र जब बुद्धि नष्ट हुन्छ तब मानिसले आफैंलाई नष्ट गर्छ, त्यसैले गीतामा क्रोधलाई नाशवान भनिएको छ । रिस उठ्दा दिमाग कमजोर हुन्छ र स्मरणशक्ति कम हुन्छ । यसरी मानिसको बुद्धि नष्ट हुन्छ र बुद्धिको विनाशसँगै त्यो मानिस स्वयं पनि नष्ट हुन्छ।

यसरी संसारमा अन्य किताबहरु जतिसुकै पढे पनि एक पटक गिता पनि अवश्य नै पढ्नु पर्दछ ।

चलचित्र ‘दिमाग खराब’ ले गर्यो टी-२० क्रिकेटमा पुरस्कारको घोषणा

काठमाडौँ। अर्को वर्ष अमेरिका र वेष्ट इन्डिजमा हुने टि-२० को एसिया छनोट कात्तिक १३ गते सोमाबारबाट टीयू क्रिकेट मैदानमा सुरु हुँदैछ । विभिन्न कम्पनिले नेपाली खेलाडीलाई हौसला प्रदान गर्न पुरस्कारको घोषणा गरिरहेका छन् ।

यसैबीच आगामी कात्तिक २४ गतेबाट नेपाल र विदेशमा एकसाथ प्रदर्शनको तयारीमा रहेको चलचित्र ‘दिमाग खराब’को टिमले पनि पुरस्कारको घोषणा गरेको छ । टी-२० क्रिकेटमा ‘दिमाग खराब म्यान अफ दी म्याच’ बन्ने खेलाडीलाई ५० हजार र आफ्नो खेल कौशलले टिमलाई महत्त्वपूर्ण सहयोग गर्ने खेलाडीलाई ‘दिमाग खराब सेग्मेन्ट अफ दी डे’ अन्तर्गत १० हजार प्रदान गरिने निर्माता रौनक बिक्रम कडेलले जानकारी दिए ।

यो पुरस्कार नेपाली खेलाडीले मात्र पाउनेछन् । यसको छनोट गर्ने सम्पूर्ण अधिकार भने नेपाल क्रिकेट सङ्घ (क्यान)लाई दिइएको छ । त्यस्तै, सिनेमाको कूल मुनाफाको ५ प्रतिशत क्यानको विकासका लागि समेत प्रदान गरिने भएको छ । यसविषयमा आइतबार निर्माता कडेल र क्यानका पदाधिकारीबीच सहमति भएको छ ।

नेपाली खेलाडीलाई हौसला र क्रिकेटको विकासका लागि आफूले यो कदम उठाएको कडेलले बताए । नेपाली सिनेमाले पहिलोपटक अन्तर्राष्ट्रिय खेलमा क्यानसँग सहकार्य गरेको हो । क्यानसँग मिलेर सिनेमाको टिमले ‘कात्तिक २४ गते दिमाग खराब हेरौं, नेपाली क्रिकेट टिमलाई सहयोग गरौं’ भन्ने स्लोगन पनि बनाएको छ ।

क्रिकेटका सौखिक रौनकले भने – ‘अहिले देशलाई चिनाउने काम क्रिकेटले गरिरहेको छ । नेपाली खेलाडीहरुले निकै राम्रो प्रदर्शन गरिहेका छन् । यो बेला सबैको साथ, सहयोग र हौसलाको खाँचो छ । यसैले चलचित्रको तर्फबाट यो घोषणा गरेका हौं ।’

सिनेमा आर्ट्स र ब्ल्याक हर्स पिक्चर्सको निर्माण रहेको चलचित्रमा खगेन्द्र लामिछाने, दयाहाङ राई, स्वस्तिमा खड्का, अपर्ण थापा, विजय बराल, सुमन कार्की, पुष्कर गुरुङ, माओत्से गुरुङ, राजन खतिवडा, रमा थपलिया, गौरभी आरएल सिंह, गीत अधिकारी, कृष्णभक्त महर्जन, धीरज भट्ट, राहुल सिवाकोटी, नविन खड्का लगायतको पनि अभिनय छ ।

