Breaking News
‘थाहा फिल्म फेस्टिभल’ को सम्पुर्ण तयारी पुरा

काठमाडौँ। मकवानपुरको थाहा नगरपालिकामा मंसिर ९ गतेदेखि हुने ‘थाहा फिल्म फेस्टिभल’ को सम्पुर्ण तयारी पुरा भएको छ । ‘पर्यटनका लागि फिल्म फेस्टिभल’ भन्ने नाराका थाहा कला केन्द्रको आयोजनामा हुने एक हप्ते फेस्टिभलको तयारी पुरा भएको आयोजकले जानकारी दिएको छ।

आयोजकका अनुसार ‘थाहा फिल्म फेस्टिभल’ को पहिलो दिन थाहाका प्रमुख पर्यटकीय स्थल चित्लाङ, बज्रवाराही, टिस्टुङ, आग्रा, दामन र पालुङका ऐतिहासिक, धार्मिक, सांस्कृतिक तथा प्राकृतिक सम्पदालाई समेटिएको छ करिब ३६ मिनेटको वृत्तचित्र प्रदर्शन गरिनेछ। फेस्टिभलमा अन्य नेपाली फिल्म ‘राधा’, ‘ऐना झ्यालको पुतली’, ‘बुलबुल’, ‘आमा खाण्डो’, ‘डेसान’ र ‘प्रकाश’ निःशुल्क प्रदर्शन गरिनेछ।

सुवर्ण थापा निर्देशित फिल्म ‘द सिक्रेट्स अफ राधा’ मा वेपत्ता भएका पतिको खोजीमा संघर्षरत महिलाको कथा समेटिएको छ। सृष्टि श्रेष्ठ मुख्य भूमिका रहेको फिल्ममा दयाहाङ राई, निश्चल बस्नेत, सौगात मल्ल, खगेन्द्र लामिछानेलगायत कलाकारको अभिनय छ।

फिल्म ‘ऐना झ्यालको पुतली’ मा पहाडी जिल्लाको गाउँमा पढ्ने १३ वर्षीया किशोरीले शिक्षाका लागि गर्ने संघर्षलाई देखाइएको छ। साथै दिदी र भाइको भावनात्मक सम्बन्धको कथा पनि छ। सुजित बिडारीको डेब्यु निर्देशित फिल्ममा सिरु बिष्ट, कञ्चन चिमरिया, दिनेश खत्री, राज थापा, बिशा चामलिङ राई, उमेश श्रेष्ठ, मल्लिका श्रेष्ठलगायत कलाकारले अभिनय गरेका छन्।

विनोद पौडेल निर्देशित फिल्म ‘बुलबुल’ मा टेम्पो चालक महिलाको संघर्ष प्रस्तुत गरिएको छ। फिल्ममा स्वस्तिमा खड्का र मुकुन भुसाल मुख्य भूमिकामा देखिएका छन्। अन्य कलाकार जोयश पाण्डे, लक्ष्मी बर्देवा, दिपक क्षेत्री, एलिना कार्की लगायतको अभिनय छ।

मुस्ताङी भाषाको पहिलो नेपाली फिल्म हो ‘आमा खाण्डो’। फिल्ममा मुस्ताङबाट जाडो छल्न सहरतर्फ हिँडेकी एक आमाको संघर्ष कथा प्रस्तुत गरिएको छ। आमा खाण्डोको नेपाली अर्थ परी आमा भन्ने हुन्छ। फिल्ममा पेमा डोल्कर, कर्णवीर बलिया, कार्चुङ, न्यिमा डोल्मा, छिरिङ ढोन्डुप, लाक्पा वाङदी, सम्तु गुरुङ भुम्चुङलगायतको अभिनय छ। ढोन्डुप छिरिङको लेखन र निर्देशनमा बनेको छ।

