Breaking News
जनकको ‘घरज्वाइँ’ असार २८ बाट प्रदर्शनमा आउने

काठमाडौँ। चलचित्र ‘घरज्वाइँ’ आगामी वर्षको असार २८ देखि प्रदर्शन हुने भएको छ। निर्माण टिमले सामाजिक सञ्जालमार्फत थिम पोस्टर सार्वजनिक गर्दै प्रदर्शन मिति घोषणा गरेका हुन्।

सामाजिक कथामा आधारित चलचित्रमा कलाकार दयाहाङ राई, मिरुना मगर, बुद्धि तामाङ, पुष्कर गुरुङ, शिशिर बाङ्देल, राज थापा, कविता आले, शिला आले, अनु थापा, बिना थापामगर, खड्ग बहादुर पुन (खबपु), विवेश बुढामगर, सुनिल मगर लगायतको अभिनय रहनेछ।

माघको तेस्रो सातादेखि छायांकन सुरु हुने तयारीमा रहेको चलचित्रलाई अनिल बुढा मगरले निर्देशन गर्नेछन्। चलचित्र पूर्वी रुकुम र तकसेरामा छायांकन गरिने जनाइएको छ।

निर्देशक मगरसहित विनोद खतिवडा र सुभाष कोइरालाले चलचित्रको कथा लेखेका हुन्। जिएम मुभिज प्रोडक्सनको प्रस्तुति रहने चलचित्रका निर्माता जनक घर्ती मगर हुन्।

फिरोज खड्का सहायक निर्देशक रहेको चलचित्रमा हर्क साउद र मनोज थापाको शब्द तथा संगीत र रामजी लामिछानेको कोरियोग्राफी रहनेछ। चलचित्रलाइ आर फिल्म्सका रोहित कट्टेल र रत्न श्रेष्ठले वितरणको जिम्मा लिएका छन्।

मिस नेपाल श्रीच्छाले गरिन् क्वीन कलेक्सनको उद्घाटन

काठमाडौँ । मिस नेपाल श्रीच्छा प्रधानले आफूलाई नेपाली पहिरनमै रुचि रहेको बताएकी छन् । नेपाली पहिरनमा ढाका बढी मन पर्ने र प्रयोग गर्ने बताएकी उनले आकर्षक, सजिलो र उचित मूल्यमा नेपाली पहिरन मिल्ने भएकोले सबैलाई प्रयोग गर्न समेत सुझाएकी छन् ।

शुक्रवारबाट ललितपुरको जावलाखेलस्थित सञ्चालनमा आएको क्वीन कलेक्सन उद्घाटन गर्दै प्रधानले नेपाली पहिरन धेरै कुरामा सोचेर, सजिलो र स्वास्थ्यको दृष्टिले समेत निर्माण हुने भएकोले प्रयोग गर्न सजिलो समेत रहेको उनको भनाइ थियो ।

‘म नेपाली बुटिकहरुकै फेसन प्रयोग गर्छु । किनभने त्यहाँ मूल्य सुहाउँदो र सबैले तिर्न सक्ने हुन्छ’, उनले भनिन् ‘बुटिकमा आफूले चाहेजस्तो डिजाइन छान्न र बनाउन सकिन्छ ।’ ग्राहक प्रतिको जिम्मेवारीमा अन्य भन्दा बुटिक अलि बढी जिम्मेवार हुने गरेको आफूले पाएको उनले सुनाइन् ।

‘बुटिका पहिरन एकदमै कलरफुल, युनिक डिजाइन हुन्छ । अहिलेका हामी युवाले पहिलेका कल्चर पहिरन प्रयोग गर्दा अर्कै किसिमको गर्व फिल हुन्छ । त्यही कारणले पनि म नेपाली पहिरनमा रमाउँछु’ उनले थपिन् ।

प्रधान ‘मिस वर्ल्ड’ को तयारी गरिरहेकी छन् । ‘मिस वर्ल्ड’ को प्लेटफर्ममा पनि उनले नेपाली विभिन्न कला संस्कृति र वातावरण झल्कने पहिरन प्रयोग गर्ने सोचमा छिन् । त्यसका लागि उनले नेपाली डिजाइनर, त्यो पनि आइआइएफटी स्कुल अफ फेसनसँगको छलफलमा छिन् । मिस नेपालमा पनि आइआइएफटीको सहकार्य रहेकोले मिस वर्ल्डका लागि सहकार्य गर्ने सोच बनाएको उनले बताइन् ।

क्वीन कलेक्सन मेनका रानाले सञ्चालनमा ल्याएकी हुन् । मेनका आइआइएफटी स्कुल ओफ फेसन ललितपुरकी विद्यार्थी हुन् । आफूले अध्ययन गरेर सिकेको कुरा प्रयोग गर्ने र फेसनमा सेवा दिने उद्देश्यले क्वीन कलेक्सन सञ्चालनमा ल्याएको रानाले बताइन् ।

