Breaking News
भैरवबहादुर सहित ५ फिल्मकर्मीलाई ‘इनास विशिष्ट सम्मान’ प्रदान

काठमाडौँ । नेपाली फिल्ममा प्रथम नृत्य निर्देशक भैरवबहादुर थापा, वरिष्ठ गीतकार किरण खरेल, वरिष्ठ गायिका मिरा राणा, वरिष्ठ अभेनता कृष्ण मल्ल, अभिनेत्री शर्मिला मल्ल एकसाथ सम्मानित भएका छन् । अन्तर्राष्ट्रिय नेपाली कलाकार समाज (इनास) को पाँचौँ ग्लोबल सम्मेलन सबै कलाकारलाई ‘इनास विशिष्ट सम्मान २०२३’ द्वारा सम्मान गरिएको हो ।

कार्यक्रममा मन्त्रिपरिषद्का पूर्व अध्यक्ष तथा पूर्व प्रधानन्यायाधीश खिलराज रेग्मी, ग्लोबल अध्यक्षमा रामचन्द्र थापा लगायतले सबैलाई फूलमाला तथा सम्मान पत्रले प्रदान गरे । कार्यक्रममा मन्त्रिपरिषद्का पूर्व अध्यक्ष तथा पूर्व प्रधानन्यायाधीश रेग्मीले नेपाली भाषा, कला तथा संस्कृतिलाई विश्वव्यापी रूपमा संरक्षण तथा सम्वद्र्धन गर्ने इनासले महत्त्वपूर्ण भूमिका खेलेको बताए ।

चलचित्र कलाकार संघका अध्यक्ष मोहन निरौलाले कलाकार संघ इनाससँंग सहकार्य गरेर अगाडि बढ्न तत्पर रहेको बताए । अभिनेता कृष्ण मल्लले आफू सम्मान लिन आएको भन्दा पनि सम्मान गर्न आएको बताउँदै इनासले नेपाली कला संस्कृतिलाई विश्वभर फैलाउन सफल भएको बताउँदै इनासलाई अझै सशक्त भएर अगाडि बढ्न शुभकामना दिए ।

महाधिवेशनले ग्लोबल अध्यक्षमा रामचन्द्र थापा (अस्ट्रेलिया) सर्वसम्मत रूपमा निर्वाचित गरेको छ । जसमा वरिष्ठ उपाध्यक्षमा साबु गदाल कार्की (अमेरिका) मित्रलाल पार्दै (पोल्यान्ड), अर्जुन काफ्ले (बेल्जियम), मनिषकुमार श्रेष्ठ (बेलायत), राधी क्षेत्री (इटाली) रहेका छन् । त्यसैगरी महासचिवमा राजमान तामाङ (डेनमार्क), सचिवमा आनन्दु लामा (अमेरिका) कोषाध्यक्षमा कुलराज थापा (नेपाल) रहेका छन् ।

क्षेत्रीय संयोजकहरूमा प्रकाश तिवारी (युरोप) रुपा न्यौपाने (दक्षिण एसिया), कन्हैयासिङ्ग परियार (उत्तर अमेरिका) रहेका छन् । सह–संयोजकहरूमा श्याम श्रेष्ठ (युरोप) रहेका छन् भने बाँकी केही पदहरु हालका लागि रिक्त राखिएको ग्लोबल समितिले जनाएको छ ।

इनासले प्रत्येक २ वर्षमा गर्ने ग्लोबल सम्मेलनका अवसरमा कार्य कुशलताको उच्च मूल्याङ्कन गर्दै एक क्षेत्रीय समिति र १ राष्ट्रिय समितिलाई उत्कृष्ट इनास सम्मानद्वारा सम्मान गर्दै आएको छ । जसअनुसार यस पटक जर्मनी राष्ट्रिय समिति र युरोप क्षेत्रीय समितिले इनास उत्कृष्ट सम्मान २०२३ प्राप्त गरेका छन् । इनास उत्कृष्ट राष्ट्रिय समिति जर्मनीको सम्मान इनास जर्मनीका पूर्व सल्लाहकार मदन दाहाल तथा इनास युरोप राष्ट्रिय समितिले प्राप्त गरेको सम्मान इनास युरोपका संयोजक प्रकाश तिवारीले ग्रहण गरे ।

इनास नेपालका अध्यक्ष दयाराम पाण्डेले स्वागत मन्तव्य राखेको कार्यक्रममा पूर्ण लामाको समुहले नृत्य, गायिका माण्डवी त्रिपाठी र सरोज साजन श्रेष्ठले गायन प्रस्तुत दिएका थिए ।

तस्विर-राज मल्ल

निश्चलको चलचित्र ‘दिमाग खराब’ ले दर्शकको होइन नेताको ‘दिमाग खराब’ होला त ?