निर्देशक निश्चल बस्नेत र भिनेत्री सुपुष्पा भट्ट पनि चलचित्रको एक गीतमा विशेष भुमिकामा देखिएका छन् । निर्देशक बस्नेतले ६ वर्षपछि निर्देशनमा कमब्याक गरेकाले पनि दर्शक चलचित्रको प्रतिक्षामा छन् । आकाश बरालको लेखन र मनोज पण्डित स्क्रिप्ट डाक्टर रहेको चलचित्र राजनीतिक विषयमा केन्द्रित रहेर निर्माण भएको हो ।

चलचित्रमा रौनक विक्रम कडेल निर्माता र सुरज बम ठकुरी कार्यकारी निर्माताको रुपमा रहेका छन् । चलचित्रमा सुसन प्रजापतिको छायांकन, निमेष श्रेष्ठको सम्पादन, जयन के बाइबा र बाबुल गिरीको संगीत, राजकुमार उप्रेतीको द्वन्द्व निर्देशन तथा रोहित शाक्यको ब्याकग्राउन्ड स्कोर छ ।

कलाकार प्रकाश घिमिरेको स्वास्थ्यमा सुधार

काठमाडौँ । घाँस काट्ने क्रममा लडेर घाइते भएका कलाकार प्रकाश घिमिरेको स्वास्थ्यमा केही सुधार आएको छ । मणिपाल शिक्षण अस्पतालका डाक्टरका अनुसार घिमिरेको स्वास्थ्यमा शुक्रबारभन्दा शनिबार केही सुधार आएको हो । घिमिरेको पोखरास्थित मणिपाल शिक्षण अस्पतालको आइसियु कक्षमा उपचार भइरहेको छ ।

पोखरा महानगरपालिका ३ नदीपुरका प्रकाश शुक्रबार बिहान छिमेकमै रहेको बालमन्दिर स्कुलको नजिक घर नजिकको भिरबाट घाँस काट्ने क्रममा लडेर घाइते भएका हुन् । अस्पतालका अनुसार प्रकाशको टाउको र ढाडमा चोट र छातीको करङ भाँचिएर फोक्सोमा छोएको छ ।

पोखरा नदिपुरको कन्या माध्यमिक विद्यालयमा ३७ वर्ष शिक्षण गराएका प्रकाशले त्यहाँबाट अवकाश भएपछि अभिनय क्षेत्रमा सक्रिय छन् । उनी अभिनित चलचित्र ‘भष्मे डन’ अहिले देशैभर प्रर्दशन भइरहेको छ । उनले ‘पशुपति प्रसाद’, ‘फन्को’, ‘जात्रा’, ‘टलकजंग भर्सेस टुल्के’, ‘पञ्चेबाजा’ लगाएत दर्जनौं चलचित्रमा अभिनय गरिसकेका छन् ।

निर्देशनमा रायमाझीको सफलताको ह्याट्रिक

काठमाडौँ । कुनै उपलब्धि लगातार तीन पटक हासिल गरेपछि ‘ह्याट्रिक’को रेकर्ड बन्छ । नेपाली चलचित्र क्षेत्रमा पनि यो चलनचल्तीमा रहेको शब्द हो । कुनै निर्माता, निर्देशक वा कलाकारको लगातार तीन चलचित्र हिट भयो भने यो शब्दले सम्बोधन गर्ने गरिन्छ ।

अहिले चलचित्र क्षेत्रमा निर्देशक नारायण रायमाझीले ‘ह्याट्रिक’ रेकर्ड बनाउन सफल भएका छन् । लोकदोहोरीको राम्रो पहिचानपछि निर्देशनमा होमिएका रायमाझीको ‘परदेशी २’ सफल भएसँगै हिट चलचित्र निर्देशनमा ह्याट्रिक रेकर्ड बनेको हो । यसअघि उनी निर्देशित दुई चलचित्र ‘गोर्खा पल्टन’ र ‘परदेशी’ सुपरहिट भएको थियो ।

‘परदेशी २’ गत २६ असोजबाट देशभर प्रदर्शनमा आएको चलचित्र हो । चलचित्र अहिले तेस्रो सातामा प्रदर्शनरत छ । प्रकाश सपुत, केकी अधिकारी, वर्षा सिवाकोटी लगायतको अभिनय रहेको चलचित्र राजेश बंशल र निर्देशक रायमाझीको निर्माणमा बनेको हो ।