नम्रता सापकोटा मुख्य भूमिकामा रहेको फिल्म ‘डेसान’ले विवाहेत्तर सम्बन्धको कथा भन्छ। फिल्ममा नारी संवेदना, पारिवारिक प्रेमका साथै असमझदारीको कथा छ। अविश्वासले वैवाहिक जीवनमा उत्पन्न कलहको कथा फिल्ममा नम्रतासँगै भोला सापकोटा, निशान चौहान, पुनम थापा, कविता आले, आरुषजंग सारु, मलिका बस्नेत, प्रमिशा सारु मगरलगायतको अभिनय छ। फिल्म कमल एक्चै मगरले निर्देशन गरेका हुन्।

फिल्म ‘प्रकाश’ मा जुम्लाका एक युवकको शिक्षक बन्ने सपनालाई देखाइएको छ। फिल्मका निर्देशक दिनेश राउत हुन्। प्रदीप खड्का र दिया मास्के मुख्य भूमिकामा रहेको फिल्ममा रेणु योगी, प्रकाश घिमिरे, राजन खतिवडालगायत कलाकारले अभिनय गरेका छन्।

फेस्टिभलमा प्रदर्शन गरिने सबै फिल्म पालुङ जेसीजको हलमा देखाइनेछ। थाहा कला केन्द्र आयोजना गरेको फिल्म फेस्टिभल मंसिर १५ गतेसम्म चल्नेछ।

राउतको निर्देशन र संगीतकार भुषालको लगानीमा चलचित्र ‘पुजार सार्की’ बन्ने

काठमाडौं। निर्देशक दिनेश राउतले नयाँ चलचित्र निर्माणको घोषणा गरेका छन्। उनले आफ्नो सातौं चलचित्रको रुपमा ‘पुजार सार्की’ घोषणा गरेका हुन्। चलचित्रलाई विकास सुवेदीले लेखेका छन्। चलचित्रलाई संगीतकार सुभाष भुषालले निर्माण गर्नेछन्। किङ्गडम नेटवर्कको प्रोडक्सनमा बन्ने फिल्मलाई आरआर फिल्म्सले वितरण गर्नेछ। माघको पहिलो साताबाट छायाँकनमा जाने बताईएको छ । चलचित्रमा अभिनय गर्ने कलाकार तथा अन्य प्राविधिकहरुको बारेमा अहिले कुनै जानकारी दिएको छैन। लेखक सुवेदीका अनुसार फिल्म एकजना क्रान्तिकारी दलित पात्रको जीवनमा आधारित हुनेछ।

सिनेमा घर र निर्माताबिचको विवाद टुंगियो

काठमाडौँ । नेपाल चलचित्र निर्माता संघ र नेपाल चलचित्र संघ बिच रहेको शेयर बाँडफाँडको विवाद टुङ्गिएको छ । नेपाल चलचित्र निर्माता संघ र नेपाल चलचित्र संघले गठन गरेको वार्ता टोलीको बिहीबार बसेको बैठकले दुवै संस्थाले ५०/५० प्रतिशत शेयर बाँडफाँड गर्ने सहमतिमा विवादलाई निकास दिएका हुन् ।

प्रदर्शन र निर्माताले ५०/५० प्रतिशत शेयर बाँडफाँड गर्ने सहमति नेपाल चलचित्र निर्माता संघ र नेपाल चलचित्र संघबिच भएको नेपाल चलचित्र संघका उपाध्यक्ष तथा वार्ता टोलीका सदस्य गोपालकाजी कायस्थले बताए । कायस्थका अनुसार प्रदर्शकले राज्यलाई तिर्ने विकास शुल्क छुटका राज्यसँग प्रदर्शन र निर्माता दुवैले पहल गर्ने सहमति समेत भएको छ ।

केही अगाडि फिल्म ‘दिमाग खराब’ टिमले शो र ५० प्रतिशत शेयर बाँडफाँडको कुरा उठाएर हलबाट उतार्ने घोषणा गरेको थियो । त्यसपछि, चलचित्र सङ्घ र निर्माता सङ्घका प्रतिनिधिहरू पहिलो चरणको वार्ता बस्दै ‘दिमाग खराब’ को प्रदर्शनलाई निरन्तरता दिँदै वार्ता अगाडि बढाउने सहमति गरेका थिए ।