विश्व बजारमा चलेका र आकर्षक डिजाइन समेत उपलब्ध हुने बुटिकमा आफूलाई मन पर्ने डिजाइन उचित मूल्यमा तयार गर्न लगाउन पनि सकिनेछ । बुटिकले आफ्नो डिजाइनमा क्वालिटी र रंग संयोजनमा समेत विशेष ध्यान दिने बताएको छ ।

चलचित्र संग सम्बन्धित संस्थाहरुले दिए बोर्ड स्वायत्तता हुनुपर्ने सुझाव

काठमाडौँ । चलचित्र क्षेत्रका विभिन्न ८ संस्थाले प्रस्तावित चलचित्र विधेयकमा चलचित्र विकास बोर्डले मागेको सुझाव पेस गरेका छन् । शुक्रबार बोर्ड अध्यक्ष भुवन केसीलाई भेटेर उनीहरुले लिखित रूपमै सुझाव पेस गरेका हुन् ।

संघसंस्थाले बोर्डमा बुझाएको सुझावमा चलचित्र विकास बोर्ड स्वायत्तता लगायत विभिन्न माग छन् । चलचित्र कलाकार संघका अध्यक्ष मोहन निरौलाले बोर्डमा बुझाएको सुझावमा विकास बोर्ड स्वायत्तता, नेपाली चलचित्रको प्राथमिकता, वर्गीय संघसंस्थाको अस्तित्व लगायतलाई प्राथमिकता राखेर सुझाव दिएको बताए । बोर्डमा राजनीतिक हस्तक्षेप रोक्न चलचित्र सम्बद्ध संस्थाको सिफारिसमा पदाधिकारी नियुक्ति गर्नुपर्ने र संस्थागत निर्णयलाई स्विकार्नु पर्ने समेत सुझावमा दिएको निरौलाको भनाई छ ।

सुझाव लिँदै बोर्डका अध्यक्ष केसीले चलचित्र क्षेत्रका विज्ञ र विशिष्ट व्यक्तिको रायसुझाव लिएर मात्र मन्त्रालयमा पेस गर्ने बताए । सुझाव बुझाउने संस्थाहरुमा चलचित्र संघ, निर्माता संघ, निर्देशक समाज, कलाकार संघ, आदिवासी जनजाति चलचित्रकर्मी महासंघ, प्राविधिक संघ, द्वन्द्व कलाकार संघ र नृत्य संघ रहेका छन् ।

बोर्डले केही महिनाअघि सार्वजनिक भएको मस्यौदामा चलचित्र क्षेत्रका विभिन्न संघसंस्थाले विरोध जनाएका थिए । संघ संस्थाको विरोधपछि बोर्डले मस्यौदाको विषयमा राय सुझाव मागेको थियो ।

उत्कृष्ट नृत्य निर्देशकको अवार्ड सुनिललाई

काठमाडौं । नृत्य निर्देशक सुनिल गिरीले उत्कृष्ट नृत्य निर्देशकको अवार्ड प्राप्त गरेका । उनले काठमाडौंमा सम्पन्न भएको ‘प्रथम एनडिए नृत्य निर्देशक अवार्ड-२०८०’ समारोहमा उक्त अवार्ड आफ्नो पोल्टामा पार्न सफल भएका हुन् । दर्जनौं भिडियो निर्देशन र ‘घातक मान्छे’, ‘बनबास’, ‘अन्त्य, ‘ज्यानमारा’, ‘प्रतिघात’ जस्ता आधा दर्जनजति चलचित्रमा गिरीले नृत्य निर्देशन गरिसकेका छन् ।

नेपालकै पहिलो नृत्य निर्देशक एवं नृत्य सम्राट भैरवबहादुर थापाको प्रमुख आतिथ्यतामा र एनडिएका अध्यक्ष देवराज गुरुङको अध्यक्षतामा काठमाडौं राष्ट्रिय नाँचघर जमलमा अवार्ड कार्यक्रम आयोजना गरिएको थियो । उक्त कार्यक्रममा विभिन्न २४ नृत्य विधामा अवार्ड प्रदान गरिएको थियो ।

अवार्ड कार्यक्रमको मनोनितका लागि निर्णयक समूहमा नृत्य निर्देशकहरू शम्भु शाही, गोबिन्द प्रभात र कृष्ण रसाल रहनुभएको थियो भने अन्तिम फाईनलका लागि निर्णयकहरूमा वरिष्ठ नृत्य निर्देशकहरू भुवनदास श्रेष्ठ, कमल राई, डा.आर.सी.कोइराला, रोचक थापा, जोगेन्द्र केसी र प्रदीपरमण सिंह डंगोल रहेका थिए ।