उज्ज्वल भविष्यको सपनासहित बिदेसिन बाध्य युवाको कथामा निर्माण भएको चलचित्र नारायण इन्टरनेसनलको प्रस्तुतिमा बनेको हो । रमेश बिजीको लेखन रहेको चलचित्रमा मानकृष्ण महर्जनको छायाँकन, अष्ट महर्जनको द्वन्द्व निर्देशन, गोविन्द राई र रामजी लामिछानेको कोरियोग्राफी रहेको छ ।

राजेशको ‘उमेर सत्र भयो खत्रा’मा प्रियंका र आकाश(भिडियो)

काठमाडौँ । गायक राजेश बर्देवा र गायिका प्रिती आलेको स्वर रहेको नयाँ गीत ‘उमेर सत्र भयो खत्रा’ सार्वजनिक गरिएको छ । प्रतिभा शर्माको शब्द तथा प्रिय कुमारको संगीत रहेको गीतको एरेन्ज केशव बडुले गरेका हुन् ।

भिडियोमा अभिनेत्री प्रियंका कार्की र अभिनेता आकाश श्रेष्ठ फिचर्ड छन्। उत्सव विष्टको निर्माण र न्यु लक्ष्मी ज्वेलर्स युकेको निर्माण सहकार्य रहेको भिडियो गीतले १७ वर्षको उमेर युवतीले आफ्नो जोबन सम्हाल्नुपर्ने, यो समय अनेक खतराको सामना गर्नुपर्ने र त्यो सामना गर्न नसके जीवनै सङ्कटमा पर्ने सन्देश समेटेको छ ।

भिडियोले गीतको सन्देशलाई सिँगार्ने काम गरेको छ । रेस्टुरेन्टको महलोमा छायाङ्कन भएको भिडियोमा एउटी युवतीलाई १७ वर्षको उमेरमा के कस्ता खतराको आइपर्छ भनेर देखाइएको छ । गम्भीर विष्टको कोरियोग्राफी तथा निर्देशन रहेको भिडियोमा नवराज उप्रेतीको छायाङ्कन र प्रवीण भट्टको सम्पादन छ । भिडियो गायक बर्देवाको अफिसियल युट्युव च्यानलबाट सार्वजनिक गरिएको छ ।

‘रङ्गेली’ अमेरिकामा प्रिमियर हुने

काठमाडौँ । छायांकनको अन्तिम चरणमा रहेको चलचित्र ‘रङ्गेली’ को अमेरिका प्रदर्शन बिक्री भएको छ । अमेरिकाको लागि चलचित्रको अधिकार एक्का बास्सा इन्टरटेन्मेन्ट एन्ड लाइभ एट प्रिजेन्टले खरिद गरेको हो । प्रदर्शन अधिकार बिक्री भएसँगै क्यालिफोर्नियाको सान फ्रान्सिस्को र टेक्सासस्थित ड्यालसमा फिल्मको प्रिमियर पनि फिक्स भएको निर्देशक अर्जुन सुवेदीले जानकारी दिए ।

यसअघि जापान, कोरिया र हङकङ गरी तीन देशको फिल्मको वितरण अधिकार उज्ज्वल गुरागाईँ र यूएनए इन्टरटेन्मेन्टले किनेको थियो । अस्ट्रेलियामा पनि फिल्मको प्रदर्शन अधिकार बिक्री भैसकेको छ । अस्ट्रेलियाको मेलबर्नमा माघको अन्तिम हप्ता फिल्मको प्रिमियरको समेत तयारी गरिएको छ । फिल्म भने महाशिवरात्रीको अवसर पारेर आगामी फागुन २५ गतेबाट सार्वजनिक प्रदर्शनमा आउने छ ।

निर्देशक सुवेदीको लेखन रहेको फिल्ममा दयाहाङ राई, मिरुना मगर, अर्पण थापा, प्रवीण खतिवडा, रमेश बुढाथोकीलगायतको अभिनय छ । चलचित्रको कार्यकारी निर्माता जीतेन्द्र खतिवडा र अनुज जङ्ग थापा हुन् । निर्मातामा संसार चौलागाईं र रमेश भट्टराई वशिष्ठ रहेका छन् भने युवक कार्की र शिव शङ्कर चौलागाईँ सह–निर्मातामा छन् । विवेक खड्का (योलो) एशोसियट निर्माता हुन् । तिहार अगावै फिल्मको सम्पूर्ण छायाङ्कन सकिने बताइएको छ ।