काठमाडौं। निर्देशक निश्चल बस्नेतले प्रदर्शनको तयारीमा रहेको चलचित्र ‘दिमाग खराब’ राजनीतिक विषयबस्तुमा आधारित चलचित्र नभएको बताएका छन् । राजधानीमा आयोजित एक कार्यक्रममा राजनीति कसरी व्यक्तिसँग जोडिन्छ भन्ने कुरा मात्रै चलचित्र ले समेटेको बताएका हुन् ।

‘हाम्रो सिनेमा ‘दिमाग खराब’ राजनीतिक सिनेमा होइन् । राजनीतिले कसरी हरेक व्यक्तिलाई असर गर्छ त्यो मात्रै दिमाग खराबले देखाउँछ,’ बिहीबार काठमाडौंमा पत्रकारहरूसँग कुरा गर्दै उनले भने, ‘यो व्यक्तिको कथा हो । व्यक्तिसँग जोडिएर राजनीति कसरी आउँछ भन्ने सिनेमाले देखाउँछ ।’

हरेक व्यक्ति राजनीतिसँग चाहेर वा नचाहेरै पनि ठोक्किने गरेको उनको भनाई छ । ‘यो एउटा साधारण व्यक्तिको कथा हो । हरेक व्यक्तिले गर्ने संघर्षको कथा हो,’ निश्चलले भने । सिनेमाले दर्शकको दिमाग खराब गराउने विश्वास उनको छ ।

‘स्क्रिनमा देखाउने कुराले दर्शकको दिमाग खराब गराउँछ,’ उनी भन्छन्, ‘जिन्दगीमा धेरै कुराले दिमाग खराब गराउँछ । कहिले आफ्नै कुराले र कहिले अरूका कुराले दिमाग खराब गराउँछ । त्यही नै यो सिनेमाले देखाउँछ ।’

अभिनेता खगेन्द्र लामिछानेले आफूलाई निश्चलप्रति पूर्ण विश्वास रहेको बताए । त्यसैले सिनेमा राम्रो बनेकोमा आफू विश्वस्थ रहेको उनको भनाई छ । ‘म सँग दिमाग खराबको सुटिङमा जानु अगाडि धेरै समय थिएन । त्यसैले निर्देशकलाई मैले तपाईले जे काम जसरी लगाउनु हुन्छ, त्यसैगरी गर्छु भनेको थिएँ,’ खगेन्द्रले भने, ‘यो सिनेमामा मैले पहिलो पटक डिरेक्टर्स एक्टर भएर काम गरेको छु ।’

अभिनेत्री स्वस्तिमा खड्काले निश्चलका यसअघिका सिनेमा महिला पात्रका सन्दर्भमा ‘वेल रिटन’ नहुने गरे पनि यसपटक भने त्यो समस्या नरहेको बताइन् । ‘मैले दर्शक भएर हेर्दा उहाँका सिनेमामा महिला पात्र वेल रिटन भएको पाउँदिन थिएँ । यो कुरा मैले पहिले पनि भन्थेँ । तर, यो सिनेमामा त्यो समस्या छैन भन्ने लाग्छ ।’

निर्देशक निश्चलले स्क्रिप्ट डक्टर राख्दा धेरै विषयलाई सच्याउने अवसर पाइएको बताए । सिनेमा भित्रका कतिपय विषयमा स्क्रिप्ट डक्टरसँग गम्भीर छलफल गरेर समावेश गरेको स्मरण गर्दै यसले सिनेमालाई सहयोग गर्ने उनको भनाई छ ।

अभिनेता खगेन्द्रले भने केही व्यक्तिले सिनेमामा स्क्रिप्ट डक्टर राख्ने सुरुआतलाई लिएर आलोचना गरेको भन्दै राम्रो कामको सुरुआत भएको भन्दै त्यसलाई सहयोग गर्नु पर्ने बताए । ‘दिमाग खराब’मा मनोज पण्डित स्क्रिप्ट डक्टरको रुपमा रहेका छन् ।

सिनेमा आर्ट्स र ब्ल्याक हर्स पिक्चर्सको निर्माण रहेको सिनेमामा खगेन्द्र लामिछाने, दयाहाङ राई, स्वस्तिमा खड्का, अपर्ण थापा, विजय बराल, सुमन कार्की, पुष्कर गुरुङ, माओत्से गुरुङ, राजन खतिवडा, रमा थपलिया, गौरभी आरएल सिंह, गीत अधिकारी, कृष्णभक्त महर्जन, धीरज भट्ट, राहुल सिवाकोटी, नविन खड्कालगायतको पनि अभिनय छ ।