दोस्रो चरणको वार्ताका लागि प्रदर्शक र निर्माताको तर्फबाट छुट्टाछुट्टै वार्ता टोली गठन भएका थिए । प्रदर्शक र निर्मातालाई प्रतिनिधित्व गर्ने गरेर वार्ता टोली गठन भएको थियो ।

निर्माता संघको तर्फबाट गठित टोलीमा पूर्व अध्यक्ष तथा सल्लाहकार अशोक शर्माको संयोजकत्वमा उदयकुमार इङ्नाम, दीपकराज गिरी, खगेन्द्रप्रसाद लामिछाने, रामबाबु गुरुङ, रवीन्द्रसिंह बानियाँ र कृषा चौलागाईं सदस्य रहेका थिए । चलचित्र सङ्घको तर्फबाट गठित वार्ता टोलीमा पूर्व अध्यक्ष राजकुमार पोखरेलको संयोजकत्वमा नरेन्द्र महर्जन, गोपालकाजी कायस्थ, सुरेन्द्र थापा, प्रज्वल राणा लगायत सदस्य थिए ।

सुवेदीको चलचित्र ‘सतीदेवी’ को फर्स्टलुक पोस्टर सार्वजनिक

लेखक तथा निर्देशक लक्ष्मण सुवेदीको चलचित्र ‘सतीदेवी’ को फर्स्टलुक पोस्टर सार्वजनिक गरिएको छ। नारीप्रधान चलचित्र ‘सतीदेवी’को फर्स्टलुक पोस्टरमा केन्द्रीय भूमिकामा रहेको अभिनेत्री मलिका महत फिचर्ड छिन् । सार्वजनिक पोस्टरमा मल्लिका महतलाई जुत्ताको माला लगाउनुको साथै कालोमोसो पोतिएको छ। उनलाई पछाडी एकहुल मानिसले लखेटी रहेको पनि देख्न सकिन्छ। बाबु र छोरीहरु बीचको मिहीन स्नेह,सम्बन्धको आरोहअवरोह तथा समाजको सतही अनि कुसोचको प्रक्षेपण यस चलचित्रले बोल्ने लेखक तथा निर्देशक सुवेदीले बताए।

पोस्टरमा लेखिएको छ ‘इश्वरको उपहार,सृष्टि धान्छन्,होइनन् कर्महारा। छोरी बुझौं,छोरी पुझौँ,यिनै संसार सारा। यो लेखाईले चलचित्रले नारीको कथा बोल्ने प्रस्ट हुन्छ। चलचित्रमा महतको अलावा रमेश बुढाथोकी, भोलाराज सापकोटा, कुलदीप अधिकारी, सन्दीपबाबु लोहनी सृजना अधिकारी, मनीषा सापकोटा, सुजिता शिवाकोटी,तुलसी श्रेष्ठ,इश्वरी सिंह,संदेश लिम्बु,पवन केसी,जगदीश अधिकारी लगायतको अभिनय रहेको छ । दिलासा र साराको प्रस्तुती रहेको फिल्मको निर्माताका श्रीदेवी,दिलासा र सारा सुवेदी छ्न ।

दिलाशा क्रियसन तथा गोल्डेन स्टेट मुभी मेकर्स एलएलसी क्यालिफोर्नियाको सहकार्यमा निर्माण भएको चलचित्रमा निर्देशक सुवेदीकै कथा, पटकथा, संवाद रहेको छ । बाबु श्रेष्ठले छायांकन गरेको चलचित्रमा दीपक शर्मा र सुवास भुसालको संगीत छ, भने रामजी लामिछानेको कोरियोग्राफी छ । काठमाडौँ र लमजुङको विभिन्न स्थानमा छायाङ्कन भएको चलचित्रको हाल पोस्ट प्रोडक्सनको कार्य अन्तिम चरणमा छ। चलचित्रको प्रदर्शन मिति भने सार्वजनिक गरिएको छैन।