निर्देशक बस्नेतले ६ वर्षपछि निर्देशन गरेकाले पनि दर्शक सिनेमाको व्यग्र प्रतिक्षामा छन् । आकाश बरालको लेखन र मनोज पण्डित स्क्रिप्ट डाक्टर रहेको सिनेमा राजनीतिक विषयमा केन्द्रित रहेर निर्माण भएको हो । सिनेमामा रौनक विक्रम कडेल निर्माता र सुरज बम ठकुरी कार्यकारी निर्माताको रुपमा रहेका छन् ।

सिनेमामा सुसन प्रजापतिको छायांकन, निमेष श्रेष्ठको सम्पादन, जयन के बाइबा र बाबुल गिरीको संगीत, राजकुमार उप्रेतीको द्वन्द्व निर्देशन तथा रोहित शाक्यको ब्याकग्राउन्ड स्कोर छ ।

‘तीर्थकुमारी स्वर्णीम साँझ २०८०’ हुँदै

काठमाडौं । बरिस्ठ लोकगायिका तीर्थ कुमारी थापाको पहिलो एकल सांगीतिक साँझ हुने भएको छ । यही मङ्सिर ८ गते रास्ट्रीय नाचघर जमलमा ‘तीर्थ कुमारी स्वर्णिम साँझ २०८० ‘ हुने आइतबार काठमाडौंमा आयोजित पत्रकार सम्मेलनमा जानकारी गराइयो । अन्नपुर्ण चेम्बर अर्केस्टाले आयोजना गर्न लागेको कार्यक्रमको काठमान्डौ प्रज्ञा कुञ्ज स्कुल र तुलसी भक्त कन्ट्रक्सन प्रा.लि. सह आयोजक रहेका छन् ।

५ दशक भन्दा बढी समयदेखि नेपाली लोकगीतमा निरन्तर लागिरहनु भएकी लोकगायिका थापा पहिलोपटक एकल सांगीतिक साँझ मार्फत गुञ्जिन लाग्नु भएको हो । कार्यक्रमा गायिका थापाले ‘म त खादिन कुवाँको पानी हो’, ‘ढुङ्गे बगर माया’,‘झम्के फूली नाकैमा बुलाकी’,‘उकालीमा पनि हजुर मोटर जादो रैछ’,‘बारीको डिलमा ओखरबोट’,‘माछी मार न हे दाई हो’ लगायतका २ दर्जन जति उनका गीतहरु प्रस्तुत गर्दैछिन् । कार्यक्रममा प्रवेशका लागि एक हजार, पन्ध्र सय र दुई हजार रुपैयाँको टिकट राखिएको छ ।

पत्रकार सम्मेलनमा बरिस्ठ लोकगायिका थापाले कार्यक्रमका लागि अन्नपुर्ण चेम्बर अर्केस्टा ,काठमान्डौ प्रज्ञा कुञ्ज स्कुल र तुलसी भक्त कन्ट्रक्सन प्रालि संग सहकार्य गर्न पाउँदा आफु खुसी रहेको बताउनु भयो । गायिका थापाको छोरा तथा सङ्गीतकार सुरज थापाले एकल साँझलाई भव्य बनाउन कुनै कसर बाँकी नराख्ने जानकारी दिनुभयो । ‘आमाको सपना थियो, यसलाई पुरा गर्न पाउँदाको खुशी शब्दमा व्यक्त गर्न सक्दिन । हामीले युगल गायनमा आमासँग गाउन सक्ने पुराना गायक नै प्रस्तुत गर्नेछौँ । बाँकी केहीमा मैले पनि साथ दिनेछु’, गायक थापाले भन्नुभयो । २०२८ सालमा रेडियो नेपालमा गीत रेकर्डिङ गरेर गायन र संगीत यात्राको थालनी गर्नु भएकी गायिका थापाको हालसम्म एक हजार भन्दा बढी गीतहरु रेकर्ड भैसकेका छ्न।

विभिन्न सामाजिक सेवाको सहयोगार्थ थुप्रै पटक सांगीतिक कार्यक्रमहरूमा आफ्नो गायन प्रस्तुत गरिसक्नु भएकी गायिका थापा प्रबल गोरखा दक्षिणबाहू मानपदवी २०५७, वीरेन्द्र ऐश्वर्य सेवा पदक २०५८ लगायत दर्जनौ सम्मान, पदक र पुरस्कारहरू प्राप्त गरिसक्नु भएको छ । ‘तीर्थ कुमारी स्वर्णिम साँझ २०८० ‘ कार्यक्रम सामाजिक सशक्तीकरण, सामाजिक जिम्मेवारी र सांस्कृतिक प्रवर्द्धनमा समेत प्रेरणा दिन सहयोग पुग्ने अपेक्षा रहेको आयोजकले बताएका छन् ।